قوریوب دوشوم سویا یوخ گمان

قوریوب دوشوم سویا یوخ گمان 

بالام آغلاما گلوم آغلاما

بو قدر کباب ایلمه آنان 

بالام آغلاما گلوم آغلاما

گورورم دوزنمیسن آجلیقا 

عطش ایلیوب سنه چوخ اثر

قالا آج سوسوز سودامر بالا 

داشا بو مصیبت ایدر اثر

بیر آنا که ایچمیه سو اوزی 

سود اولار دوشونده اونون مگر

آنان ئولسون ایلمه چوخ فغان 

بالام آغلاما گلوم آغلاما

بُلورم علاجینی دردیوین 

نیدوم الده چاره یوخ آغلارام

اثر شراره ی آهیمه 

یانارام بو سینه می داغلارام

گورورم خراش ایدوسن یوزون 

الیوی قماطیده باغلارام

هانی عقده ی دلیمی آچان 

بالام آغلاما گلوم آغلاما

ساتاشاندا گوزلریوه گوزوم 

گوزومون یاشین الرم بالا

آنالیق محبّتی جوش ایدر 

اوره گیم یانار ملرم بالا

داخی اوزگه چاره تاپانمارام 

بلگون آچوب بَلَرم بالا

ایدرم گوزوم یاشینی روان 

بالام آغلاما گلوم آغلاما

گورورم که ابر بهار تک 

بالا گوزیاشیله گوزون دولوب

اوره گون بو اوتلی دلیم کیمی 

شرر عطشله کباب اولوب

قورویوبدی غنچه دوداقلارون 

گل عارضون سارالوب سولوب

بو سولان جماله فدا آنان 

بالام آغلاما گلوم آغلاما

آلورام قوجاقیمه جان کیمی 

ایدم اُوز علاقه می آشکار

بالالار کیمی دوشومی دوتوب

یاتاسان بیر آز اولاسان خمار

گورورسن دوشوم یانور اود ویرور

ایدوسن دوداقلاریوی کنار

یانوسان سیزیلدیسان آغلوسان 

بالام آغلاما گلوم آغلاما

دولانوب خیامی تاپانمادیم 

بیر ایچیم سو ای سودامر بالام

قورویان دوداقلارون ایسلادام 

جگرون حرارتینی آلام

من اگر بو دردیله ئولمیم 

بو جهاندا عمر ایلیم قالام

یانارام بو نسگله هر زمان 

بالام آغلاما گلوم آغلاما

نیه گوزلرون چوخورا دوشوب 

نیه صورتون سارالوب بیله

نیه گَلمور آغلاماقا سسون 

منی آز کباب ایله صبر ایله

هامونون باشی قاریشوب علی 

گَله گر بو حالی آتان بُله

سو تاپار سنه بُلورم آتان 

بالام آغلاما گلوم آغلاما

بو گئجه کِشیکدی گَلنمیوب 

سنی گورماقا بالا اکبریم

من اونوندا چوخ نگرانیم 

نگران باخور یولا گوزلریم

دیورم گَلیدی گوریدی بیر 

نجه جان ویرور سوسوز اصغریم

سنه سو تاپِیدی او مهربان 

بالام آغلاما گلوم آغلاما

دیورم گیدوم عمووا دیوم 

بالامی نفسدن عطش سالوب

ایدورم حیا بُله یوخ سودوم 

بودور علّتی آنان آج قالوب

هامی چاره یوللاری باغلانوب 

هامینون قرارین عطش آلوب

اوجالوبدی گوگلره الامان 

بالام آغلاما گلوم آغلاما

گینه ای « حسینی » نه دلدی بو

که ایدور دیِنَده یارا دلی

بیله دل دیماقدان اوتور خدا 

سنه ایلیوبدی عطا دلی

دیمه ساده چخدی بو سوزلریم 

اولی ساده رسماً آنا دلی

آنالار بالایه ایدر بیان 

بالام آغلاما گلوم آغلاما

قارداش سارالان رنگوه قربان بو نه یِردی

قارداش سارالان رنگوه قربان بو نه یِردی

یاندورما منی ایلمه فغان بو نه یِردی

تیجک بو بلالی چوله توکدون یوزه قان یاش

رنگون سارالوب سولدی اُلِیدی باجون ای کاش

