ای لشگریمین سید وسالاری ابالفضل
ای قیزلاریمین غم گونی غمخواری ابالفضل
قالدون قوشون ایچره گوزیمون نوری یوباندون
اولما علی اکبر کیمی سنده اوتا یاندون
یا سوالیوه دوشمدی قیزلاردان اوتاندون
گراولماسا سو خیمیه گل باری ابالفضل
ای قیزلاریمین غم گونی غمخواری ابالفضل
سالما سوا خاطر خطره جانوی قارداش
ایفا ایله دون عهدوی پیمانوی قارداش
قویما نگران خیمه ده یارانوی قارداش
یوخدور ثمری گتمه سوا ساری ابالفضل
ای قیزلاریمین غم گونی غمخواری ابالفضل
اولدی هامی یاریم کمکیم یوخدی قالانیم
بیر تک سنه وار دور بو بیاباندا گمانیم
منده سنه تای تشنیه ام هم خسته دی جانیم
سایسیز قوشونون اولما گرفتاری ابالفضل
ای قیزلاریمین غم گونی غمخواری ابالفضل
تل اوسته چخیب علقمه ساری باخارام من
عطرون تانیرام عطروی یلدن آلارام من
تل اوسته سنی گوزلیوب اوردا قالارام من
ای ایللریمین مرد فداکاری ابالفضل
ای قیزلاریمین غم گونی غمخواری ابالفضل
گرمشکله دوشسون سویولوندا منی سسله
جانون خطره سالسالا اوندا منی سسله
دشمن دایانار ساق وسولوندا منی سسله
ای قارداشینون محرم اسراری ابالفضل
ای قیزلاریمین غم گونی غمخواری ابالفضل
سن اولسون اگر دردیمی سنسیز بیلن اولماز
گوزیاشیمی سندن سورا قارداش سیلن اولماز
حتی من اولنده باشیم اوسته گلن اولماز
یوخ حق یولونین بوردا طرفداری ابالفضل
ای قیزلاریمین غم گونی غمخواری ابالفضل
ایتدی حرم اهلین علی اکبر غمی مدهوش
اکبر غمینی اتمه میشم ایندی فراموش
اولما بوحرمخانه نین ای اولدوزی خاموش
گوزیاشلارینی ایتمه یوزه جاری ابالفضل
ای قیزلاریمین غم گونی غمخواری ابالفضل
چوخ غملی دی قارداشه امان ویرمیه دشمن
قارداش داغی قارداشه چتین دور بیلوسن سن
قارداش کیم اولا سن سنه قارداش دا اولام من
ای دشمن دینین گوزونون خاری ابالفضل
ای قیزلاریمین غم گونی غمخواری ابالفضل
گل قوی دیزیمین اوستونه بیر باشیوی دینجل
مندن سورا گیت جنگه گیدیم جنگه من اول
اول من اولوم قوی ، باشیمین اوستونه سن گل
مقتلده منه ایله پرستاری ابالفضل
ای قیزلاریمین غم گونی غمخواری ابالفضل
اول باشیمون اوستونده بویرده اولوم اسان
باغلا گوزوم اخر نفسیمده اوخی قران
زینب باجیمی قویما گلیب ایلیه افغان
اول قبریمین اولده کی زواری ابالفضل
ای قیزلاریمین غم گونی غمخواری ابالفضل
من گتمه لیم گول کیمی بوچولده سولانام
هم اهلیمین هم جان هوسین باشدان آتانام
اما بو بالا قیزلاریما چوخ نگرانام
سن اول بو یتیم قیزلاریمین یاری ابالفضل
ای قیزلاریمین غم گونی غمخواری ابالفضل
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.