قربان کیمی ئوز قانینه غلطان بالام وای
قرآن یولوندا دینینه قربان بالام وای
لیلا آنون دل داغلیار تا ئولمیوب قان آغلیار
سن تک جوانه ای ناز دانه
عزم ایلدون حیدرکیمی کوی جهاده
یانّام سنون بو دردوه من فوق‌العاده
گیتدون عقاب اوسته اوغول گلدون عباده
سو ایچمیوب الده ئولن عطشان بالام وای
فانی جهانه عار اولا یکسر یالاندی
هانسی گناهه جام امیّدیم جالاندی
صَرصَراَسوب آرزی باغیم سولدی تالاندی
گیتدی فنایه لاله و ریحان بالام وای
بو آرزدیدیم باغ دلدن لاله دَرّم
بیر گون طویوندا ای وجاهتده مُکرّم
زیر قدوم نو عروسه لاله سَرّم
وای بختیمه سسلور آنون الان بالام وای
ای مرغک خوش منظر و شهپر سفیدیم
تار تِلون تک قطع اولوب تار امیدیم
سس ویر سسیم باتدی ایا زیبا شهیدیم
آغلار سنه هر صاحب وجدان بالام وای
عمریم سماسیندن سوزوب گیتدون زواله
قانیله پرده سالموسان سولموش جماله
هیچ بیلموسن اما ننون قالدی نه حاله
قبره گیدینجه ایلرم افغان بالام وای
قلبیم تلاطم ایلیور سینمده قالمور
سعی ایلورم صبر ایلیم آرامش آلمور
هی اوخشیوب هی آغلورام دردیم آزالمور
اون سگیز ایل هر دردیمه درمان بالام وای
احوالوه گوز یوخ دل سوزانیم آغلور
قلبیمده قان جوشه گَلور شریانیم آغلور
اوغلوم سنه هر جان دینده قانیم آغلور
هی آغلیوب هی سسلرم گریان، بالام وای
آی تک غروبی کیم سنه ئورگتدی اکبر
قانلی عباده پیکرون راحتدی اکبر
دنیا منه سنسیز بوگون ظلمتدی اکبر
قانلی جمالی چون مَه تابان بالام وای
هیچ لاله سن تک ای گوزل گُل پرپر اولماز
باشون کیمی عالَمده سینمش گوهر اولماز
دنیانی گزسون من کیمی هیچ مادر اولماز
حنجر انوبدور باشووه هاردان بالام وای
گرچه بو باشون یاره‌سی رمز ظفردی
قرآن الینده پیکر دینه سپردی
باش یارون اما باش دیمه شق القمردی
آغلار سنه منظومة کیهان بالام وای
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.