قربان اولوم آغلار گوزیوه آغلاما قارداش

حالون نیه پوزقوندی حسین جان بو نه یِردی

بو صرصر محنت ته ائیدی غم یولین آچدی

قوندی یوزیوه تیر مصیبت دله ساچدی

قربان سارالان رنگیوه، رنگون نیه قاچدی

آثار خزان اولدی نمایان بو نه یِردی

قویجان قدمون بو یره، پژمرده دل اولدون

نولدی سنه قارداش که ساری گُل کیمی سولدون

گورسندی یوزومده اُلوم آثاری پوزولدون

ای عزّت گلزار و گلستان بو نه یِردی

آز آه چکوب ایله نوا ای شه دوران

گوز یاشوی  توکمه او گوزل گوزلره قربان

پوزما اوزون ای قلب تمام عالم امکان

سنلن پوزولور عالم امکان بو نه یِردی

ای آفت کونِینه آدی حرز مجرّب

هرگز گوره بیلمز گوزی یاشلی سنی زینب

هر چند منه سن دیمیش کشفیدی مطلب

امّا اوزون ایت مطلبی اعلان بو نه یِردی

اوّل دولانوب یاور و انصاریوه باخدون

دولدی گوزون عبّاس علمداریوه باخدون

بیر زینبه بیر خورداجا قیزلاریوه باخدون

اولدون نیه چوخ حالی پریشان بو نه یِردی

سن آغلوسان آئینه ی طاهایه باخاندا

حالیم پوزولور من رخ لیلایه باخاندا

عبّاس کیمی سرو دل آرایه باخاندا

اشکونله اولور صبر ایوی ویران بو نه یِردی

قربانون اولوم قیل منی بو سرّیدن آگاه

علّت ندی سرلشکره امر ایلدون ای شاه

قورسونلا چوخور یرده بیزه خیمه و خرگاه

سرّین بو سوزین ایلمه کتمان بو نه یِردی

بو یِر گَتورور قلبیمی درده آنام اوغلی

وردور ما سرا پرده بو یرده آنام اوغلی

توکمه دُرِ اشکون رخ زرده آنام اوغلی

ایتمه منی دل خسته و گریان بو نه یِردی

یوخسا بو همان مرکز ایفای وفادی

بو دشتیده لیلانون ایشی وا ولدادی

واضح دی گوروم یوخسا بو یِر کرب و بلادی

اکبر اولاجاق قانیله غلطان بو نه یِردی

اَل ساخلا حسینی گوروسن یازموری خامه

ایسته صله شاه شهدادن بو کلامه

زینب دلیجه یاز بو سوزی بیرده امامه

قارداش سارالان رنگیوه قربان بو نه یِردی

ارکان دین و ایمان ویران اولوب بو آیدا

ارکان دین و ایمان ویران اولوب بو آیدا

پیغمبر اوغلی قانه غلطان اولوب بو آیدا

بو آی همان او آیدور عرشه چکیلدی قاره

یِتمیش ایکی موحّد دوغراندی پاره پاره

گلدی رسول اکرم جنّتده آه و زاره

گوردی بتول عذرا گریان اولوب بو آیدا

اولدی بو آیدا منزل دشت بلا حسینه

افلاکیده قورولدی بزم عزا حسینه

خرگاه ماتم اولدی عرش خدا حسینه

گوگلر حسین غمینده نالان اولوب بو آیدا

زهرا دیر اوغول وای، بو آیدا حیدر آغلار

ماتم دوتوب حسینه جدّی پیمبر آغلار

آغلا حسینه شیعه عالم سراسر آغلار

اشکی امام عصرین آلقان اولوب بو آیدا

سو یولّارین کسوبلر بو آیدا قوم اعدا

اللرده بوش سو جامی آغلار بنات زهرا

ای کاش قان اولِیدی یکسر قنات دنیا

ذرّیّه ی رسالت عطشان اولوب بو آیدا

کرب و بلا چولنده برپا اولوبدی محشر

لب تشنه دوغرانوبدور قطعه به قطعه اکبر

پستان کیمی اَموبدور نوک خدنگی اصغر

پیکان او شیرخواره پستان اولوب بو آیدا

اوز سود اَمَر بالاسین گورجک چکوبدی بیر آه

قالدی حسین نه حاله بُلدی او حالی ا...

