اشعار مذهبی ترکی و فارسی

قلبیمه جلوه لنوبدی ایکی نور ازلی

یازا تا شمه ای،از مطلب ناب و گوزلی

بیر حکایت اولاجاقدی قلمین، ماحصلی

محضر فاطمه ده،بیرگون اوتورموشدی علی

گرمیدی هر ایکیسی،عشقیله بیر گفتاره

عرشیان سسلنور احسن،بو ایکی دلداره

یوز دوتوب حیدره،زهرا؛ئورگی دینجلدی

سویلدی یا علی !،رتبم،هامیدان افضلدی

خانیمون بو سوزی مولا علیه،خوش گلدی

دیدی،زهرا ! منیلن،دین نبی ، اکملدی

افتخاریمدی که وار منده ده،بو عالی مقام

مسلمینه ایکی دنیاده منم، اول امام

فاطمه عشقیله مجذوبیدی ئوز دلبرینه

ناگهان بحث تفاخردی دوشوب دیللرینه

علت خلقت عالم،بویوروب همسرینه

دور عم اوغلی،گیداق الآن،بابامون محضرینه

تا گوراخ منزلت و رتبه ده کیم والادی؟

سر ، در ،جنته چون،حکیدی زهرا آدی

دیدی لبیک؛علی،فاطمه ی، خوش بینه

آرادا عشق و محبت واریدی،دیرینه

ایکیسی لنگریدی،ارض و سما و دینه

سوزلری رد و بدل اولدی او دم،بی کینه

اولدولار طبق توافق،ایکی دلبر راضی

تا اولا،بو آرادا،شخص پیمبر قاضی

پدر خاکیله، هم صحبتیدی،مادر آب

مات اولوبدی بو ایشه،عرشیده مهر و مهتاب

یتیشوبلر قاپیا،ایلدیلر ،دق الباب

تز سلام ائتدیله پیغمبره،طبق آداب

آلدی آغوشه محبتله پیمبر،علینی

ئوپدی شوقیله آتا،ئوز قیزینن تز الینی

دیدی خوش گلمیسوز ای، علت قلب شادیم

سیزیلن تاپدی صفا،روحیله،هم، بنیادیم

افتخاریمدی قیزیم ! اولدی علی دامادیم

سیزه خاطر بو ائوه، اولدی ملکلر خادم

تا که گونده،حسن اول، نور دوعینی گوره لر

سیزیلن،زینب و کلثوم و حسینی گوره لر

دیدی زهرا : آتا ؛عالمده گرک، سرور اولاز

یار جبریل امین ، امته پیغمبر اولاز

عالم و آدمه بو دهریده ، تاج سر اولاز

گلمیشوق محضریزه،تا آرادا ، داور اولاز

علوی گلشنینه، وئردی طراوت، نفسیز

بیز دییاخ فخریمیزی ، سیز اونی تایید ائده سیز

باشلانوب اول آرادا، مجلس شور نبوی

عشقیلن دوره لییوب ، حیدر والانسبی

دورت بالا،بیر آنا،عرش اهلی باخور،بیرده نبی

هامی استاد سخن ، مبحث محفل ، ادبی

هر کلامی که دییولسه ، اونا،نمره ساییلور

هر سوزی که دییه لر ، لوحه ی عرشه یازیلور

احترامی که علیده واریدی، زهرایه

یوز دوتوب همسرینه،شافعه ی عقبایه

دیدی اول بویورون ، فخریزی، سیز، طاهایه

سیزه خاطر منی الله گتیروب دنیایه

اولماسیدوز سیز اگر ، قطعا ،علیده ، یوخودی

قبل صحبتده علی، سوره ی کوثر اوخودی

فاطمه سوزلرینی، باشلادی، بسم اللهیلن

دورت ستاره،یره ناز ایلوری، مهر و مهیلن

قطعی تصمیم اولاجاق ، شخص رسول اللهیلن

بویوروب فاطمه : ئوز فخرینی ، شاهنشهیلن

یا علی ، ام حسن ، ام حسین ، زهرایم

زینبینه آنیام ، نور دل طاهایم

آنیما ، یازدی ،خداوند ئوزی ، بو تقدیری

خود قرآندا گلوب، کوثرینون تفسیری

انجم و نه فلکه ، وار، آدیمون تاثیری

کهکشانی که اولوب، مقصد راه شیری

اوردادا ،اولسا بشر ، دردینه درمان ویره رم

ابر و باد و مه و خورشیده ده، فرمان ویره رم

گر بشر دلخوش اولا ، خالقینون نعمتینه

گوی اگر فخر ائلییه، مهر و مهین عزتینه

یر اگر ناز ائلییه ، یتمیش ایکی ملتینه

وئروب الله بولاری ، فاطمه نون دولتینه

منه خاطر یارادوب الله ایکی دنیانی

هم عم اوغلی سیزی، همده بو آتام طاهانی

حظ ائدور ،گویده ملکلر ، بو گوزل رفتاره

