ای بقیع ای مدفن زهرا سلام اولسون سنه

ای بقیع ای مدفن زهرا سلام اولسون سنه 

ای مزار عترت طاها سلام اولسون سنه

ای بقیع ای توپراقی گونلر قباقینده قالان

ای تشیع قلبینه شوال آییندا اوت سالان

سویله منلن پس نیه یوخدی یانوندا بیرچراغ

غربتوندن حس ادور اهل بوعالم سوز وداغ

ای بقیع پس نیندون زهرای سینه خسته نی

ای بقیع هاردا ایتیردون گنبدو گلدسته نی 

آغلیار احوالیوه هرروز وشب صاحب زمان

یوخدی خاک اطهرونده لااقل بیرسایه بان

ای بقیع دوزدون نجه بوروزگارین جبرینه

قویدون آغلار شیعه یانی دورد امامین قبرینه

قالموسان ویرانه سن ایوان آبادون هانی

 گنبد عباسی  خوش نقش سجادون هانی

هاردادی گلدسته قبر امام باقرون

هاردادی بس خادم وفرش ورواق وزائرون

ای بقیع گریان اولوبدور غربتونده عاشقون

بی حرمدی بس نیه قبر امام صادقون

بحریدور شهرمدینه سنده چون آغ بیرصدف

سینه ده پنهان ادوبسن بیرنچه در نجف

ای بقیع  سولدی گلستانون نیه گلدی خزان

بس نیه زواریوین گوزیاشلاری اولدی نهان

اولیا الله گللر هرگجه دیداریوه

باش قویار زایر همیشه اول اوجا دیواریوه

چوخ دیوللر زائره توپراقه نزدیک اولمیا

هچ دموللر هرگجن بی شمع وتاریک اولمیا

شرطه لر عشاقیوی چوخ اول مکانه قویموری 

زائرون  اما نه مقدار اوردا آغلور دویموری

نه گوزلدی سامرا و کاظمین وکربلا

لیک ویراندی مزار بی چراغ مجتبی 

وارشهیدکربلانین هم گولی هم گنبدی

گون قباقینده قالوبدی مجتبی نین مرقدی

ای بقیع یاخشی امانت ساخلادون پیغمبره 

دوردامامین قبرینی ویرانه قویدون یکسره

هی دیوللر کی رضا ایراندا غربتده قالوب

باخ ولی ایرانلی لار مولایه بیر گنبد سالوب 

واردی هم صحنی اونون هم خادمی هم زائری 

واردی سقاخانه سی واردی نچه مین طائری 

اوردا مردم قوشلارا هرگون گلوب گندم سپر

هرگجه دور ضریحین مردم عاشق اوپر

سنده اما یوخدی بیرپاره حصیریلن رواق 

ایستی گون ایچره قالوبدور میزبانیلن  قوناق

سنده اوچسا بیرگورچین پرلری توزلی اولار

یوخدی بیرجرعه سویون زواریوون رنگی سولار

ای بقیع مهدی گلر آباد الرآثاریوی

بیرده کی آسان ادر بوشیعیه دیداریوی

ای بقیع ای آستانون باب جنتدن رفیع

اولگیلان سن بوکیانه روز محشرده شفیع

قرعه افتاده به شعرم که بنام حسن است

قرعه افتاده به شعرم که بنام حسن است

محور سوز دلم جود و هشام حسن است

مرغ دل کرده سکون بر سر ایوان حسن

مست جود وکرم ار خواهی به جام حسن است

گشته ای دل لقبش سید اشباب جنان

این هم ازچشمه جوشان مقام حسن است

چه  بگویم ز  در  لطف و کرمخانه او

بس بود حاتمیان جمله غلام حسن است

بر همه قشر جهان گفت چنین سبط نبی

درس ایثار وشرف متن پیام حسن است

در  ره  عشق   امامان  سهامی  دارند 

در ره دین خدا صلح سهام حسن است

حرف خام است ز خوفش به عدو صلح نمود

ترس وتسلیم تبرا ز مرام حسن است

پرسشی  کرد  صحابه  ز امام  عرفا

صلح با ظلم کجا نقش نظام حسن است؟!