دولدوردی قاندان اُوجین سَپدی سپهره اول شاه

قانیله چرخ اطلس الوان اولوب بو آیدا

اوچ شعبه لی خدنگه اصغر نشان اولاندا

ظلمیله شاه دینون گُل غنچه سی سولاندا

اصغر دیوب آناسی گیسولرین یولاندا

اشک سکینه رشک عُمّان اولوب بو آیدا

قاسم جوان اُلوبدور غمگین اولوب آناسی

آغلار دیر بالامون قان اولدی طوی خساسی

طوی گورمیوب جوانیم، گِیموبدی طوی لباسی

توپراقلاریله نعشی یکسان اولوب بو آیدا

بزم نشاطی ایتسون بیت الحزن جوانلار

ناکام اُلوی بو آیدا گُل پیرهن جوانلار

دین اوسته دوغرانوبدور طوی گورمین جوانلار

طویلار عزایه دونسون اعلان اولوب بو آیدا

قان آغلادور جهانی عبّاس ماجراسی

چیگنینده بیر سو مشکی، آنّیندا اوخ یاراسی

قول یوخ و لیک قویمور دوشسون یره لِواسی

باخمور بدن نشان پیکان اولوب بو آیدا

بو آی یر اوسته عطشان سلطان دین یخلدی

کرب و بلاده فرشه عرش برین یخلدی

اسلامیان امامی، حِصن حَصین یخلدی

زهرا عزیزی زیب میدان اولوب بو آیدا

فریاد او وقتیدن شمر آغلاتدی مهر و ماهی

اُلدوردی سو یانندا عطشان، یارالی شاهی

آل علی سویولدی، اودلاندی خیمه گاهی

پیغمبرین جلالی تالان اولوب بو آیدا

فصل خزان اولاندا وار سرّی بلبل آغلار

گلزار دین سولوبدور، بلبل یانار گل آغلار

شیعه اولان بو آیدا، باشه سَپَر کُل آغلار

راس حسین کُل اوسته مهمان اولوب بو آیدا

وار ای «حسینی» دردون ممکن دگل مداوا

باخما علاج ایدنمورعاجز قالوب اطبّا

یالوار حسینه آغلا، نومید اولما اصلا

چوخ درد بی دوایه درمان اولوب بو آیدا

به اوج سعادت همائی علی

به اوج سعادت همائی علی

به سرّ خدا آشنائی علی

به بحر حوادث به طوفان سخت

به کشتیّ دین ناخدائی علی

جهان صورتی هست و معنی توئی

تو مافوق مدح و ثنائی علی

نزاید نظیرت دگر امّهات

چُنان گوهر پربهائی علی

به جز تو ندارند فریادرس

تو یار همه بی نوائی علی

بخواهند یاری ز تو ممکنات

تو مرآت واجب نمائی علی

خداوند شمشیر و علم و هنر

مبرّی ز ریب و ریائی علی

در اسماء حق اسم اعظم توئی

به جانت قسم هکذائی علی

شده در وجود تو اضداد جمع

منزّه ز چون و چرائی علی

یلِ شیرگیری به روز نبرد

به محراب، صاحب دعائی علی

به سر برده عمری به نان جوین

ولی بحر جود و سخائی علی

به شهر علوم پیمبر دری

تو منصوص در اِنَّمائی علی

بجائی به قرآن عَلیٌ‌ حَکیم

به جای دگر قُل کَفائی علی

ز هر جای چون قطع امّید شد

تو بر ماسوا..َ. رجائی علی

تو گفتی ز من نیست اعظم خبر

به اعظم خبر مبتدائی علی

به قرآن توئی صالح المومنین

به حق معنی والضّحائی علی

ز یمن تو هستی شده پایدار

تو اِلّا پس از حرف لائی علی

چه آدم چه موسی چه عیسی چه نوح

تو بالاتر از انبیائی علی

به جز مصطفی افضل از کائنات

تو جان و دل مصطفائی علی

به قرب دَنی کرده احمد عروج

