یا حسین، بو صحرای پر بلایه خوش گلدون

یا حسین، بو صحرای پر بلایه خوش گلدون

کعبه‌دن صفا گتدون کربلایه خوش گلدون

یا حسین حسین مظلوم

بو دیار پر غمدي، کوی حزن و ماتمدی

سال شصتم هجرت دوّم محرّمدی

غملی حالدا کانون ابتلایه خوش گلدون

سیّدی بیله پوزقون دشت پرغمه باخما

آغلیان گوزون قربان نهر علقمه باخما

سو آخوب دیر آل مصطفایه خوش گلدون

وار باشوندا یا مولا بیلمورم نه هنگامه

گیتمدون بو موکبله شهر کوفه و شامه

فخر ایدور بو یرسنله نُه سمایه خوش گلدون

آخ گوروم بوصحراده عزّتون مدام اولسون

بو قبیله اهلندن جدیوه سلام اولسون

اللّرون ئوپوب چاتدوخ مدّعایه خوش گلدون

ای سُلاله‌ی طاها نور دیدة زهرا

هر سوزون اولا مولا امر ایله ایداخ اجرا

رحمتون بو صحرایه سالدی سایه خوش گلدون

قارداش سارالان رنگوه قربان بو نه یِردی

قارداش سارالان رنگوه قربان بو نه یِردی

یاندورما منی ایلمه فغان بو نه یِردی

تیجک بو بلالی چوله توکدون یوزه قان یاش

رنگون سارالوب سولدی اُلِیدی باجون ای کاش

قربان اولوم آغلار گوزیوه آغلاما قارداش

حالون نیه پوزقوندی حسین جان بو نه یِردی

بو صرصر محنت ته ائیدی غم یولین آچدی

قوندی یوزیوه تیر مصیبت دله ساچدی

قربان سارالان رنگیوه، رنگون نیه قاچدی

آثار خزان اولدی نمایان بو نه یِردی

قویجان قدمون بو یره، پژمرده دل اولدون

نولدی سنه قارداش که ساری گُل کیمی سولدون

گورسندی یوزومده اُلوم آثاری پوزولدون

ای عزّت گلزار و گلستان بو نه یِردی

آز آه چکوب ایله نوا ای شه دوران

گوز یاشوی  توکمه او گوزل گوزلره قربان

پوزما اوزون ای قلب تمام عالم امکان

سنلن پوزولور عالم امکان بو نه یِردی

ای آفت کونِینه آدی حرز مجرّب

هرگز گوره بیلمز گوزی یاشلی سنی زینب

هر چند منه سن دیمیش کشفیدی مطلب

امّا اوزون ایت مطلبی اعلان بو نه یِردی

اوّل دولانوب یاور و انصاریوه باخدون

دولدی گوزون عبّاس علمداریوه باخدون

بیر زینبه بیر خورداجا قیزلاریوه باخدون

اولدون نیه چوخ حالی پریشان بو نه یِردی

سن آغلوسان آئینه ی طاهایه باخاندا

حالیم پوزولور من رخ لیلایه باخاندا

عبّاس کیمی سرو دل آرایه باخاندا

اشکونله اولور صبر ایوی ویران بو نه یِردی

قربانون اولوم قیل منی بو سرّیدن آگاه

علّت ندی سرلشکره امر ایلدون ای شاه

قورسونلا چوخور یرده بیزه خیمه و خرگاه

سرّین بو سوزین ایلمه کتمان بو نه یِردی

بو یِر گَتورور قلبیمی درده آنام اوغلی

وردور ما سرا پرده بو یرده آنام اوغلی

توکمه دُرِ اشکون رخ زرده آنام اوغلی

ایتمه منی دل خسته و گریان بو نه یِردی

یوخسا بو همان مرکز ایفای وفادی

بو دشتیده لیلانون ایشی وا ولدادی

واضح دی گوروم یوخسا بو یِر کرب و بلادی

اکبر اولاجاق قانیله غلطان بو نه یِردی

اَل ساخلا حسینی گوروسن یازموری خامه

ایسته صله شاه شهدادن بو کلامه

زینب دلیجه یاز بو سوزی بیرده امامه

قارداش سارالان رنگیوه قربان بو نه یِردی

فرمایش ایتدی زینبه مولای کائنات

فرمایش ایتدی زینبه مولای کائنات

باجی بو یردی کرب وبلا شاطئی الفرات

قربانگه محقق اسلامدور بویر

بویرده دین حق تاپاجاق تازه دن حیات