از غریبی حسن بود چنین صلح نمود

لاجرم صلح خودش هم ز قیام حسن است

"متقی"گشته سوال امده بر خوان کرم

چون بگفتند کرمخوانه امام حسن است

ایتمروخ عبث نی کیمی نوا

ایتمروخ عبث نی کیمی نوا 

وار ایکی بویوک ماجرا بو گون

هم رسول اکرم وفاتیدور 

هم شهید اولوب مجتبی بو گون

ماسوا فغان ایتسه وار یری

جان ویروب ایکی مقتدا بو گون

بیر وجود پاکی که شانینه 

نازل ایلوب حق فتح آیه سی

خاک مقدمیله اونون صفا 

تاپدی مطلقا عرش پایه سی

اولمیوب رضا ذات کبریا 

دوشماقا تراب اوسته سایه سی

حیف اولوبدی تحت ترابیده 

مختفی او نور هُدی بو گون

بو فنا جهاندان گیدن زمان 

برگزیده ی کلّ ماخلق

خلقت وجودینی خلق ایدوب 

خالق ازل خلقه ماسبق

یعنی اشرف خیل انبیا 

خاتم رسل نور پاک حق

اوز یرینده قویدی خلایقه 

اون ایکی نفر پیشوا بو گون

اوّلی ولیّ خدا اولوب 

قید ظلمیله باغلانوب اَلی

زوج فاطمه مهر مصطفی 

یعنی حضرت مرتضی علی

بعد حجّت حقّ لم یزل 

مرتضی وصیسی حسن ولی

بیر ایچیم سو ایچدی حیاتینون 

ختمینه ایدوب اکتفا بو گون

آغلارام اوچومجی وصیسینون 

حالی گر بیان اولسا برملا

کلّ یوم عاشور فرض اولوب

کلّ ارض اولوب دشت کربلا

نام پاکی مظلوم ئولن حسین 

تشنه جان ویرن حامل بلا

اوز مصیبتین یاده سالمیوب

اول شهه ایدر آه و وا بو گون

عرض ایدر که قارداش حسینیوین 

جانی قان دوتان لبلره فدا

هانسی بی مروّت بویور سنی 

ایلیوب بو دردیله مبتلا

پاره پاره دوشموش جگرلرون 

طشتیده قزل گُلدی گوئیا

شوره گَتدی بلبل کیمی منی 

نی تک ایلدوقجا نوا بو گون

اوندا که حسینیله مجتبی 

بزم وحدت ایتمیشدی اختیار

بیر به بیر امامت ودایعین 

تاپشوروب حسینه او تاجدار

باخدی بیر عنایتله زینبه 

غم گونی او خاتون غمگسار

گوردی ایلینمز او بی کسون 

دردلرینه هرگز دوا بو گون

خاصّ بیر توجّه قیلوب او دم 

لطفیلن او اللهین حجّتی

بُلدی بیر مریضون محالیدور 

اوزگه بیر دوائیله صحّتی

چون طبیب حاذق بُلور دوا 

درده مقتضی گویه حکمتی

سویلدی که امر قضایه دور 

سنده من کیمی ویر رضا بو گون

ایتمه چوخ پریشان خیالیوی 

اول بلای عشقیله ممتحن

آغلاما بیله، توکمه اشک تر 

مه جماله ایتمه ستاره سن

قتلگهده گورسن حسینیوی 

جان ویرن زمانینده ایمدیدن

زلفیوی یولوب سیلی وورما سن 

گُل جماله ای مه لقا بو گون

بیر طرفده گورسن دوشوب یره 

ایستی قوملار اوستونده پیکری

العطش صداسی گَلور باخور 

نهر سمتینه قانلی گوزلری

بیر طرف سَنانیله حرمله

بیر طرفده شمر اَلده خنجری

کاش اولا حسینه اولان جفا 

ای باجی منه آشنا بو گون

ای امام غائب یتیمیوم 

سن یتیم اولانلار آتاسی سن

کشتی نجات بو امّتون 

هم خدا بُلور ناخداسی سن

نی کیمی نوایه گَلَنلرون 

بی نوالرون آشناسی سن

سنده آغلاسان بیزده جدّیوه 

ماه و سال و صبح و مَسا بو گون

بزم وصلیده ساقیان غم

بزم وصلیده ساقیان غم 

ویردیلر منه بیر سبو باجی

واردی نشئه سی نشئه تینیده 

کیمسه ایچمیوب بیله سو باجی

بزم وصل جاناندا بو  گیجه 

باش ووروب منی ایتدی شادکام

گرچه سودۀ زهریله منه 

خواب ناز اولوب بو گیجه حرام

کوی عشقیده فخردور منه 

شمع وصله پروانه تک یانام

قان اولان بو  گو گلومده هر زمان 

سیر ایدر بیله آرزو باجی

دور ایاقه ایت باخبر گله 

باشیم اوسته  عباس و قاسمی

قارداشین دیمه زهر کین ایچوب 

یاس ایدوب فلک عیش اساسیمی

غفلتاً حسینه بو نوعیله 

سویلمه باجی اقتباسیمی

رمزیله بیان ایت حسینیمه 

شرح حالیمی مو بمو باجی

وای او حالیوه خیمگاهیوه 

هایهوئیله لشکر اوز قویار

گورسن حجت الله حرملرین 

قوم کفر وکین ال تاپوب سویار

خوردا قیزلارین گوشواره و 

معجریله خلخالی هر نه وار

اوز الونله بیر بیر سویوندوروب 

اهل شامه سن ویر گرو باجی

قویما اهل بیت رسالتی 

اودلانان چادرلاردا دیده تر

ویر اجازه قاچسونلا چوللره 

آهوان دین زارو خون جگر

دختران زهرایه بو ستم 

اهل شامیدن سهلیدورمگر

هر کیم ایتسون اوز گل جمالینه 

پرده طره مشکبو باجی

بو جماعتین جور و کینه سی 

گلمیندی حد و نهایته

ظلم الیله باغلالا گه سنون

قولارون طناب اسارته

گه سو یولارین باغلار اهل کین 

اهل بیت ختم رسالته

گه حسن ایچر سو، سو ئولدوری

گه حسینه ویرمزله سو باجی

گرچه نصرت غیبی « وافیا »