تو مخبر از آن ماجرائی علی

تکلّم خدا کرده با صوت تو

نگویم تو صاحب صدائی علی

به توصیفت آغاز و انجام نیست

تو آن ذات حیرت فزائی علی

به احمد بجائی سری از بدن

ندارید از هم جدائی علی

بود مهرت ایمان و بغض تو کفر

قسیم نعیم و عنائی علی

ز محشر ندارد حسینی هراس

تو سلطان روز جزائی علی

ای شهریار مُلک خراسان ولیّ دین

ای شهریار مُلک خراسان ولیّ دین

وی خاک آستانه سی مسجود مسلمین

ای اسم پاکی علّت ایجاد کاف و نون

مامومِ ذوالجلال و امامُ الموحّدین

تشبیه ایدم بهشته اگر پاک مدفنون

ایراد ایده لّه فرضیمه اشخاص نکته بین

حسرتدی عرش و خلدِ برین خاک بوسینه

جنّات و عرشه مدفنیوین فخری وار یقین

طاق مُقَرنَس علّتی وار واژگون اولوب

اُپماقلیقا ترابیوی ایستور اولا قرین

صحنون گورن بهشت برین ایتسه آرزو

کفران نعمت ایلیوب ای شاه عالمین

سکّان عرش و فوج ملائک، شه و گدا

فخر ایلر آستانیوه سورته اگر جبین

یالقوز تاپوب نه فیض زیارت ملائکه

ایلر طواف قبرون اولوالعزم و مرسلین

ای خاک طوس سنده شرافت نه قدر وار

آغوشه چکموسن ایله بیر جسم نازنین

فخر ایلسن بهشته اگر وار لیاقتون

غبطه جلال و شانون ایدر روضه ی برین

بیر نازنین وجود که وار بو جلالتی

عبد ذلیلدور قاپوسیندا ملائکین

غربتده بس ندور سببی قویموب احترام

توهین ایتماقا چالیشوردی منافقین

مامون عاقبت ایدوب اقدام قتلینه

دوشدی بو فکره ویرسون او مولایه زهر کین

دعوت ایدوبدی مجلسه بیر گون او سروری

چوخ یاسیله گلوبدی او مولای مومنین

مامون حیله ساز گوروب اولدی جلوه گر

نور جمالِ قائدِ قُرُّ المُحَجِّلین

عنوان مکریله ازل ایلوبدی احترام

فکر ایتدی بولمز احمد محموده جانشین

اگلشدیروب یانیندا دیدی لطف قیلموسان

خوش گلموسن عم اوغلی سن ای رکن شرع و دین

بیر خوشه زهرلی اوزوم آلدی اله دیدی

گور نه اوزومدی، بونی میل ایله بو حین

نطقه گلوب امام بویوردی گذشت ایله

غربتده گل بو غمزده نی ایتمه دلغمین

شاید بهشت اوزوملری بوندان گوزل اولا

هر دانه سی نظرده اولا لؤلؤِ ثمین

گل رحم ایله بالالاریمون یولدادی گوزی

اوغلوم تقی یتیم اولی بوندان یماق همین

مامون ال گوتورمدی مظلوم امامیدن

جبراً اله گتوردی او بیرحم مقصدین

بیر نچّه دانه میل ایلیوب ثامن الحجج

تاثیر ایدوبدی دوغرادی فوراً جگرلرین

تغییر تاپدی حالی داخی اگلشنمدی

دوردی ایاقه منزلینه گلدی چوخ حزین

فرمایش ایتدی باغلا اباصلت قاپلاری

اُلّم من ایمدی، پیک اجل ایلیوب مکین

عرض ایلدی مریض سن آخِر بو حالیده

دیداریوه گلن اولار ای خسرو مهین

ویردی جواب کیم گله جاق گورماقا منی

غربتده کیم غریبه اولار مونس و معین

گل فرشیده کنار ایله جدّیم حسین کیمی

توپراقلار اوسته جان ویروم اولسون خدا گزین

فرضی کنار ایدوبدی اباصلت، دلفکار