چون ئولدوروبله دین خدانی گروه کفر

احیای دینه لازمه دور قانلو بیر ممات

قرآنی محو ایدوبدی باجی منکران دین

قانلا گرکدی ثبت اولا بو نسخه نجات

اسلام چوخ سوسوزدی منیم قانمه بوگون

جاری گرك ایدم قانمی منده چون قنات

بیر امر اعظمه منی مأمور ایدوب خدا

حیران قالور اوامریده ذرات ممکنات

اول امردن سنی ایدرم ایندی مطّلع

قلبنده تاکه محکم اولا صبر وهم ثبات

سویولارینی باغلیاجاق لار بو دشتیده

آغلار سوسوزلارون حالنا اهل شش جهات

عباس قوللاری سو یولوندا اولار قلم

تپراقه اول قلم یازاجاق نچه مین نکات

اول نکته لر سنه اولاجاق بیر به بیر عیان

قلبنده ساخلا اونلاری سن ایلمه بیان

بو یر باجی عوالم دیگر نشان ویرر

هر عالمنده مین صف محشر نشان ویرر

هر صفده مین قیامت صغرا اولور به پا

رفتارین اوندا قامت اکبر نشان ویرر

اول سروقدی گر گوره سن قان ایچنده سن

آیا نه لر سنه دل مضطر نشان ویرر

اسلام بیر جه خورداجا قربانلوق ایستسه

گهواره دن اوزین علی اصغرنشان ویرر

حالون نولور سوسوزدان اگر گورسن اصغری

گل لبلرینده بیر قَبس آذرنشان ویرر

آلام قوجاقمه سوآلام قومیدن اونا

اوندا بوغازینی اوخا لشگر نشان ویرر

اصحاب باوفالریمی ئولدورر بوقوم

هر فردی فردی عشقنی یکسر نشان ویرر

باجی کسر منیمده بو باشیمی شمر دون

خون خدانی عالمه خنجرنشان ویرر

باجی اسیر اولمیاسوز سیز اگر، یقین

آزاد هرگز اولمیاجاق دهرده بو دین

بورا کربلادی زینب بورادی سرای عشقیم

بورا کربلادی زینب بورادی سرای عشقیم

بو بلالی چولده بر پا اولاجاق عزای عشقیم

قره ساچلاری آغاردار بو یرون غم وبلاسی

منه  دلربادی  زینب   بو دیار   غم    نماسی

بورا  کعبۀ  وفادی   بورادی   حسین  مناسی

قانیلان اولار مزیّن باجی جان منای عشقیم

من  الستیدن  بو  دشت محنیلن  آشنایم

بویوروب  بابام  پیمبر کی قتیل اشقیایم

یازیلوبدی عرش حقّه من امیر کربلایم

ئوله جک حسین،زنده قالاجاق ولای عشقیم

گوز اچان زمانیدن من گزورم بو غم سرانی

بگنوب   خدای    داور   بو  دیار   بی ریانی

بو مکان آلار قوجاقه   بو   حسین    لامکانی

بو  ترابیدن   سمایه   چاتاجاق ثنای عشقیم

بو سرای پر محنده باتاجاق قانا قوناقلار

پارا    تخته نون   مثالی   قوریار عطش دوداقلار

باخار  حسرتیله   زینب   او آخان سووا اوشاقلار

ملکوتی   ایلیر   مات   بلی ماجرای عشقیم

بو چولون دیسم بلاسین باش   آچوب ملکلر آغلار

سو سوزون دیسم پیمبر یوزه اشک چشمی باغلار

سوسوز اهولر ملالی   باجی   قلب عرشی داغلار

یاری   گونده   ایلیر پیر سنیده بلای عشقیم

باتاجاق   قانا    ستملن   علی اکبریم   مناده

دگه جک قلیج باشیندان چاتاجاق بالام مراده

اونی  خیمیه   جوانلار   گتیرلّه    بیر عباده

او أولن زمان الیمدن دوشه جک عصای عشقیم

ایدر عزم جنگ سورا حسنون گوزل بالاسی

باشینون قانی او ماهون الینون اولار حناسی

منه اکبریمدن  آرتیق گله جک اونون بلاسی

باشی اوسته اولماز افسوس باجی مجتبای عشقیم

بو بلالی چولده اتدان دوشه جک وزیر لشکر

اونا   یاره   چوخ   ویراللار سپه پلید و کافر

