گل اطاقی بیرخلوت ایلیاخ
تنگه گلدی سینم عم اوغلی جان
آغلیاخ حسینیله زینبه
بیردویونجاباهم عم اوغلی جان
دوقوز ئیلدی بو ائوده لطفوین
سایه سینده من دالدالانمشام
جان دیوب سنه جان ائشیتمیشم
سن یانان مصیبتده یانمشام
هر گجه حسینیم سو ایستیوب
فضّه دن قاباق من اویانمشام
یوز گوزین ئوپوب استراحتین
ائتمیشم فراهم عم اوغلی جان
خاطر شریفون بو سوزلرون
خاطرینه ناراحت اولماسون
زینبون ئوزوم زلفنی یودوم
فضّیه دئدیم زحمت اولماسون
ئوز وظیفمه ائتمیشم عمل
خدمتیم سنه منّت اولماسون
بو دیله گلن سوزلریمده وار
آیری سرّ مُبهم عم اوغلی جان
نه بو ائوده کی خدمته گوره
جان وئرن زمان اُجرت ایستورم
نه حسین نه کلثوم و زینبون
اَمدیگی صوده قیمت ایستورم
بو دوشومده کی قان اولان صودین
خاطرینه حِلّیت ایستورم
سن منی حلال ایله تا ائدیم
جان ، نثارِ مَقدم عم اوغلی جان
دردمند اوشاقلاریمی چاغور
شرح درد هجران ائدیم گئدیم
صبری تاپشوروم غم چکنلره
درد الیله درمانن ائدیم گئدیم
وئر حسینیمی بیرده سینمه
جان حسینه قربان ائدیم گئدیم
واضح اولسون آخر وداعیده
ابتدای ماتم عم اوغلی جان
گون باتاندا سعی ایله بو ائوه
ظلمت الدّجا سایه سالماسون
آخشام اولجاقین بو یتیملر
خاطرین غبار غم آلماسون
سن ئوزون چراغ یاندیر هر گجه
زینبیم قرانلوقدا قالماسون
زینب اوخشاسا منده آغلارام
قبر ایچینده هر دم عم اوغلی جان
قلبی تز سِنار لحظه اُلفتین
بیر نفر کسنده حسینیلن
قویما سنده بیر لحظه آیریلا
قارداشی حسن ده حسینیلن
بیر زمان هله آیری گزمیون
مجتباده سن ده حسینیلن
سن یتیملر دادخواهی سن
ای پناه عالم عم اوغلی جان
دست چشم بند قضائلین
سن که یانمالیدون فراقیمه
کاش اوگون ئولیدیم که وردیلار
یاره قلب پر اشتیاقیمه
آستانه ده دفن ائدوب منی
محسنی وئریدون قوجاقیمه
قبر اولیدی دیلسیز شهیدیمه
بو یارالی سینم عم اوغلی جان
یاندی ظلم ثانیدن ای عجب
آستانه ی وحی لَم یَزل
باغلادی سنون قوللا رون فلک
دشمنون منه قویمادی محل
قائد شریعت عیالینه
ئوز ائوینده آخر آچلدی ال
بوسه گاه جبریله وردیلار
پشت پای محکم عم اوغلی جان
دفن و کفنیمون قیل تدارکین
نصف شبده وئر غسلیمی ئوزون
کوینگیم چخارتما یارالیام
فاش اولونماسون سرّی بو سوزون
آی اگر ایشیق سالسا سینمه
ناله وی بلند ائتمه یوم گوزون
بیرده بو گچن حادثاتی سن
ایلمه مجسّم عم اوغلی جان
Davood