باغلوب قاپونی خلوت ایدوب شاه مسکنین

اللر اورک باشیندا دونردی صاقا صولا

قلبین اوغوشدوراردی ایدردی او شه انین

بو حالدِیدی گوردی صدا گلدی السّلام

سس بولدی آشنا سسیدور آچدی گوزلرین

اوغلی جوادی گوردی باشی اوسته اول غریب

محو اولدی لوح سینه دن افکار آن و این

قولّارین آچدی سالدی اوغول بوینونا او دم

آغوشه باسدی اوغلونی اول میر متّقین

عالمده ایخدا نه گوزل آرزودی بو

باش اوسته جان ویرن گوز آچوب گورسه محرمین

هر آغلیان حسینه گرک آغلاسون مدام

سالدی او گونکه دلدن او مظلومی مشرکین

اوغلی گلنمدی، باجیسی گلدی یانینه

گوردی کسور حسین باشینی قاتل لعین

سسلندی کسمه باشینی قوی باغلیوم گوزین

آرتورما باشسیز عترتینون محنت و غمین

یالواردی قاتله نه قدر ال گوتورمدی

آخِر ال آتدی دوتدی خانم قاتلین الین

سوز بیر یره دایاندی داخی عرض ایدنمورم

بولمم نولوب یخلدی یره زینب حزین

ضعف ایلمیشدی، هوشه گلوب گوز آچوب امام

بیر یاندا گوردی باجینی، بیر یاندا قاتلین

فرمایش ایتدی دورما قِییت باجی خیمیه

جمع ایله باشه قارداشیوین باشسیز عترتین

زینب قِییتدی، شمر قیلوب ظلمین آشکار

افلاکه دوشدی شور و نوا، تیتردی زمین

پیغمبر اوغلی لطف ایله بیکس حسینیه

سائلدی درگهونده بو مسکین و مُستکین

امریم دوشوبدی مشکله آواره قالموشام

حلّی سنون الونده دور آسان، منه چتین

گرچه خطا چوخ ایلمیشم دست خالیم

یا اَیُّهَا العَزیز تَصَدَّق لِخاطِئین

بیرده چوخ ایستورم دولانام باشیوه سنون

حضّار و نوحه خوانیله بو ایل بو اربعین

هر چند سوزلریمده وار ایطاءِ قافیه

امّا گذشت ایدر بونی اشخاص نکته بین

قربان اولوم جلالتیوه یا ابا الحسن

قربان اولوم جلالتیوه یا ابا الحسن

چوخ شائقم زیارتیوه یا ابا الحسن

مین بیر آدیله آدلانوب ا... لاینام

اسم رضادی مظهری بو آدلاری تمام

ای اسمی اسم اعظم حق، ای شه انام

عاجزدی عقل مدحتیوه یا ابا الحسن

دنیانین اهلی رسمیدی یوخ شبهه و مقال

شیرین آدی گلنده عسلدن وورار مثال

شیرین دور اهل عشقه عسلدن ولی وصال

قربان اولوم حضرتیوه یا ابا الحسن

تلخین مثالینی عقلا زهریدن وورا

عشاق ایچینده عکسینه اما عقیده وار

مین دفعه زهریدن آجیراقدور فراق یار

یوخ منده تاب فرقتیوه یا ابا الحسن

آگاهیسن اوزون سن اَیا شاه ذوالکرم

من عاشقم سنه، دیمه مداح و نوکرم

بیر آستانون اوپماقی مین خلده ویرمرم

آند اولسون اوز امامتیوه یا ابا الحسن

بیگانه بلمز عشق غمین، آشنا بلر

گیزلین رموزی عالم جهر و خفا بلر

قلبیم نجه یانور بیر اوزون بیر خدا بلر

دل تشنه دور سقایتیوه یا ابا الحسن

سن مظهر جمال خدای عطوف سن

کشاف هم و غم و کروب و لهوف سن

معروف سن بو اسمه امام رئوف سن

جانلار فدا عطوفتیوه یا ابا الحسن

چوخدان دوشوبدی خسته گوگل اشتیاقیوه