دولاجاق  قانیلا   گوزلر    کسیلر  بدندن اللر

او یاتار فراتون اوسته اوجالار لوای عشقیم

باجی قارداشیم أولنده    قالار   اللریم   بلیمده

سورا اصغری گتیررم ولی سو سوزی دلیمده

بیر  اوخیلا  دلسیز  اوغلوم بویانار قانا الیمده

اولاجاق او اوخلا پرپر گل باصفای عشقیم

قالاجاق بو چولده تنها بو حسین امیر احرار

ولی  بو امیره  اولماز نچه مین سپاهیدن یار

باشیمی کسر قفادن او چوخور مکاندا اشرار

دم   تیغیده    گوزلدی باجی ربنّای عشقیم

دولاجاق   خیام   عشقه    سپه    شریرو غدّار

بو تیکانلار اوسته زینب قاچاجاق حیالی قیزلار

اولارین   امیدی  سن سن اول اوشاقلارا مددکار

بوجهاندا سن تک اولماز بیری آشنای عشقیم

داغیلار   جفا   الیلن    بو حسینوون تفاقی

ایلیر بو جسمی ویران باجی اتلارون ایاقی

سر نیزه ده   حسینون  دیه جک ثنا دوداقی

منه    منبر ای عقیله اولاجاق جدای عشقیم

بو قدر بلایه صبر ایت سنه صبر ویردی جانان

آلورام   جانا   بلانی    بودی   نیّتیم باجی جان

کی جزاده   شیعیانیم   منیم    اولماسین پریشان

چون او شیعه لرله یاخجی قورولار عزای عشقیم

یازاجاق   حسین     بلاسین   شعرای آل حیدر

او کسون سوزی اولار ناب کی ایده تلاش بهتر

بو   بلانی    گوزیاشیلان    یازاجاق نوید نوکر

یاییلار  او   پاک    طبعدن   فلکه نوای عشقیم

بو چولده باجی محنت هجران سنون اولسون

بو چولده باجی محنت هجران سنون اولسون

آغلار گوزیله زلف پریشان سنون اولسون

عهد ایلمیشم بوردا گرک تشنه وئرم جان

 باشسیز بدنیم ایستی قوم اوسته قالا عریان

منلن یاتا بو چولده گرک یِتمیش ایکی جان

شام ایچره باجی،منزل ویران سنون اولسون

بو دشت بلا اولموش عجب بزم مرتب

غم جامین ائدوبله می محنتله لبالب

تقسیم اولونوب آل پیمبر،باجی زینب

عبّاس منیم،عابد نالان،سنون اولسون

ترک ائیلر عدو حرمت قرآن و کتابی 

یغمایه گئدر فاطمه نون طاقت و تابی

من اصغری آغوشه آلوم،سنده ربابی

بوشرطیله پیکان منیم،افغان سنون اولسون

بو چولده باتار کاکل اکبر باجی،قانه

تیر غمه لیلانون اولور جسمی نشانه

من ئولمه میشم گلمه گیلن آه و فغانه

مندن سورا بو ناله و افغان سنون اولسون

هر ظلم و ستم گلسه باجی اولما پریشان

پیمانۀ غم نوش ائله تا سینمیا پیمان

دامادیمون ئوز جسمی اولور قانینه غلطان

جان تازه گلین درد و غمی،جان سنون اولسون

ایچدیم باجی پیمانۀ پیمانِ بلانی

تا گلشن ائدم قانیمیله دشت بلانی

بو یئرده من ئوز یانیمه آلّام شهدانی

ویرانه ده بیر جمع پریشان سنون اولسون

جمع ائت باشیوا  سلسلۀ آل رسولی

سر سلسله قیل عابدِ بیمارِ ملولی

کول اوسته قویار باجی منیم باشیمی خولی

تنّور منیم،سینۀ سوزان سنون اولسون

صرّافه رضا،لازمه دور گوهر معنا

نه قشر،نه ترکیب،نه صورت،نه هیولا

تحصیل کمالات ائدوب اول قابل انشا

تا روز جزا روضه ی رضوان سنون اولسون

سرزمین کربلا وادیّ ایمندور باجی

سرزمین کربلا وادیّ ایمندور باجی

جلوه گاه نور وجه حیّ ذوالمندور باجی

محترم یردور بو یر دارالصّفای عشقدور

اهل عشق آنلار بو یر کرب و بلای عشقدور

من خلیل عشق، بو صحرا منای عشقدور

