لطمه وورورسان عملا مذهبه
شیطانا لعنت دیمه یوز مرتبه
مهره نماز اوسته ویرورسن فشار
شیخ کیمی آلنون اولا پینه دار
فخر ایدوسن سجده و طاعاتووه
صبح و مسا ذکرو عباداتووه
بیلمدون اول شیخ جبین پینه لر
ایلدیلر کرب و بلاده نه لر
یاری ظلامه شتاب ایتدیلر
خانه ایمانی خراب ایتدیلر
قهریله اللرده آغیر حربه لر
ویردیلا دین پیکرینه ضربه لر
گور نجه بو فرقه منجس دیلر
حنجر سلطانی سوسوز کسدیلر
یخدیلار آتدان یره سردارینی
اوخلادیلار طفل لبن خوارینی
راوی یازوبدور بو بویوک محنتی
تلیده گوردوم بیر اوجا قامتی
شدت غمدن اورگی یاره دی
مقتل و اخیام آرا آواره دی
بیر قانا باتمیش علم آلمیش اله
گاه قاچور خیمییه گه مقتله
حیدره بنذردی اونون صولتی
عرشی تحیرده قویوب غیرتی
شمریله مقتلده ایدوبدور ستیز
دوغرادی بارماقلارینی تیغ تیز
غیرته باخ اللری قان باغری قان
سسله دی ای رذل خدادن اوتان
محرم سبحانی یخوبسان یره
ناطق قرانی یخوبسان یره
ظلمیده طغیان ایلمه ای دنی
کعبه نی ویران ایلمه ای دنی
قلبینه بیر داغ چکوبسوز درین
گور نه حالا سالمیش عطش لبلرین
حلق که ایستور کسه خنجر اونی
طوف ایلیور روح پیمبر اونی
ایتدی او خاتون نقدر التماس
رحمه گله شمر ایده حقدن هراس
باخمادی اول فتنه و شر مظهری
ذبح ایلدی راس شه محشری
هلهله ناگه اوجالوب گویلره
غارته فرمان ویریلیب لشگره
سرعتیلن زینب والا مقام
دوشدی یولا ایلدی قصد خیام
گوردی خانم عترت شاه نجف
قمچیلر آلتدا اولاجاقلار تلف
جمع ایلدی باشینه اولدوزلاری
زیر پره آلدی سوسوز قیزلاری
ویردی سپر تک قاباقا قولارین
سد ایلدی قمچیلرین یولارین
ویردیلار اود شعله چکوب خیمه لر
قاچدی هره بیر طرفه دیده تر
خیرداجا بیر دختر شیرین زبان
آتلار ایاقینده ویریب تشنه جان
هانسی قیزی ایلدیلر دستگیر
سیلی اونی زندگی دن ایتدی سیر
تیره وتار اولدی هوا ناگهان
رخت عزا گییدی بلند آسمان
عرشه حزین سس اوجالوب خاکدن
اندی نبی لر یره افلاکدن
گوردوله سجاد قالوب خیمه ده
باعث ایجاد قالوب خیمه ده
لنگر نه طاق نفسدن دوشوب
حجت خلاق نفسدن دوشوب
اود بوریوب خیمه زر تارینی
تنگه سالوب سینه تبدارینی
زینب او حق مکتبینه عالمه
قویمادی نصرت یتیشه ظالمه
فاطمه دن ارثدی غیرت اونا
طفل دبستاندی شجاعت اونا
شهپر آچوب تیز پر عنقا کیمی
جانین آلوبدور اله زهرا کیمی
ثابت ایدوبدور بوسوزی اول نجیب
نصرمن الله وفتح القریب
آلدی مدد حیدر کراردن
عصرین امامین قوتاریب ناردن
شیعه گرک زینبه فخر ایلیه
همت و ایثارینه احسن دییه
صدر نشینان بهشت برین
سویلدیلر زینبه صد آفرین
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.