وار همیشه بو طبع ناطقه 

گیچمه حقیدن بو مقالیده

ایتدی نصرتون بیت لاحقه

سویله شوریله ایستسن اگر

قسمتین اولا لطف شامله

بزم وصلیده ساقیان غم 

ویردیلر منه بیر سبو باجی

گرچه ایچمیشم سو بو کوزه دن

گرچه ایچمیشم سو بو کوزه دن 

اود دوتوب وجودیم یانار باجی

تشنه ی وصال حبیبیدیم 

بولمدیم بو سوده نه وار باجی

دور ساقی بزم یاریده 

اولدی قسمتیم بو سبو منیم

نوش ایدن کیمی یاندیروب دل و 

جانیمی بو بیر جرعه سو منیم

دوغرانوب دیمم پاره پاره دل

تاپدی پاره قلبیم رفو منیم

یار یاره سین التیام ایدن 

یار اوزی ووران زخم اولار باجی

نار آب و آتش مزاجیله 

گرچه جان و دل اودلانوب یانار

خوشدلم ولی بیله یانماقا 

دل اوزی بو سرّی قانوب یانار

وار نه قدر پروانه عشقیله 

شمع وصل یاره یانوب یانار

لذّتین بو شوقیله یانماقین 

هر یانان منیم تک قانار باجی

بسکه یاندی اعضای باطنیم 

سوز نار زهر بلائیله

اولدی قطعه قطعه جگرلریم 

گلدی طشته، بنزر قزل گله

گللریم گولنمز بو سهلدور

گل چمنده بیرده چتین گوله

گولسه غنچه گل گورسه اهل دل

عشق گلشنین سولدورار باجی

داغ فرقتی دلده بولدوره 

لاله گوندرر یار یارینه

یعنی لاله تک داغ بر دلم

آب وصل سپ هجر نارینه

قارداشون دل داغدارینین

پاره سین حضور نگارینه

تحفه گوندرر، ‌شاهدی گوره 

جانه هجری نه اود وورار باجی

رنج جور اهل جفائیله

بیر مدید مدّتدی خستیم

بو مدید مدّتده گون به گون

مین شکنجیله دل شکستیم

سر به زیر پربسته قوش کیمی

رشته ی علاقِیله بستیم

آچسا گر حوادث بو رشته نی

طائر روانیم اوچار باجی

گرچه ظاهراً دلده درد وار

لیک درد باطن دواسیدور

باخما دلده وار نی کیمی نوا

عاشقین نوا مدّعاسیدور

بو مریض عشقین سرشکیله

خون دل شراب و غذاسیدور

اوز حکیمی ایلر معالجه

رنج بسترین تیز یغار باجی

توکمه ابر نیسان کیمی یوزه 

بارش سرشک، ابرِ دیده دن

قویما بیر سر موییمی منیم 

ایسلادا سرشک غم و محن

تار موییمه بنددور جهان

بند تار تقدیردور حسن

اشکیله سر موییم ایسلانا

بحر اشکه عالم جومار باجی

باخما یوزده گوزده سرشکیمه

آغلادان منی شوق وصلدور

وصله عاشقی شوقمند ایدن

شور عشق ایّام فصلدور

نوبهار عمریم خزان اولوب

هجر قورتولوب، وصله فصلدور

عمریمون گلی سولسا واقفم

وصل گلشنیم گل آچار باجی

دعوت ایلیوب بزم وصلته

سویگلوم بو هجران کشیده نی

اولمادی رضا تلخکام اولا

زهر جام محنت چشیده نی

سویمدی برازنده بزمینه

عارضیمده رنگ پریده نی

مژده ی بهار وصالیله

رنگ زردی یاشیل بویار باجی

هر گیدن نگارین حضورینه

ایلسون گرک زینت وجود

سن محبّت یاره سیر ایله

زینتیمی ویردی او کان جود

چشم نازنین سبز رنگ خط

قانلی لبله ایلر گوزل نمود

بیله لطفه محبوبیدن یتن

جز حبیبی گوزدن آتار باجی

بیله بولّم عمرون گونی باتار

گون باتونجا شامه دونر گونون

روز حشره بیر شام اولا اگر

ایله شامه بنزر گلن گونون

دور مهر چرخ نبوّتی

شمس عشقیله دور ایدن گونون

شرق دوره سینده غروب ایدر

‌رستخیر صبحی چخار باجی

دور قبر پاک پیمبری

دور ایدنده تابوت مجتبی

یتمیش اوخ وورالّار جنازمه

اوردا دفن اولام قویماز اشقیا

دفن اولّام آخِر بقیعیده

بیله ثبت ایدوب منشی قضا

وطنیمده اوز غربتیم کیمی 

گون ایوینده قبریم قالار باجی

من نجه که مظلوم امّتم