قان شَمیمی بو سوزه برهان مُتقَندور باجی

دولدوروب دشت عراقی باشداکی شوریم منیم

من کلیم ا... عشقم، کربلا طوریم منیم

دلده اَرنی، جلوه ی جاناندی منظوریم منیم

جلوه گر بوردا حسینه نور ذوالمندور باجی

بو بیابان بلانین بیر بیوک غوغاسی وار

آل طاهانین بو یرده محشر کبراسی وار

زینبیم بوردا حسینین یوم عاشوراسی وار

قانیمه باتماقلیقا بو یر معیّندور باجی

اوزگه بیر مقصودیله بو سرزمینه گلمیشم

ایتماقا حائل خدنگ کفره سینه گلمیشم

باش و جانیمدن گیچوب ترویج دینه گلمیشم

دین اسلامین رواجی بوردا منلندور باجی

عالم ارواحیده نشر اولدی طومار غمیم

شُقّه آچدی باشیم اوستونده بلایا پرچمیم

هر مصیبتده باجی سنسن شریک اعظمیم

عهدیمون نقصانینون تکمیلی سنلندور باجی

ای باجی اوّلده من عهد ایتموشم جانانیله

گلشن اسلام و قرآنه ویرم سو قانیله

گلمیشم بو دشته یتمیش بیر نفر قربانیله

کعبه ی مقصود بو وادیّ ایمندور باجی

باده ی عشقیله جام دل ایله سرشاردی

که وجودیم موبمو مشتاق وصل یاردی

بیر بیابان شاهراه محفل دلداردی

بوردا شمع جلوه ی دیدار روشندور باجی

بو همان یردور آتام جدّیم ویروب باجی خبر

بوردا مظلوم ایلر آل اللهی اشرار کَفَر

ایستر ایتسون ظلمینی اشرار کینه مُستتر

لیک مظلومیّتیم گون تک مبیّندور باجی

دشمنیم مظلوم ایدر بو چولده آل هاشمی

اُلدوره لّر بیر به بیر یتمیش نفر یولداشیمی

خاک و خون ایچره یخالّار اوغلومی قارداشیمی

کربلا یتمیش ایکی قربانه مدفندور باجی

اکبری باشدان قلجلار ایله قوم بدسیَر

قان آخوب باشدان، یوزینده شَدّه ی مرجان دوزر

قرمزی قانیله صحرای بلانی خوش بزر

باخسا هر کیمسه دیر بیر طرفه گلشندور باجی

قاسمی آتدان یخار ظلمیله قوم اشقیا

اکبریم تک دینه ایلر تشنه لب جانین فدا

امّ لیلایه اولار آغلار آناسی همصدا

ویرسه سس اوغلی اُلن ثَکلایه احسندور باجی

بوردا عبّاسین ایده لّر چاک چاک اعضاسینی

قان ایدر لبریز جام دیده ی شهلاسینی

سو کنارینده یخالّار قدّ سرو آساسینی

اوندا بولّم ظاهراً فاتح بو دشمندور باجی

اصغریم سوز عطشدن غنچه ی گل تک سولار

هولدن اوچ شعبه لی پیکانِ ظلمه رام اولار

اوخلانار حلقی، قزل قانیله قونداقی دولار

محفل جانان او قانیله مزیّندور باجی

خاک و خون ایچره یخار دشمن بو پابند غمی

کشف ایدر هر یاره جسمیمده رموز مُبهمی

خوش بزر اوخلار منیم سانسیز یارالی سینمی

گل وجودیم تیرِ ظلمِ خصمه مخزندور باجی

بیر زیارتگاه اولار بو سرزمین پرمحن

ایسترم منده گلر بو تائب شیرین سخن

ذکر ایدر بو شاه بیتی دوره سینده سینه زن

سرزمین کربلا وادیّ ایمندور باجی

کربلا آچ سینووی لب تشنه قربانلارگلور

کربلا آچ سینووی لب تشنه قربانلارگلور

یثربی ترك ایلیوبدورغملی مهمانلارگلور

آز قالور تیره ترابون کیمیا اولسون سنون

آز قالور عطر گُل یاسیله دولسون گلشنون

لاله لر آز قالدی گل لنسونله، سولسون سوسنون

چون سنه مهمان اولا سرو گلستانلارگلور

شه سنی ایلر مکان یتمیش ایکی قربانیله

تپراقونداگُل بیتر سیراب اولارسان قانیله

عالمه مشهور اولارسان سن قزیل ایوانیله

