بشر آختارما رياست يارانان ئولمليدی
ايله انصافي رعايت يارانان ئولمليدي
اوخي قرآنيده تاپ سوره الرحماندا
بيوروب خالق خلقت يارانان ئولمليدي
آدمه قالمادي دنيا سنه ده قالمياجاق
عايق اول،ايلمه غفلت يارانان ئولمليدي
بش گونون لذتنه عزتي پامال ايلمه
خلقه چوخ ايتمه اهانت يارانان ئولمليدي
ملك الموت صفندن قاچا بيلمز بير كس
چاتاجاق هاميا نوبت يارانان ئولمليدي
يولدی دنيا، يولون اوستونده دايانما، يولا دوش
يولدا يوخ جاي اقامت يارانان ئولمليدي
خلقي ارشاد ايله دنياده الوندن گلسه
پيس يولا ايلمه دعوت يارانان ئولمليدي
بيوروب ختم رسل پيسدي زنادن، غيبت
غيبته ايلمه عادت يارانان ئولمليدي
ياخشي يولداش سنه تنها عمل صالحدي
يولداشين ايتمه اذيت يارانان ئولمليدي
حقي ناحق ايلمه قبر و قيامت واردي
ايلمه خلقه خيانت يارانان ئولمليدي
بيله رفتار ايله دنياده ، ئولنده ، ايشيدن
اوخوسون روحوه رحمت يارانان ئولمليدي
اجل ايلور عجله تا گله ، فرصت سال اله
يتشور موقع رحلت يارانان ئولمليدي
تانيدون اللهوي راز و نيازون كسمه
يله معبودي عبادت يارانان ئولمليدي
فرصتي فوت ايلمه ، يخما ئوزون هر قاپيا
ذلته ايلمه بيعت يارانان ئولمليدي
دوت حسينون اتگين ، قبر ائوين آباد ايلسون
اهلبيته ايله خدمت يارانان ئولمليدي
ای گنهکار آدینی سسله ئولن وقتینده
ایلسون لطف وکرامت یارانان ئولملیدی
عزت آختارسون اگربوشلاما ارباب اتگین
یوخدور اوندان صورا عزت یارانان ئولملیدی
نگران اولما حسین عشقی اورکده ئولسون
ایدر البته شفاعت یارانان ئولملیدی
ئولممش حضرت اربابین آدیلا باشوا
باغلا سربند شفاعت یارانان ئولملیدی
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.