مدفنیمده مظلوم قوم اولار

ایتگین اولماسا مدفنیمده گر

اشتهارینون گلشنی سولار

گورسه هانسی سنبل مزاریمی

سارالار سولار زلفینی یولار

قبریم اوسته هر لاله آچسا گل

باغری قان اولار تیز سولار باجی

بیر زمان اولار شیعه لر منیم

قبریم اوسته گلمز زیارته

گلسه لرده چوخ آز اولار گلن

چوخ دوشلّه رنج و مشقّته

بنزرم وطنده غریب ئولن

ناشناس بیر اهل غربته

نه گلن اولار نه گیدن اولار

قبریم اوستونی توز باسار باجی

غم یمه که گون گورمسن باجی

گون گوررسن امّا نه هور اولار

چشمه ی جهانتاب نیّره

آفتابیوین ضوئی نور اولار

هر یره سالار جلوه سین گونون

دشت و کوه اولار رشک طور اولار

مین کلیم عشقی او جلوه دن

غشوه ی محبّت یخار باجی

هر خطاب ارنی که ایلیه 

موسی محبّت ندیمینه

ربّ جلوه ایتمز عتابیلن 

طور عشقیده اوز کلیمینه

گوسترر جمال جمیلی که 

وجه دور جمال قدیمینه

بیر باخیشدا یوز مین دل اهلینه 

مین نگاهه شوق آرتورار باجی

لیک حیف اولا شمس عارضی 

پرده پرده قاندا کسوف ایدر

چون گل جمالین جفائیله 

زخمدار سنگ و سیوف ایدر

عاقبت دورار بیر جدا بویی

ذکری نام حیّ رئوف ایدر

اوندا اهل ذکره او ذکریله 

شورش قیامت قوپار باجی

حشر اعظم اولسا هامی چخار 

پرده ی دل خاک قبریدن

چوخلاری دوشر پرده فکرینه 

آختارار او گون ساتر بدن

قوپسا بو قیامت آنام باجی 

عترت خداوند ذوالمنن

پرده دن چخار قیز گلین حرم

پرده ی عذار آختارار باجی

خلق حشریدن صحبت ایلسه 

من بو محشرین یادین ایلرم

یادین ایلینده بو محشرین 

رستخیز فریادین ایلرم

صبریمین خراب آز سرشکیله

چوخ متین بنیادین ایلرم

قطره قطره گر اشکیمه دیسم 

سیل اولوب جهانی دوتار باجی

پرده ده بیان ایلرم سوزی 

قالسا اشک دیدم حجابیده

گرچه چوخ چتین بارش اولماسون 

یاغدوران دولی بیر سحابیده

خاصّه اودلانان خیمه دن بیر اود 

دل آلوب قالوب التهابیده

ذکر اولاندا خیمه آلیشماقی 

اود دوتار هامی دل یانار باجی

هر نه قدر کتمان ایدم غمی 

عاقبت مصیبت اولور عیان

چون مصیبت آخِر اولور عیان 

منده واضحین ایلرم بیان

طوره فخر ایدن دشت کربلا 

بیر گونی اولار بیر محیط قان

بسکه ظلمیله ثارِ ثارِ حق 

سیل تک او دشته آخار باجی

بیر تلاطم ایلر محیط خون 

کشتی نجاتیمی غرق ایدر

کشتی نجاتیمی غرق ایدر 

شرق و غرب خورشیدی فرق ایدر

شرق یثربی غربه دوندرر

غرب شهر شاماتی شرق ایدر

نِی بویی گزر، کلّ عالمه 

پرتو هدایت سالار باجی

بیر قمر دوشر اول گون آردیجا 

یوزدن اسگیک اولدوز کناریده

اولدوزی نه بلکه یوزه یاخین 

رشک بدرلر یوز کناریده

بلکه یوزلرین اولدوزون سایی 

اشک کوکبی دوز کناریده

بسکه اشک حسرت او یوزلره 

قطره قطره گوزدن آخار باجی

کشتی نجاتی دیدیم سنه 

قارداشیم حسین جسمی نازیدور

نی بویی گزن گون حسینیدن

بیر کسیک باشین امتیازیدور

زین العابدین او گونه قمر

نجمی بانوان حجازیدور

چخسا سیره بو آی ستاره گون 

گویده گون آی اولدوز باتار باجی

ذهنیا بیله ذهن پستیله 

همّت بلندین نه نسبتی

اوج مطلع مخترع له بیر 

فکریدن کمندین نه نسبتی

کشور فصاحت شهیله بیر 

لال مستمندین نه نسبتی

قارداشی حسن لیک امر ایده 

انتساب اولونموش یازار باجی

ئولورم یانیمدا اگلش جگریم یارادی قارداش

ئولورم یانیمدا اگلش جگریم یارادی قارداش

منه بو مدینه مسکن سنه کربلادی قارداش

