اشعار مذهبی ترکی و فارسی

اُلورم خرابه ده یادینه منی سالموری بابام عمّه جان

منه دور ایاقه علاج ایله یاتا بُلمورم آجام عمّه جان

بو قدر مصیبت و دردیله دیری قالموشام ندن اُلمورم

منی آل قوجاقیوه عمّه جان قوریدور یریم یاتا بُلمورم

قولومی دوشاخه چوخ اینجیدور یانوب آغلورام اودی گُلمورم

نه روا بو خورداجا سنّیله بیله اوتدا من یانام عمّه جان

من اگر اَلم دوتاجاقدی کیم بو خرابه شامیده یاسیمی

قیریلوب ایلیم، گیدوب عزّتیم، داغیدوب زمانه اساسیمی

بابام ایمدی کاش گَلوب گوره منیم عمّه کهنه لباسیمی

هامی سرگذشتیمی بیر به بیر اونا منده آندورام عمّه جان

من او بلبلم که خزان اولوب سارالوبدی گُللریم آغلارام

منی گورماقا بو خرابیه نیه گَلمور اکبریم آغلارام

دوشوری خیالیمه هر زمان او گیچن که گونلریم آغلارام

گرک آغلیام بو خرابه ده نقدر که من وارام عمّه جان

بو یانیقلی قلبیمی ایلیوب شرر مصیبت و غم کباب

نجه صبر ایدوم بو مصیبته که کسوبدی بوینومی بو طناب

نجه گور یارالانوب ایپ یِری داخی قالمیوب اوره گیمده تاب

بو ایپی تاپولموری بیر آچان که چوخ آغروری یارام عمّه جان

منه شمر قمچی ووروب ز بس باشیم آغروری نجه من دوزوم

وورولوب عذاریمه سیلی چوخ اودور علّتی گویَروب یوزوم

همی سیلی یرلری آغروری همی خورداجا اوشاقام اوزوم

بدنیمده قمچی یرین گورر بو غمه یانار آنام عمّه جان

هامی رنگ درد و مصیبته خُم محنت ایچره بویانموشام

نقدر ووروب منی ساربان دوزوب اول جفایه دایانموشام

بو اَیاقلاریما تیکان باتوب اوقدر پیاده دولانموشام

بو قابار ایاقلارا معجریم اولا کاش باغلیام عمّه جان

بو خرابه شامیده یوز ویروب بُلوسن اوزون که نلر منه

هامی رنج و غصّه دن ایلیوب ولی بیر مصیبت اثر منه

گَلی شام قیزلاری طعن ایدر بو خرابه یرده گُلر منه

یِری وار بو محنته آغلیام نقدر که من ساقام عمّه جان

ایلیوبدی کعبیه گر سفر بابام عمّه جان ندور علّتی

قوری یرده بیزلره یر ویروب بو خرابه شام جماعتی

گورولوبدی کافره بیر نفر که گوره روا بیله ذلّتی

یانار اَرمنی گوره گر منی نه روا بیله قالام عمّه جان

اولی چوخ حسینی اگرچه سوز ولی سوزلرین گوزیدور بو سوز

سُوَر اوخشاماقلیقی فاطمه او سُوَن سوزین اوزیدور بو سوز

بو قدر که وار اثری بونون یقین اوزینون سوزیدور بو سوز

اُلورم خرابه ده یادینه منی سالموری بابام عمّه جان

منبع:وبلاگ کوثر(انتظاری)