یاندورما بیر بیله منی نارفراقیوه

ایسته گلوم بهشتیدن اعلی رواقیوه

ویرم قسم رضایتیوه یا ابا الحسن

ای شاه ملک سلم و رضا، ایها الرضا

نومید اولا گدای درون اولماسان رضا

باخ گور روادی ای شه اقلیم ارتضی

من گلمیوم زیارتیوه یا ابا الحسن؟

سن شاه ماسوا، سنه من کمترین گدا

شاهه گدانی بوش یولا سالماق دگُل روا

بیر باخماقون ایدر ایکی دنیامه اکتفا

اولّام رهین منتیوه یا ابا الحسن

قبروندن اوتری گوگلوم اسور مثل برگ بید

بیر سائلم قاپوندا سیه روی و مو سفید

ویرم قسم جوان بالاوا ایتمه ناامید

قیل مفتخر عنایتیوه یا ابا الحسن

هجرونه گوز یاشیم قاریشوب قلب قانینه

رحم ایله بو بلا کشین آه و فغانینه

ویرم قسم شها سنی معصومه جانینه

ایسته گلوم زیارتیوه یا ابا الحسن

ای جود و بخشش و کرم و فضل معدنی

اوغلون جواد جانینه ویرم قسم سنی

بیرده قوناق چاقور او گوزل قبریوه منی

مشمول قیل کرامتیوه یا ابا الحسن

دلدن آلوبدی طاقتیمی درد فرقتون

نیلوم نصیب اولموری فیض زیارتون

هر صبح و شام یاد ایدرم حال غربتون

یانّام ملال غربتیوه یا ابا الحسن

فریاد و داد او وقتیدن ای خسرو حجاز

مسموم ایلدی سنی مامون حیله ساز

بو فکریله که ایلیه بیر نوع سِترِ راز

گَلدی سنون عیادتیوه یا ابا الحسن

گوز یاشلی عرض ایدردی که ای شاه محتشم

بو بس دگل فراقون اولور مایه ی الم

طوس اهلی ایلوری منی بو امره متهم

مه عاملم شهادتیوه یا ابا الحسن

مامون اگرچه قاتلیدی ای شه کِبار

امّا حیالیدور گنه اول شوم کین شعار

اوز ایتدیقی خطاسینه ایلردی اعتذار

آغلاردی حال رحلتیوه یا ابا الحسن

اما نه بی مروتیمیش شمر بیحیا

جدون حسینین ایتدی بدندن باشین جدا

ووردی باشین جدایه همان غملی ماجرا

اولدی سبب مصیبتیوه یا ابا الحسن

من نوکرم قاپوزدا، حسینی دی شهرتیم

لایق دگل اگرچه بو درباره خدمتیم

اما بو بوش الیله گنه یوخدی وحشتیم

گوز تیکمیشم شفاعتیوه یا ابا الحسن

جدون اوزی بیله بویوروبدی مفضله

قرآندی اصل مدرکی، روشندی مسئله

واللهی قبریدن دوراجاقدی گله گله

قائل اولان ولایتیوه یا ابا الحسن

ای ایدن خراسانی کربلا هر غمه رضا یا ابالحسن

ای ایدن خراسانی کربلا هر غمه رضا یا ابالحسن

جدی تک قوری یرده جان ویرن قبریوه فدا یا ابالحسن

سیزسوز آفرینندیه اولان آفرینش عالمه غرض

جوهر وجود اهل عالمه هر ایکی جهان نوروزه عرض

رشک خلد اعلی ضریحیوی گر بهشتیله ایلسم عوض

غبن دور منه بو معامله قیلام ادعا یا ابالحسن

بیر امیدیله دوتموشام سنون ای کرامتین کانی دامنون

ال گوتورمرم ایتمسن کرم ال منیم اماندور اتک سنون

آستانون ایله وسیعدور اولمیوبدی مایوس دشمنون

نا امید اولا بو محبلر گور اولور روا یا ابالحسن

آستانوزه یوز قویار سیزون آرزوسینون گلشنی سولان

ذیل لطفوزه اعتصام ایدر قلبی غصه دن قانیله دولان