یته جاق تمامه صبریم قالاجاق خرابه قبریم

حسنین مزاری پوزقون قالا گور روادی قارداش

اولاجاق سنون مزارون بیوک عزته سزاوار

گله جاقدی دسته دسته او گوزل مزاره زوار

اولاجاق منه نه زائر نه مجاور و پرستار

قالاجاقدی توزلی قبریم ایشیم آه و وادی قارداش

پوزولان مزاریم اوسته گلن اولسا کام آلانماز

یاخونا گلوب او پنمز دایانوب دوروب قالانماز

ازینی مزاریم اوسته گوزی یاشلی بیر سالانماز

گوراو یاسیله او حسرت نجه غمفزادی قارداش

سنی یاد ایدوب گلنلر قالاجاق یانوندا ایمن

منیم اولسا ایلده بیر یول گلنیم اگر معین

دویه جاقلا قبریم اوسته کوره جاقدی جور دشمن

یاناجاقدی مدفن ایچره حسنین فوادی قارداش

گلن اولساقبری اوسته حسنین ده گاه گاهی

گوزی قبریمه دوشنده اوجالار فغان و آهی

دیسه درد دل دویه لر کیم اولار اونون پناهی

گور او حسرت و او ذلت قوناقا روادی قارداش

سنون آل هاشمیله اولاجاقدی اتفاقون

ووراجاقدی عرشه طعنه حرمون گوزل رواقون

گیجه گوندوز ایللر یله اولا جاقدی چوخ قوناقون

هامی عالمین پناهی او متین بنادی قارداش

سنون آلتی گوشه قبرون اولی عرش تک معلا

گلی دسته دسته زایر دیر اوردا وا حسینا

بو جلالت و بو عزت منه قسمت اولماز اما

سنون عزتون اگر چه منه مدعادی قارداش

یاتاجاق ایاقون آتدا سنیله علی اکبر

ایده جاق غبار قبرون گوزه توتیا ملک لر

بالوی ایاقون آتدا دیه جاقدیلار گورنلر

بو یاتان جوان اوغولدی او قوجاآتادی قارداش

اولاجاقدی نچه قارداش سنون اوردا هم جوارون

یاتا جاقدی سینون اوسته یوزی قانلو شیر خوارون

اودی سری آلتی گوشه اولاجاق سنون مزارون

سنه قبریده هم آغوش ایکی مه لقادی قارداش

غم غربتیله گرچه دلیمه شراره سالام

بو نا دلخوشام ولیکن آنامین یانیندا قالام

بیر علیل بوینی یاره بالاوی کناره آلام

ایکی اوغلیدا یانیمدا گوزیمه ضیادی قارداش

نجه که فلکده طالع اولی ماهلیه ستاره

اولاجاقدی قبرون اوسته ایله گنبدو ستاره

ولی بیرنفر تاپولماز چکه قبریم اوسته قاره

اگر آغلادا بو نسکل آنامی بجادی قارداش

منیم ایتدی بیر ایچم سو جگریمی پاره پاره

سنه سو تا پولماز اما جگرون چکر شراره

سو دینده قان ایچینده وورااهل کینه یاره

بلورم بنی امیه نجه بی حیادی قارداش

آنامیزا مهر اولوبدور یر اوزینده هر نه سو وار

آدی سو منیم نصیبیم دولی زهر بیر سبو وار

داخی کیم دیر جهاندا بو سو لار دا آبرو وار

اود اولیدی کاش ازلدن قویولان سو آدی قارداش

بو حسینه ایلیوبدور ایکی قارداشی وصیت

بیری مجتبادی گوردی وطنینده درد غربت

بیری کربلا چولینده باشا باش بدن جراحت

دیدی آخرین نفسده سنه جان فدادی قارداش

بودی آخرین سوزوم ای شه یثرب و تهامه

نقدر ساقام یتشموب نفسیم منیم تمامه

منی بوردا قوی آپارما شهدا کیمی خیامه

نظرون آپارماق اولسا بیوک ابتلادی قارداش

قورویان سو جامی الده سو دیلنده دیده خدنبار

بلوسن منی گوزتلور خیمونده آل اطهار

گوره بلمرم رقیه سو دیر یانار سیزلدار

بو الوم او خجلتیمدن منه چوخ روادی قارداش

بو وصیتمیده وار دور بلوسن بیر اوزگه علت

هله بلموری بو حالی بو گروه پست فطرت

بله لر اگر یخلدیم تاپار اهل کوفه جرئت

هله مانع جسارت بو یاتان لوادی قارداش

اوزماندا تاپدی خدمت قزلیم عیار کامل

که ایکی قولوم کسیلدی دیشیم اولدی مشگه حامل

