مصمم اولدي لابدجنگه عباس ايلسون اقدام
اوزون ووردي سپاه كفره الده تيغ خون آشام
قويوب يوز قاچماقا اما هراسندن سپاه شام
فرار آسانترين يولدور جدل دشوار اولان يئرده
ابوالفضلون هراسندن بلا دشتي اولوب محشر
قويوب يوز قاچماقا ، سرباز و پرچمدار و سرلشگر
دگيبدور بير بيره نظم قوشون صفلر سينوب يكسر
سينار صف لر مسلم صف شكن صفدار اولان يئرده
هله قوللار بدندن دوشميوب اعضاسي سالم دور
هله اوخلانميوب مشگي ، عقاب اوستونده قايم دور
بير الده تيغ بير الده علم ، ميدانه عازم دور
گرك جنگه مجاهد عزم ائده وادار اولان يئرده
سالوب هر سمته آت ديلدن چكوب بير نعره تكبير
بير الده پرچم نصرت بير الده قان توكن شمشير
ادچولده اولمادي اشراره قاچماقدان صورا تدبير
فقط قاچماقدي چاره حمله دن آثار اولان يئرده
قاچان قاچدي قالانلار طعنه شمشيري نوش ائتدي
اوزون بعضي فراته آتدي غرق اولدي سودا گئتدي
خلاصه اول مهالكدن قاچانلار ايمنه يئتدي
امان قاچماقدا دور صحنه ، هلاكت بار اولان يئرده
ائله جنگ ائتدي شيرانه او شير جنگي شرزه
كه خوف مرگدن دوشدي قلوب لشگره لرزه
قلنجي اولدي اوت دشمن گياه بي خود و هرزه
مسلم خار و خس ائتمز تحمل نار اولان يئرده
سپاهه حمله ائتديقجه رجز انشا ء ائدور عباس
ديلنده ذكر يا حق حقدن استمداد ائدور عباس
قليج ويرديقجه ، حقي هر نفسده ياد ائدور عباس
كه ياد ائتماق حقي واجبدي حق انكار اولان يئرده
وفادن عاشق صادق گئچر بير گوز ايكي قولدان
اوخ اوستن وورسالار اوخ سالكه قالماز گئدن يولدان
خلاف ائتمز سلوكندا بلا گر ياغسا صاق ، صولدان
بلا سد ره اولماز ، سالكه عيار اولان يئرده
او چولده جنگ عباسي گورنلر وحشته دوشدي
قدم ميدانه هر كيم قويدي خا ك ذلته دوشدي
دلاور لر بو رفتاري گورنده حيرته دوشدي
بلي حيرت ائدر لشگر ، علي رفتار اولان يئرده
اوزون ووردي ، سپاهه يول فراته تيغ ايله آچدي
علم لر ياتدي صف لر سيندي لشگر خوفدان قاچدي
سس آفاقه دوشوب سقا فرات اوسته علم ساچدي
مسلم فتح اولار دريا بئله سردار اولان يئرده
فراته وارد اولجاق دولدوروب اولده سو مشگين
خيالندا ائدوب ترسيم او لحظه تشنه لر اشگين
سودان ايچموب اگر چه تشنه ليق تحريك ائدوب رشگين
نئجه سقا سو ايچسون تشنه لب قيزلار اولان يئرده
فراتون فتحي خرگاه ولاده قيزلارا چاتدي
سوسوزلق فكريني باشدان سوسوزلار شاد اولوب آتدي
فرح دريا سينه ، اصغر آناسي شوقدان باتدي
دئدي قالماز بالام تشنه بئله غمخوار اولان يئرده
تماشا قيل مواساته چيخوب لب تشنه دريادن
ائدوب نفسين ملامت گور نئجه فيض تولادن
بو اميده كه سوندورسون عطش سوزون احبادن
سو ايچموب غيرتندن ، قلزم ذخار اولان يئرده
مشيت اقتضاسندان قضا كسدي يولون افسوس
آپارسون خيمه گاهه مشگي سالم ائتد يلر مايوس
او چولده بيلمورم ، نولدي كه دشمن چالدي طبل و كوس
بساط عيشه دوندي رز مگه اشرار اولان يئرده
حسين بن علي دو درگه لطف و كرم شب خيز
خلوصيله بو شاهون درگهينده اول خدم شب خيز
بو درگه ده اولان اولسون گرك ثابت قدم شب خيز
گوز اوتسون اوزگه درگهدن بئله دربار اولان يئرده
مقام شعرده درك ايله بيل استاد دور (شاني )
حريم حرمتون ساخلا ، اونا شاگرد اول يعني
بو يئرده شعر ائدوب املا گوزل وجهيله پر معني
ندن يازدون بو اشعاري ائله اشعار اولان يئرده
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.