یتوردی حجی تمامه پیمبر رحمت
قویوب مدینیه یوز مکه دن ایدوب رجعت
غدیر خمّه یتنده حبیب رب جلیل
او بین راهیده ایتدی نزول جبرائیل
گتوردی آیه بلّغ او یرده روح الامین
پیمبره یتیروب ذو الجلال پیغامین
بو نوع امر ایلیوبدور خدای لم یزلی
گرک بوگون اولا ظاهر جلال و شأن علی
ولایت اسد الله هی قیلماسان ظاهر
رسالتون الی تبلیغیدن اولور قاصر
ایشتدی چون بو پیامی جناب پیغمبر
نزوله امر ایلیوب دوشدی قافله یکسر
جهاز ناقه لریله قورولدی بیر منبر
چخوب او منبره فرمانده قضا و قدر
ازلده باشلادی بیر خطبه چوخ فصاحتیله
آچوب ثنای خداونده دل بلاغتیله
زبس که جلوه ایدوب نور احمد مختار
اولوبلا سامع و ساکت مهاجر و انصار
اوقدر خلقین ایچینده دوتوب علی کمرین
گوتوردی اللرینین اوستونه رسول امین
او قدری قوزادی اول نوری سرور مدنی
علی جمالینی گون تک گوروب هامی علنی
اوجالدی قبّه افلاکه نور یزدانی
جمال پاکی ایشقلاندروب او صحرانی
اوجا سسیله خطاب ایتدی احمد مختار
هامی بلون ای مهاجر و انصار
سرور و قوت دل گوهر ثمینیمدور
علی وصّی بلافصل و جانشینیمدور
بودور علی اسد الله سرور غالب
آناسی فاطمه دور والدی ابو طالب
بونون ولایتی هر طاعته مقدم دور
علوم ما سبق و ما یکونه اعلم دور
بونون محبتی دور حب کردگار جلیل
اولوبدی نعمت دین بو وجودیله تکمیل
منه خلیفه بودور انس و جنه مولی دور
تصرف ایمگه هر بیر اموره اولی دور
بونون ولایتینی هر کس ایلیه انکار
خدا یاننده اولار رو سیاه روز شمار
اوجالدی جشنیله تبریک عرش اعلایه
ازل عمر دیدی بَخ لَک او مولایه
بو بیر علی دی ال اوسته آلوب شه کونین
ولی آلوب الینه بیر علی ده اوغلی حسین
خدایه بنده دی اما خدای عالم دور
عزیز حقدی ولی علی اعلادور
مطیع دور اوزی حقه مطاع دور خلقه
گونه ،آیا ، یره ، مخلوقه ،حکم فرمادور
علی خدا دگل اما بشر لباسنده
هامی صفاتی اونون بی نظیر و همتادور
من آزمارام سوزی سن آزما مطلبی زاهد
نه جای بحث دی بو یر نه بزم شورادور
یوخیدی عالم و آدم ولی علی واریدی
اگرچه آدم آتاسی آناسی حوادور