باب رحمتوزدن گورونمیوب سیدی سیزون ناامید اولان

ایلیوب سیزی حی لم یزل معدن عطا یا ابالحسن

ای هامی ایاقدان دوشنلرین دستگیری یا ثامن الحجج

سایه عنایتده ساخلا بو مستجیری یا ثامن الحج

قوماز آستاندان کریملر کلب پیری یا ثامن الحجج

بیر قوجا قولام باشیم اوسته سال سایه ی هما یا ابالحسن

خانه زاد بیر مادحم سیزه درگهونده بیر کمترین غلام

نیلیوم که مولامه عاشقم گرچه من سیه روی بیر قولام

درد عشق ایاقدان سالوب منی گلمیشم طبیبیم دوا آلام

جرمدور مگر عاشق اولسا گر شاهه بیر گدا یا ابالحسن

وار مگر گدانون تناسبی سن کیمی جلالتلی شاهیله

گل دیسن گلر گیت دیسن گیدر دل شکسته حال تباهیله

جانیوه قسم ایله سن منه بیر نظاره نیمه نگاهیله

هر ایکی جهان دردیمه منیم ایلر اکتفا یا ابالحسن

سن یترسن اوچ یرده دادینه قبریوی زیارت ایدنلرین

بیر هامی دوراندا مزاریدن بارماقی دوداقیندا دلغمین

بیرده پخش اولاندا عمللرین نامه سی که بیر وقتدور چتین

بیر لدی الصراط اللرین دوتوب ایلسن رها یا ابالحسن

سگّیزیمجی شرطی موحدین سنسن ای هامی عالمه رجا

من غریب و بی یار و یاورم یوخ منه اولان کیمسه ملتجا

بو غریبه بیر لطفیله نظر ایلسن اگر چوخ اولور به جا

ای غریق بحر مصائبه یار و ناخدا یا ابالحسن

ای غزال وحشی دلین بلن من اسیر آلام و بی کسم

یوخ دلیم ایدم دردیمی بیان قویما سندن امیدیمی کسم

ویرم ای امید جهانیان فاطمه آنان حقینه قسم

سن آقالیقون ایله باخما وار منده چوخ خطا یا ابالحسن

قاره پوش ایدوبلر ضریحیوی چون شهادتوندور سنون شها

وا رضا سسی شهری دولدوروب مشهدی دوتوب شیون و نوا

شیعه لر وورور باشه آغلوری کربلا بساطی اولوب به پا

طوس اولوب بو داد و نوائیله دشت نینوا یا ابالحسن

میهماندی بو سعدی زمان اوز قوناقیوه بیر نوازش ایت

بو یوزی قرا نوکرونله گل مهریله عطوفتله سازش ایت

من «حسینیم» مادحم سیزه منکر و نکیره سفارش ایت

ایتمسونله مداح حضرتون قهریله ندا یا ابالحسن

ای ارض طوس سنده عجب دلربا یاتوب

ای ارض طوس سنده عجب دلربا یاتوب

مرآت حق نما و جمال خدا یاتوب

بی اختیار مایل اولور دل وصالوه

سنده مگر بو کاه دله کهربا یاتوب

بالفرض روح شکر اولا، سن بنفشه سن

ارواحی سنده جذب ایلین بیر قوا یاتوب

سن سن عیار مسلم و مومن لره محک

سنده عیار کامل اهل هدا یاتوب

ایلر زیارتون مس ایمانی صاف زر

بیر بوته سن که سنده گوزل کیمیا یاتوب

شمس الشموس سنده دور ای مفخر فلک

سنده مهیله مهره ویرن انجلا یاتوب

اسلامیده عزیزدی سنده یاتان وجود

سن سن او یر که سنده امام رضا یاتوب

پیغمبرین عزیزی، جگر گوشه سی رضا

باب الحوائج اوغلی قضایه رضا گلوب

سینای واقعیدی سناباد ارض طوس

سنده کلیم لم یزله مقتدا یاتوب

موسایه طوریده اولان انوار آشکار

