نقل ائدورلر کوفه ده مختار ائدن گونلر قیام
بی محابا قان توکنلردن آلوردی انتقام
حرمله دستگیر اولوب شاد اولدی یاران امام
گتدیلر دربار مختاره او پست و ارزلی
پسس دوشوب شهری چراغان ائتدی یاران علی
دادگاه انقلابه حرمله قویدی قدم
گوردی مختارین باشی اوسته اسور قرمز علم
وقت او وقت اولدی دل آچسون اعترافه متهم
وئردیلر فرصت دانشسون ائتدیگی طغیانیدن
باشلادی توضیح او ظالم ظلم بی پایانیدن
من دئدی عمروم بویی عالمده شهرت بازیدیم
لشگر کفرین ایچینده افسر ممتازیدیم
کربلا جنگینده استثنائی تیر اندازیدیم
دینیمی ساتدیم شریحین نشر اولان فتواسینه
خارجی ئولدورمقا گئتدیم بلا صحراسینه
یرمی مین درهم یغوب دفع بلیه ایلدیم
اون بشین اهل و عیالیمه هدیه ایلدیم
تا که بش مین درهمه اوچ اوخ تهیه ایلدیم
اسلحه سازان شهره رشوه وئردیم قهریله
اوخلاری اوچ شعبه ائتدی هم سوواردی زهریله
اولین پیکانیمه ائتدیم ابوالفضلی نشان
دومین تیریله ئولدی اصغر شیرین زبان
سومین اوخ سینه ی سلطانه دگدی آخدی قان
اوچ سه شعبه اوخ که آتدیم اوچ خلافیم وار منیم
ائتدیگیم جرمه مقرم اعترافیم وار منیم
بو سوزی مختار ائشیتدی آغلادی آوائیلن
دولدی مجلس یا ابوالفضل و حسینیم وائیلن
گوتدی عمامه باشیندان بانگ واویلائیلن
سویلدی بیر نوعی ئولدوررم سنی ای بد سیر
روز محشر حضرت زهرا منه احسن دیر
ای ستمگر حرمله آیا نقدری پستیسن
ایندیده گویا جنایت باده سیندن مستیسن
افتخارون وار که تیر انداز چیره دستیسن
یوخ سوزوم اقرار جرم ائتدون گناهون دانمادون
دی گوروم آخر نفسده اصغره هئچ یانمادون
شاه و سقا چوخ شهادت صحنه سی گورموشدولر
هر بیری دعوا گونی چوخ کافر ئولدورموشدولر
اصغره نه رحم ائدوب لشگر نه سو وئرمشدولر
رشته ی ظلمی عجب مقراض وجدان کسمه دی
اوخ نجه آتدون اونا ظالم الونده اسمه دی
سيد يوسف موسوي