سلطان تشنه کام کرب و بلایه لبیک
کرب و بلایه دوشموش شمس الضحایه لبیک
شمس الضحا اوزونده قانلی حنایه لبیک
قانلی حنادن الوان صبح صفایه لبیک
صبح صفا لبینده گیزلین دعایه لبیک
اوچ گون قالان قوم اوسته باش سیز شهید عشقه
سیاره سیز، قمرسیز، شمس الفرید عشقه
قربان اولان مناده عید سعید عشقه
قالوا بلی نداسی، هل من مزید عشقه
منحور اولان بوغازدان، انی فدایه لبیک
اوچ شعبه اوخ سینه نده کنزالخفا آچاندا
عمامه سین باشیندان خیرالورا آچاندا
جنتده تشنه لعلین، باب الصفا آچاندا
محشر صفینده سقا، قانلی لوا آچاندا
بیر گؤز ایکی قاناتدان، کئچمیش همایه لبیک
وار کربلاده گیزلین، یئتمیش ایکی دفینه
یئددی فلک دن اعظم، یئتمیش ایکی خزینه
اون یئددی اولدوزیلان، بیر گون بیر آی قرینه
ای ساحل نجاته نایل اولان سفینه
مشکات معرفتده نورالهدایه لبیک
ای کعبه دن مقدس، وی سجده دن منور
جبریل اؤپن ایاغین، معراج ائدنده بی سر
ای صورتینده آیدین، حسن ازل مصور
ای لبلرینده گیزلین، کوثر فکیف کوثر
دریا لبیندن اؤتری گلمیش ندایه لبیک
اوخلار شرفله ننده، تقبیل پیکریندن
داشلار اولاندا سیراب یاقوت لبلریندن
مرجان کیمی سوزنده، قان زلف اکبریندن
اوچ شعبه اوخ اؤپنده حلقوم اصغریندن
قونداقدا آلتی آیلیق، دیل سیز فدایه لبیک
یا منتهی المعالی، یا مقصد المساعی
داشلار انیب اؤپنده، آلنیندا کی شعاعی
قان ایچره باشلادین سن مستانه بیر سماعی
مست ائتدی ممکناتی، اول سیررین استماعی
آغلاتدی واجباتی گلدی صدایه لبیک
قانلی گؤزون آخاندا، والنجم اذا هوادیر
والصبح اذا تنفس، حسنینده کی صفادیر
قان پرده سی اوزونده، واللیل اذا سجادیر
والشمس و الضحیها، آلنیندا کی ضیادیر
نی مشرقینده طالع، شمس الضحایه لبیک
گودالیدن نی اوسته، نی دن تنوره گلدین
گه طشت زرده گاهی، کولده ظهوره گلدین
یحیانی دیره چکدین، بزم حضوره گلدین
نی دن تجلی ائتدین، میقات طوره گلدین
وئردین بیان کلیمه، گلدی نوایه لبیک
دوغراندی شاهبازین، اوخلاندی عندلیبین
عیسا اولوب مریدین، گودال اولوب صلیبین
قوملار اولوب منامین، داشلار اولوب طبیبین
یئردن چاتاندا عرشه، فریاد من یجیبین
سسلندی کاشف السوء، چاتدیم هارایه لبیک
شمشیر ائدنده تفسیر، قرآنی آیه آیه
پابوس اولاندا زنجیر، احفاد مصطفایه
زینب دئینده تکبیر، زهرا گلیب نوایه
ائتدی نجف ده تأثیر، سلطان اولیایه
سسلندی حسبنا الله، صبر ائت بلایه لبیک
هم نیزه ووردی هم داش، اشرار شام و کوفه
مطروح فی الترابه، مضروب بالسیوفه
آی تک باتیب محاقه، گون تک دوشوب کسوفه
جسمینده مین قیزیل گول، بیردن آچیب شکوفه
توپراق اولوب معطر، گلدی ثنایه لبیک
توپراق اؤپوب قدومین، فر شهنشهیندن
کبریت احمر اولدی، اکسیر فرهیندن
جام شهادت آلدین، ساق یداللهیندن
اسرار قاب قوسین اسرا بعبدهیدن(بعبده دن)
معراج ائدنده تاپدین، عرش جیدایه لبیک
مین اوچ یوز اللی یاره، سینه نده نقشه سالدی
لرزه مقام صبرین، ارکان عرشه سالدی
سربسته بیر معما، نه طاقه رعشه سالدی
یعنی که صاحب العرش، چون سایه فرشه سالدی
سس دولدی ماسوادن، قانلی منایه لبیک
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.