بیر نئچه وقتدور قلم ایلور سوال
سویله گوروم ،یوسفین همتاسی وار؟
کُل جهاندا اونا تای بیرکسین
عاشق و پژمرده، زلیخاسی وار؟
یوسفه خاطر ،گوزون الدن وِرَن
حضرت یعقوب کیمی، شیداسی وار؟
تِز دِدیم ای یوسفه قربان اولوم
دوزدی اونون قامت رعناسی وار
بیر نئچه مَه رو ،الینی دوغراییب
گوردولر الحقّ رُخ زیباسی وار
یوسفه افضل تانورام، بیرنفر
لیک دئمورم، مریمین عیساسی وار
یادئمورم فرعونی، نابود ادن
روزگارین حضرت موساسی وار
من دئیورم یوسفه افضل فقط
شیعه لرین حضرت عباسی وار
دنیادا چون معدن غیرت اودور
جنگیده ،میداندا شجاعتلیدور
هامی بیلور کان شهامت ، اودور
حیدری قوللاری نه قدرتلیدور
وارث عدلیله عدالت ، اودور
داغلارا مانند ، صلابتلیدور
زینبه یار، دینه حمایت اودور
گُل ئوزی آی، سرو قامتلیدور
بله اونون همّت والاسی وار
شیعه لرین ،حضرت عباسی وار
بیر یلیدی ،یوسف اونا مشتری
کُل ملائک آدینون ، ازبری
دٔرّ نبی، هاشمیان گوهری
قدرت بازوسی ییخار خیبری
شاه شهیدانون اصیل دلبری
ساقی طفلان، بیز اونون نوکری
حیدر کرارین او نام آوری
اولدی او اسلامین علم پروری
قانینه غلطاندی شرف مظهری
قدی کمان اولدی اودم، خواهری
قالدی ال اوسته یارالی ، پیکری
تندن اولان بیر نئچه اعضاسی وار
شیعه لرین حضرت عباسی وار
یوسفه خاطر الینی دوغرویان
شیعه لر عباسه اولوب باغری قان
واردی نئچه میلیون اونا، باش یاران
تک آدینا قربان اولار، انس و جان
بیرگُلیدی حیدر اونا، باغبان
فاطمه هیئتلرینه ، میزبان
چنگ توسل وورا کیم ، بی گمان
دردینه درمان آلاجاخ، رایگان
قدی چو سرو، ابرولری چون کمان
هیبتینه خم اولوری ، آسمان
مقدمینه بوسه وورار، حوریان
بیرغمینه آغلیور هی، شیعیان
یازما قلم ثانیه سنده ، دایان
گوزلری آغلاتماگیلان ،وِر امان
صبر اِله تعجیل اِلمه ،بیر یوبان
اولسا دئمه گوزلرینه، دولدی قان
نیزه و اوخ یاغدی اونا، همزمان
مشکی دلیندی سوئی اولدی، روان
اللری قالدی باجیا ، ارمغان
یوسفین عباسه تقاضاسی وار
شیعه لرین حضرت عباسی وار
حقّی قویوب، ناحقی او سئچمیوب
بیر قدم حقدن قاباغا، گئچمیوب
شمشیری حقین دریسین ، بیچمیوب
فتح الیوب نهری سودان ، ایچمیوب
کرب وبلانین نئجه سقاسی وار؟
شیعه لرین حضرت عباسی وار
آند ایچیرم که اونا تای ، گلمیوب
کیم دئسه گر تای گلجک، بیلمیوب
گوزلرینون قانین هنوز، سیلمیوب
شیعه قولوبینده یاشور ، اولمیوب
گوز یاشینا رحمت دریاسی وار
شیعه لرین حضرت عباسی وار
قوی یازا (لطفی)قلم احساسی وار
قوی سوروشا هرکسین ، آشناسی وار
هر گروهون دوزدی که آقاسی وار
هانسی گروهون بله مولاسی وار؟
شیعه لرین حضرت عباسی وار