او قدر او مشکه خاطر منه اوخ ورووب ارازل

بدنیم گورورسن اوخدان پر آچان همادی قارداش

بو سوزونده وار « حسینی » نه فنون شاعرانه

نه صنایع بد لیعی نه رموز ماهرانه

صله مجتبادن ایسته ایله بو سوزی بهانه

ئولورم یانیمدا اگلش جگرم یارادی قارداش

سالدی دلدن ستم جعده منی زینب اویان

سالدی دلدن ستم جعده منی زینب اویان

ایلیوب ظلمله مسموم حسنی زینب اویان

نصف شب میل ائلدیم سواورگیم یاندی باجی

پارچالاندی  جگریم قلبیم الولاندی باجی

سسله قارداشلاریمی موسم هجراندی باجی

ترک ائدور طائر روحیم بدنی زینب اویان

بودل شبده آلوب زهر جفا طاقتیمی

رنگ رخساریم عیان ایلیوری محنتیمی

گل قبول ایله آنام نائبه سی زحمتیمی

حسنین وارسنه دیلده سخنی زینب اویان

پیک حق نازل اولوب روحمی تندن آیرا

دست تقدیریله قارداشوی سندن آیرا

خردا اطفالیمی آغلارقویا مندن آیرا

سسلورم علت اودی ایمدی سنی زینب اویان

مجتبی گلشنونون گللری غمدن سولاجاق

قاسمین گوزلری اشگیله لبالب دولاجاق

فرقتیمده بالام عبدالله عزادار اولاجاق

قویارآغلارآتاسیزلیق محنی زینب اویان

آزقالوردهریده باشه یتشه درد وغمیم

جام دلدن بوشالامحنت واندوه عَمیم

کنج منزلده گله نالیه طفلان یتیم

پوزلورقارداشون انجمنی زینب اویان

اولموشام زهریله مسموم یانورجان وتنیم

لحظه لحظه اثرائتدوقجادوتوراوت بدنیم

همسریم اولدی ائویمده ستم وظلم ائدنیم

گورمیوب دیده بئله اهرمنی زینب اویان

کوکب عمرمی جعده ستمی ایتدی زوال

زهریله کوزه نی آغشته ائدوب کینه خصال

بیرنفرشرح ائده بولمزبئله بیرظلمه مثال

یاندیرا سوبوسیاق جان وتنی زینب اویان

یاندورب خرمن دیلده بوسوسنبللریمی

گوره بولمم داخی بیرده سارالان گللریمی

قویما هجریمده فغان ایلیه بلبللریمی

دله دوتماقلیقا سرو و سمنی زینب اویان

کاش اولیدی آنامیز فاطمه صدیقه مرام

اگلشیدی باشیم اوسته ثمر خیرالانام

تاگوریدی گونوزوم اولدی نجه دیده ده شام

قان ائدوب اشگیمی اشراردنی زینب اویان

شهریثربده یتشدی منه چوخ دردوعذاب

مجتبانون اورگین ایلدیلرگونده کباب

قالمیوب غملرالینده یارالی سینده تاب

ترک ائدوردیده سی گریان وطنی زینب اویان

محفل غمده  « جوانی » اولاجاق نوحه سرا

آغلیوب آغلادار احبابوی شاه دوسرا

دیلده تکرار ائلیر بوسوزی هرصبح و مسا

سالدی دیلدن ستم جعُده منی زینب اویان

قادرآللهین آدیلان سوزی عنوان ائدورم

قادرآللهین آدیلان سوزی عنوان ائدورم

اوّلِ شعریده حَمدِ حقِ سبحان ائدورم

مستند یازدیقمی مدرک ایمان ائدورم

بلکه ایمان اولا مونس منه آخر نَفَسیم

پنج تن لطفیله محشرده اولا دادرسیم

اونداکی پرده آچوب خلقتین آیدین سحری

صانِعین اولدی بو دنیاده صَناعت نظری

 پنج تن باعث اولوب خلق ائلیوبدور بشری

اولماسیدی اولارین نوری بو خلقت یوخیدی

خَلقِ انسانیده بیر بیله جلالت یوخیدی

یارادان پنج تنی زینت عالم یارادوب

آدلارین آیری ولی عشقیده با هم یارادوب

احمد و حیدری اعلا و مُکرّم یارادوب

فاطمیله حسنِینی ائدوب الگوی ثُبات

اولارین سیره سی دور شیعه لره راهِ نجات

نورِ واحددی بولار گوزله ئورک اولما ظنین

صَرصَرِ ظَنّیله سولدورما ولایت چمنین

یوخدی روشن دئیورم فرقی حسین و حسنین

شیشه ی شَکّووی چال کوهِ حقیقت داشینا

بو حسن اون ائیل امام اولدی حسین قارداشینا

مَبدَاء عشقیدورآدی ئوزی مقصود شهود