اول پذیرا بانیان طاق وایوانلارگلور

چارسوق مصر عشق ایلر سنی سلطان دین

بو مکاندا گل ساتار شاه گلستان آفرین

مشتری دور گللره البته رب العالمین

ظاهراًجانلار ولی باطنده جانانلارگلور

سنده بر پا ایلیور پیر مغان بیر میکده

بادة عشقی ایچوب مستان اولارلار می زده

مست اولاربیرآندا گل ده باغباندا غنچه ده

پیر اولا حتّی سنه طفل دبستانلارگلور

آز قالور سنده قیامت باشلانا قانلارداشا

آز قالور تأثیر ائده بوردا نوالر داغ داشا

هر آنااوغلیلا، هر باجی قوشولموش قارداشا

مو پریشان دیده گریانلار، پریشانلارگلور

آز قالور گون سنده تاپسون بیرجه حال اغتراب

آز قالور محنت لروندن ثبت اولونسون مین کتاب

شمره آز قالدی اسیر اولسون حریم بو تراب

دام غمده ال ایاق چالماقه جیرانلارگلور

سن منای عاشقان بی ریا سن کربلا

یعنی قربانگاه ائدرتپراقووی میر هدی

واردور علّت شیعه لر قاره گیوب ایلر نوا

جوشه عاشورا گونی رگلرده کی قانلارگلور

سنده نوحه نوح ائدریاندیم بالا طاهادیر

باش آچار یعنی (حسینیم وای) خانم زهرا دیر

تلّون اوسته قارداشیم وای زینب علیا دیر

نینواایلر نوا عرش اوستن افغانلارگلور

سنده لیلانون جوانی قانینه غلطان اولار

سنده بیر نو کدخدا ئوز دینینه قربان اولار

سنده باشسیزدینه قربان شاه مظلومان اولار

سنده باشه ظهر عاشورا ده پیمانلارگلور

کربلا بیر گون اولار بو تپراقون خاك شفا

دردینه هر چاره سیز شیعه آلارسندن دوا

هی دیرعاشقلرون آی کربلا آی کربلا

تا سنی قیلسون زیارت دیده گریانلار گلور

نه سببدن ایلیورسن بوچولی وطن حسینیم

نه سببدن ایلیورسن بوچولی وطن حسینیم

گورونور بو غم چولونده اثر محن حسینیم

اوتوروبدی چهره لرده گورونور غبار محنت

وار اورك دوتان هواسی ای عزیز آل عصمت

اثر غمه بو چولده ندور ای حسینیم علّت

بو مکانی مسکن ایتدون سوله سن ندن حسینیم

خبرین ویروبدی جدیم ئوزی اولمیا بویردی؟

ئوزی بیر بلالی صحرا آدی کربلا بویردی؟

اولاجاقدی آل طاها غمه مبتلا بویردی؟

سن ئوزون بو ماجرانی منه قیل علن حسینیم

او بابام دیین یر اولسا اگر ای عزیز زهرا

بو چولون بلالرینه ئوزومی ایدوم مهیا

سن ئوزون دعا بویور تا باشما گلنده غوغا

منه اولماسون او غملر داخی بل بوکن حسینیم

منه قیل بیان بو چولده اولاجاق نه ماجرالر

قدیمی ایدر خمیده غم و رنج و ابتلالر

ئوزولر الیم ائلمدن گیدر الدن آشنالر

منه اوندا صبر ویرسون حقِ ذوالمنن حسینیم

نجه صبر ایدوم ئوزولسه الیم آلتی قارداشمدان

یری واردی سیل، الهام آلا اوندا گوزیاشمدان

کسیلر امیدیم اوندا اوجالار الیم باشمدان

منه تسلیت او ساعت کیم اولار دیین حسینیم

لحظات غمده آیا کیم اولار منیم پناهیم

اورگیمدن اوندا عرشه اوجالاندا دود آهیم

نجه صبر ایدوم، زواله یتشنده مهر و ماهیم

باجون اوندا واردی حقّی ئوله غصه دن حسینیم

یانورام حسین بو غمدن بیله غملی ماجرادن

بیزی آیری سالدی دشمن هامی خویش و اقربادن

وطنیم دوشنده یاده اورگیم دولور نوادن

بوگوزومده جلوه گردی منیم اول وطن حسینیم

اولا حیف الیم سنیله وطنه دوباره چاتماز

چوخ اولار یارام دوا بو دل بی قراره چاتماز