مرحبا سویلوری پیغمبر ایکی ، دلداره

گهی زهرایه باخور ، فخر ائلییور گفتاره

گاهی مولا علیه ، شاه ملک درباره

فاطمه آغزین آچاندا ، در و گوهر ،توکولور

عرشیدن ، فرشه ، تماشایه ، پیمبر توکولور

فاطمه گه دایانور، سوزلرینی ، گه دییوری

باشینا گون دولانور ، احسن اونا ، مه دییوری

هم پیمبر دییور احسن اونا، هم ،شه دییوری

ناگهان ، گوردوله ،الله ، ئوزی به به دییوری

خالق ارض و سمایم ، سوزوم اولسون علنی

عشق ائلیردیم ، یارادان، لحظه ده من فاطمه نی

گلدی مولا دیله، فرمایش ائدوب من، علیم

نور حقیله ازلدن، من ئوزوم ، منجلییم

ظلمت لیلیده ، الله یولونون ، مشعلییم

خود پیغمبره من، هم وصیم،هم ،ولیم

بوی قرآن نبی،واردی، تن و جامه مده

سنون آدین یازیلوبدی، بو کبین نامه مده

گجه گوندوز چاغیران،عشقیله،معبودی منم

بخشش شون، آیه ی قرآنیده ،مقصودی منم

غزوده شاد ائلیین،احمد ،محمودی منم

اللهین ئوز ائوینون ، کعبه ده مولودی منم

گجه نی ،گوندوز ائلر،فاطمه جان،بیر،نگهیم

شاکرم، بیت خدا ، اولدی منیم، زادگهیم

من بلکده یدیم، آنام ،بیر گونی دوشدی خطره

شیر ائدوب حمله اونا، قالمیشیدی ، دردسره

تا آنام گوردی گیدور ، گلشن عمری هدره

قویمادیم، شیری که،صدمه ویرا ،نور بصره

تا بیله عالم و آدم، اسدالله ،منم

قدرت الله منم ، لندیده اژدر بولنم

جانشین ختم رسولانه اولان، بولحسنم

اول و دومینی ،خوار ائلیین شخص،او،منم

مرحب و عبدوودین ، نسل پلیدین کسنم

اولسا مین قلعه اگر، من گنه خیبرشکنم

باغلاسام آنیما من ، گر بو ساری دستمالی

دشمنین صفلرینی، قیتره رم،دالدالی

بحثیده ، فاطمه نون،قلبینه غم دولمازدی

ریشه دن ، مهر و وفا رشته سینی،یولمازدی

دیدی خیبر قاپوسین، گر چه، او ، اللر ، قازدی!!

دیمه سیدون، اگه ،(یافاطمه) ، فتح اولمازدی

مخزن سر"، الاهم،دیدیم  آگاه اولاسان

منه خاطر ، یارادوب حق، که یدالله اولاسان

گلدی پیغمبر خاتم دیله، سسلندی قیزیم

سیز گلنده بو ائوه، واللهی،گلشندی قیزیم

بالالارین ،هم اتی، هم ، قانی،منده ندی،قیزیم

احسن و به به،علی،شاءنینه،دور،سن ،دی،قیزیم

بویوروب فاطمه احسن، علی اعلایه

حقدن نازل اولوب،وحی او زمان،طاهایه

یازمورام من او حدیثی که اولوب،شرحی کسا

جریانین ، بیلوری، جزء به جزء ،اهل ولا

او عبا آلتدا ، نلر گوردی او گون ، آل عبا

سوزومون آخرینه اهل سخن ویرسه بها

ناگهان دوردی حسین،آلدی اجازه بابادان

او شیرین دیل بالا، خواهش ائلییوبدی،آنادان

آنا بیر گون اولاجاق، آه و نوایه گلسن

نینوا آدلی چوله، بیر گون عزایه گلسن

سینمون، یاره سینی، گورسن،هرایه گلسن

یاسیمی دوتماقا ،سن، کربوبلایه گلسن

ایاقیننان،ئوپورم ، تا که الان دینجله سن

قول ویر،سن منه، عباسیم ئولنده گله سن

الغرض گلدی خانیم،گوردی او گون عباسی

مرکب اوسته دایانوب ، کربوبلا سقاسی

رزمگهده پوزولوب،قاف شرف عنقاسی

قول دوشوب،باشی سینوب،پرپراولوب اعضاسی

سسلدی،گل سینه مون،اوستونه آهسته،بالام

قول، ویردیم ، من حسینه ، سنی آغوشه آلام

گوردی عباس،خانیمنان،بو ایشی ارزنده

دیدی ،فرزندیوه نوکردی ازلدن بنده

قان دولوب گوزلریمه، ایندی توان یوخ منده

اولموشام، خرداجا قیزلاردان آنا،شرمنده

سایه ی چادریوه، ویرسن اجازه، سیخیلام!!!

ادب حکم ایلوری،آتدان ، یوزی اوسته یخیلام