جودِ موجوده وجود، آیتی ابعادهَ حدود

بودِ امکانه اولان هر نَفَسی بود و نبود

جانِ صُلحِ  بَشَره مایه دی بو جانِ شرف

هستِ عالمدی ئوزی ،هستیِ سلطان نجف

فیض فیّاضِ اَزل جَلوه ی جاناندی حسن

محور دایره ی عا لم امکاندی حسن

مُلکِ حِلم و شرف و عزّته سلطاندی حسن

حسرتین چکدی مَلک خاتم ئوپنده یوزینی

من کیمم؟ گویلرین اهلی ائدوب از بر سوزینی

اگلشنده درِ منزلده او زیبای طَهور

بوریَردی بوتون اطرافینی چون هاله ی نور

 یولی باغلاردیلا اولمازدی داخی راهِ عبور

چون  ائله جذب ائلیردی گلنی یا گیدنی

دایاناردی هامی رویت ائده وجهُ الحَسَنی

اوندا کی جنگ جَمل اولدی چخوب عرشه فغان

وحدت عایشه و طلحه زُبیر اولدی عیان

الده شمشیری ائدوب حمله اوسردار جوان

لشگری قیردی بو باشدان او باشا چخدی حسن

پئیلدی عایشه نین ناقه سینی یخدی حسن

دولانورگونده مَلک بابِ کرامت حرمین

عرشین اوستونده اوجالدوبدور عنایت علَمین

اونا وابسته دی کیم محشره قویسا قدمین

عشقینی قلبیده من محور ایمان ائدرم

اولانیم جاندی الیمده اونا قربان ائدرم

فکریم عاجزدی قالیب مدحینه آواره قلم

تاپمورام شانینه لایق سوزی الّلهه قسم

دئیه بیلّلم اونا خاطر یارانیب کُلّ  نِعُم

پنج تندن بیریدور،خلقت دنیایه سبب

حیدرین اوغلیدی زهرا گوزلی پاک نسب

صبری حیرتده قویوب عشقه وئروب عِزّ  و شرف

فخر ائدوبدور بئله دُردانیه سلطان نجف

صلحی اعلام ائلدی دیندی بیزه اصل هدف

گر چه بو صلحه گوره وردیلا چوخ زخم زبان

تازه قان تا پدی ولی پیکر دین ده جریان

اونا عمریم نَقَدر واردی جگر داغلیارام

ماتمینده دولانوب باشه  قرا باغلیارام

غربتین یاده سا لیب غملرینه آغلیارام

کیم اونون تک وطنینده الی قوینوندا  قالیب

کیمی آیا ئوز ایوینده حرمی درده سالیب؟

بیلمورم سّری نَدورگردشِ چرخِ فلکین

تئز اِیتوردی بو فلک فاطمه نین دوز چورگین

کیم گوروب کوزه سوئی یاندیرا دریا ئورگین؟

یاندیریب جرعه سودان قلبینی بو پیرِ فلک

میل ائدنده او سوئی حالینه آغلوردی ملک

عمرینی صرف رضایِ حق ائدوب میرِ حَرَم

ثروتین بذل ائلدی اوچ یول او دریای کَرَم

یعنی بو مردِ خدا نفسینه ده اولمادی خَم

اولدی آینده لره اُسوه ی ایثار و یقین

اوندان اورگشدی بو ایثاری ابوالفضل امین

نهری آلدی ولی سو ایچمدی عبّاسِ جوان

دایانوب نفسه مقابل شرفُ النّاس او زمان

گوئیا گوردی سودا عکس رُخِ یاری عیان

دئدی ای سوآخوسان ؟تشنه قالوب یاندی حسین

ایچمرم من سنی یالوارما لب عطشاندی حسین

چخدی لب تشنه سودان تشنه ی جامِ ازلی

سوئی حیرتده قویوب عشقیدن عباس علی

بیر الینده علَمی مشکیده امّا بیر ا لی

قلبی شوقیله دولی حیدرکرّاره خَلَف

چگنینه سالدی سو مشکین گئده خرگاهه طرف

دئیور ایکاش سوئی خیمه لره تئز آپارام

قویسالار مرکبیمی خیمیه یکسر چاپارام

سو یتشسه باجیما عشقیده عزّت تاپارام

زینبون گویلون آلوب قیزلاری سیراب ائدرم

سو منه قالماسادا تشنه لیگه تاب ائدرم

بو خیالیله چکور نقشه او ممدوح ِ مَلَک

آیری بیر نقشه ولی چکدی اونا پیرِ فلک

چوخیدی دشمنی امّا او قالوب عرصه ده تک

یاغدیروبلار اوخی باران بلا مثلی او دَم

دگدی هر اوخ قان آتوب یکسره قان اولدی علم

جگریم زهر جفائیله منیم یاندی باجی

جگریم   زهر   جفائیله   منیم    یاندی باجی

گوزون آچ بیرجه اویان لبلریم اودلاندی باجی

 