سنیله الیم حجازه او گوزل دیاره چاتماز

ئوپرم هاچان مزار حسنی، گورن حسینیم

کلیم عشقه بو یر جلوه گاه سینادی

کلیم عشقه بو یر جلوه گاه سینادی

زجاج دل اودی آئینه ی تجلّادی

فروغ صورته مجذوب اولماز اهل ولا

که نقش صفحه ی خاطر جمال معنادی

نه تک زباندی که هر بیر نفسده یار دیر

که یار وصفینه ذرّات جسم گویادی

ایدوبدی محو نظردن تمام دنیانی

او منظری که اورک چشمینه هویدادی

تمام عالم اولا گوز، محالیدور گورسون

او جلوه نی که منه منظر تماشادی

شهادتیله منه کام دل اولار حاصل

بو یاره لر دله راه وفادی یارادی

سنیله هم نفسم هر نفسده، گرچه دیر

گورن حسین بو دشت بلاده تنهادی

ندور جهان که دیم سندن اوتری ترک ایتدوم

نثار جان و سر اول مقام سودادی

غبار گرچه اولوبدور عذار شائبه سی

نه غم که شوق لقادن اورک مصفّادی

بو خاکدانه نه رغبت که دل اولوب مشتاق

او بزمه که رخ دلدار محفل آرادی

اورک شکفته دی چون لاله داغ اکبردن

فضای روضه ی جان گلشن مصفّادی

گرکدی پر آچا اوخدان هما کیمی عاشق

که اوج قاف تجرّد بلند و والادی

اورکده یوخدی خیالوندن اوزگه، آگهسن

که عشق شائبه ی غیریدن مبرّادی

زجاج جسم سنا آز قالور وصاله یتم

اودور اورک بیله بی تاب و ناشکیبادی

حسیندن دی ولیکن خلوصیله ''عابد''

خلوص اولماسا سعی و تلاش بی جادی

تازه لندی ماه غم ایّام عاشورا گلور

تازه لندی ماه غم ایّام عاشورا گلور

آل طاهایه گینه بیر محشر کبری گلور

گورسنور اوضاع عالمده بیر اوزگه انقلاب

کثرت محنتدن عالم آز قالور اولسون خراب

بو نه غمدور بو نه محنت عالم اولموش دل کباب

واحسینا ناله سی هر سمتیدن گویا گلور

ساخلیوب افلاکیان ماتم حسینه سربسر

جمله سی اشکین یوزه غربال چشمیندن اَلر

حضرت زهرا آچوبدور باش، اولوبدور نوحه گر

شیونه حوّا خدیجه مریم و سارا گلور

حاملان عرشه امر ایتدی خدای لامکان

چکدیلر عرشه قرا، قان آغلوری کرّوبیان

آغلوری اوغلی حسینه خاتم پیغمبران

متّصل دلدن نوایه حضرت زهرا گلور

گوئیا بو گونلرین مثلیدی شاه نینوا

باشدا باشسیز عترتی ایلوردی عزم کربلا

پرچم آچموشدی باش اوسته وارث شیرخدا

گوردولر ناگه قباقدا لشکر اعدا گلور

حضرت عبّاسه یوز دوتدی او شاه محتشم

ای سپهسالار لشکر، ای منه صاحب علم

قویما دوشسونلر اماندور وحشته اهل حرم

حرّیدور بو مین نفر آتلیله بی پروا گلور

عترت ختم پیمبر تا گورنده لشکری

وحشته دوشدی هامی، اشکیله دولدی گوزلری

سرعتیله آل هاشم قصد ایدوب محمل لری

گوردی قیزلار نالیه چون بلبل شیدا گلور

تسلین اطفاله ویردی یاوران جان نثار

قویمادی ایتسون اذیّت فرقه ی بی ننگ و عار

کربلاده بولمورم بس هاردا قالموشدی بولار

فکریمه بو یرده یارب بیر غم عظما گلور

آه یابن العسکری آغلا اوزونده بو غمه

اونداکی جدّون حسینین امری تاپدی خاتمه

الده حربه کوفیان یوز قویدی سمت مخیمه

گوردی زینب های و هویِ لشکر اعدا گلور

حامدا آغلار امام عصر بو غمده اوزی

سنده آغلا، چوخ سور اول شهریار آغلار گوزی

آغلا، آغلات خلقی، ورد ایله دلونده بو سوزی

تازه لندی ماه غم ایّام عاشورا گلور