سنده جفا الیله تاپوبدور خفا یاتوب

ای عرشدن گوزل یر، اوزی فرش زینتی

سنده سلیل پاک شه هل اتی یاتوب

بیر روضه سن ریاض بهشت بریندن

یوخ یوخ بهشتیده سنده جلالت فزا یاتوب

افلاکیان چکه له تمام اشتیاقیوی

سنده حبیب خالق ارض و سما یاتوب

دریای علم و حکمت بحر کمال و فضل

سن سن نه چون که سنده در پربها یاتوب

ای گوهر یگانه ی پیغمبره صدف

سنده سرور سینه ی خیرالنسا یاتوب

سن بیر رئوف امامی آلوبسان کناریوه

اسلامیانه سنده امید و رجا یاتوب

سنده جگرلری یارالی بیر بزرگوار

اوز ایل قبیله سیندن اولوبدور جدا یاتوب

یرلرده یوخدی بیر یر اولا شانیوه نظیر

الّا او یر که اوردا شه کربلا یاتوب

بیر گل وار اوردا بلبلی ارواح انبیا

امّا یارالیوب اونی خار جفا یاتوب

عرش خدا چکر او یرین اشتیاقینی

چون اوردا گوشواره ی عرش خدا یاتوب

بیر قبر واردور عرش کیمی آلتی گوشه لی

واللهی اوردا آینه ی حق نما یاتوب

قربان اولوم او مدفنه که اوردا قول بویون

بی غسل و بی کفن بیر آتا بیر بالا یاتوب

عرض ایلسم بهشت، بهشت ایلر افتخار

اوردا بهشته علت خلقت آقا یاتوب

بیر قبردور زیارتی ا... زیارتی

اوردا او که فدادی اونا خون بها یاتوب

عریان یارالی پیکری باشدان باشا خدنگ

گویا خدنگیدن پر آچوب بیر هما یاتوب

فریاد او وقتیدن که باجی تاپدی قارداشین

گوردی بدنده وار نه عبا نه قبا یاتوب

باشین کسوبله نعشی قوم اوستونده چاک چاک

گلدن لطیف جسمیده دورت مین یارا یاتوب

گویا که بیر طبق گلی اوراق ایدوبدیلر

هر برگی اوز یرینده دوشوب جابجا یاتوب

نیزه قلج سنق لاری آلتندا گیزلنوب

پیغمبر اوغلی خامس آل عبا یاتوب

عریان گوروبدی رحم قیلوب ایلیوب کفن

مرهم سالوب یاراسینا باد صبا یاتوب

معلوم اولور کسوب دالیدان قاتلی باشین

نعشی دوشوب یوز اوسته، ذبیح القفا یاتوب

بولدی باشین کسن آپاروب کوفیه قوناق

امّا اولوبدی منزلی مطبخ سرا یاتوب

سسلندی دور باجون سنه قربان نه یاتموسان

هانسی یارالی سن کیمی بی اقربا یاتوب

هانسی شهین پوزوبلار سنون تک جلالینی

صاحب لواسی قانه باتوبدور، لوا یاتوب

کیم سو یانندا سن کیمی لب تشنه جان ویروب

جان اوسته سو یرینه ایچوبدور دِما یاتوب

هانسی شهین ئولنده سویوبلار جنازه سین

کیم سن کیمی بلایه دیوبدور بلا یاتوب

هانسی آتا یانندا سنون اکبرون کیمی

نورسته بیر جوان اوزی گلگون قبا یاتوب

داماد ایدوبدی هانسی عمو قارداش اوغلونی

امّا یاخوبدی طویدا اله قان حنا یاتوب

واردور باشیمدا شور حسینی اودور سبب

نی تک سوزیمده پرده به پرده نوا یاتوب

آتدان دوشنده اکبر گُلگون قبا یره

آتدان دوشنده اکبر گُلگون قبا یره

شان و شرفده غبطه آپاردی سما یره

باشسیز بدنونده آنام اوغلی یارا چوخدی

باشسیز بدنونده آنام اوغلی یارا چوخدی

امّا باجیوی یاندوران اوچ شعبه لی اوخدی