قیل نظر ای باجی بو قانه دونن گوزیاشیما

دور    خبر ایله    گیلن    کان وفا قارداشیما

هامی اولاد  علی   جمع اولا   آخِر باشیما

موسم وصل گیچوب موقع هجراندی باجی

 

بو   نئجه    زهردور   آخِر    منی بو حاله سالوب

طاقت   و    صبریمی      بو زهر    جفا اَلدن آلوب

آچ گوزون باخ یوزومه گور نجه گل  تک سارالوب

بولموسن حالیمی سن ، جسمیم اَلولاندی باجی

 

باجی زینب گوزون آچ دیدۀ گریانیمی گور

آه  و   فریادیمی ،   بو ناله و افغانیمی گور

سارالان رنگیمه باخ حال پریشانیمی گور

سرّی وار گوزلریم آخِر بئله گریاندی باجی

 

ائله    ایلوبدی    اثر ای    باجی   بو   زهر    منه

سارالوب سولدی یوزوم دوندی سولان یاسمنه

گوئیا   فصل   خزاندور    یتیشوب   بیر     چمنه

گل کیمی لبلریم آخِر ائله خنداندی باجی

 

نیلمیشدیم باجی من جعدیه مسموم ایلدی

منی مسموم ایلیوب سیزلری مغموم ایلدی

کیمی بو چرخ دنی من کیمی مظلوم ایلدی

اهل دیل اولسا منیم حالیمه حیراندی باجی

 

بیله تحریر ایلیوب لوحه باجی کِلکِ قضا

بولورم ئولدوره جاقدور منی بو زهر جفا

وئر خبر دوره می آلسونلا هامی آل عبا

قارداشون بیر نئچه ساعت سنه مهماندی باجی

 

ائله مدهوش ایلیوبدور منی اول جلوۀ یار

تاپارام ای باجی بو زهریله من وصل نگار

آل    طاها   بولورم    درد   و ملالیمده یانار

مقصدیم لیک منیم محضر جاناندی باجی

 

محنتیمده   یئری وار   باجی جگر داغلیه سن

جان وئرن وقتیده سن گوزلریمی باغلیه سن

دگولم   راضی ولی باشه    ووروب آغلیه سن

نسگلیم گرچه سنه موجب افغاندی باجی

 

صبر قیل توکمه بو غمده باجی جان گوزیاشیوی

یولما زلفون ، بو مصیبتده سن آچما باشیوی

آغلا او وقته گوررسن بو حسین قارداشیوی

قتلگاه ایچره که اوز قانینه غلطاندی باجی

 

راه حقده باجی یتمیش ایکی قربان وئره جاق

هم اوزی جمله هواداری سوسوز جان وئره جاق

سو دیوب قاتلی چون سو یرینه قان وئره جاق

یانماز احوالینه ، سانماز ئولور عطشاندی باجی

 

قوملار اوسته قالاجاقدی باجی عریان بدنی

کربلانین خس و خاشاکی اولور چون کفنی

بیر نفر اولماز اونون غسل وئروب دفن ائدنی

اهل کوفه گوره سن آدی مسلماندی باجی

 

«عاصی» یاز نوحه مدام آغلا امام حسنه

هم بو دنیاده هم عقباده ویره لّر حسنه

باطناً اوزلری بو نوحه ده دم وئردی سنه

جگریم زهر جفائیله منیم یاندی باجی

گل زینب ئوزون فریاده

گل زینب ئوزون فریاده

سنسن کمکیم دنیاده

یاندی جگریم زینب جان

طشت ایله منه آماده

مونس منه درد و غم اولدی

بو دهریده قدیم خم اولدی(2)

نیلوم منه آخر ائویمده

ئوز محرمیم نامحرم اولدی(2)

جان اوسته یم گل داده زینب(3)

سینم آلیشور آی باجی

جانیم چیخیر ایوای باجی

گوزلر یومولان لحظه،سن

چال بیر منه لایلای باجی

یوخ مرگیدن اصلا هراسیم

باخ عرشیده باشلاندی یاسیم(2)

اما سنه بیر زحمتیم وار

بو،سن،بو عبدالله،بو قاسم(2)

جان اوسته یم گل داده زینب(3)

خصمین خطرین گوردوم من

زهرین اثرین گوردوم من

یاندیم،او یانان درگاهین

مسمار درین گوردوم من

بین در و دیواره باخدیم

اوچ یوز نفر اشراره باخدیم(2)

گول پرپر اولدی غنچه سولدی

اولموش خزان گلزاره باخدیم(2)

جان اوسته یم گل داده زینب(3)

دنیاده ایله مغمومم

مهر،آنادان محرومم

مظلومه آنامدان صورا

منده حسن مظلومم

غمدن دولوبدی گوزده ابریم

چوخدی باجی سندنده،صبریم(2)

آغلار قویار صاحب زمانی

بی سایبان و ساده قبریم(2)

جان اوسته یم گل داده زینب(3)