اشعار مذهبی ترکی و فارسی

پیش چشمیمده یئنه غملی قضایا گؤرونور

قطره ی فکریم آرا غم زده دریا گؤرونور

جسم و روحیم داریخیب غملی سراپا گؤرونور

چشم ذهنیمده مصیبت زده صحرا گؤرونور

لطف حقّ اولسا اگر ؛ خامه توانا گؤرونور

غملی بیر قافله یثربدن اِئدوب ترکِ وطن

طیِّ راه ایلوری چؤخ عزّتیلن چول لردن

ایستیور مکّه نی گَر قؤیسالار ائتسون مسکن

حیف اولا قؤیمادی قالسون او مکاندا دشمن

مسکن اُؤل قافلَه یَه کَرب و مُعَلاّ گؤرونور

مکّه نی ترک  ائلیوبدور هله صحرانی گزور

مکّه نون اؤغلی ؛ اوزی کوه و بیابانی گزور

عاشقِ حَقدی رضای حقِ سبحانی گزور

پاک جان لار دولانور چول لری جانانی گزور

هامی دل باخته ی خالقِ يكتا گؤرونور

گورمیوب گورمیه جک مثل لَرین چشم فلک

گلشن حسن ده رخسارلَرین فکر ائله تک

رخِ زیبالرینه غبطه ائدَر مهر و ملک

بیر اوجا بویلی جوان اَنلی آلین ؛ اَنلی کورک

هَم عَلَم صاحبی ؛ هَم قیزلارا سقّا گؤرونور

کیم سو ایستَر یتیرَرآناً او دریایِ کَرَم

ائلیَر یؤل اوزونی خدمتِ اطفالِ حَرَم

ضمنِ آنیکه دوتوب اَلده حسینینه عَلَم

هَر نَه اَمر ایله سه یؤلّلاردا شهنشاه اُمَم

او گؤزل قارداشی آماده ی اِجرا گؤرونور

خدمت اِيلور شَهِ دينون حَرَم آهولرينه

قؤیمیور چهره لَرینده اَثَرِ غَم گورينه

یاناسان دور زمان قلبیم اَلولاندی گینه

زینب ایستور ائله که محمله یوللاردا مینه

تِئز رکابینده ابوالفضل مهیّا گؤرونور

واردی اول قافله ده بیر نچه نورسته جوان

ماهیلن ؛ مهره گوزل چهره لری طعنه ویران

فخر ائدَر یر اولار اوستونده قدم آتدوقیجان

گؤرمیوب گؤرمیه جک تایلارینی چشم زمان

او گؤزل لیکده یِئر اوسته بشر حاشا گؤرونور

ليلي نون بَسلَديگي اكبر فرزانه خصال

هاردا يوسفده اولار اوندا اولان حسن و جمال

پاك دل ؛ پاك روش ؛ گوهر درياي كمال

گردش چرخ گؤره مثليني هيهات و محال

نَفَسینده دمِ جان بخشِ مَسیحا گؤرونور

قاسمِ ابنِ الحَسَن هَر دَم یاپیشور اَکبر اَلین

سیر ائدوللّر ایکی سی دور و بَرین قافِلَه نین

جلب ائدوللّر او جوان لار آنالارون نَظَرین

گورسه هرکیم او عم اوغلانلارینون بو عَمَلین

اوزی یاددّان چیخاجاق مَحو تماشا گؤرونور

وار همان قافله ایچره بالاجا بیر سود اَمَر

آناسی باغرینا باسمیش اونی چوخ  فخر ائلیَر

بالانون یؤل اوزونی لای لایین آهسته دِئیَر

هَر زمان سود اَمَرینه آنا سو ایسته سه گر

اَلده سو جامی بالا قیزلار هویدا گؤرونور

حاصل اول قافله دشت غمی اُسکان ائلدی

عشق موساسینه حق طوری نمایان ائلدی

اوجا بؤی قارداشینا شَه بِئله اعلان ائلدی

قارداش ؛ الله بیزه اؤز لطفونی ارزان ائلدی

منه بو دشت بلا جَنَّتُ الاَعْلیا گؤرونور

قورولوب خیمه سرالر هامی تاپدی اُسکان

اَصغریلَن آناسی اِیلدی بیر خیمه مکان

یودولار یوز گؤزونی شرحینه یؤخ جای بیان

شرحی نیلور اؤ مسائل که مُسَلَّمدور عیان

هر گئچَن گون دالیسجاق یئنه فردا گؤرونور

گِچدی بیر نچّه گون اولدی آیین آلتمجی گونی

باتدی گون گؤگده آیین چهره سی غملی گورونی

باسوب آغوشینه اصغر آناسی اوز گُلونی

گاه اَلیندَن اُؤپوری گاه او طفلین یوزونی

دِئیور: الله بو بالام مَنْعِ مِنَ الْماء گؤرونور

بیر نِئچه گون گئچوب ؛ اؤلدی دهم ماه عزا

کربلانون چولی؛یای فصلیدی؛چؤخ ایستی هوا

آناسی اصغره باخدوقجا ائدور آه و نوا

دیور: اوغلوم ؛ وئرَرَم جانیمی بیر جُرعه سووا

سو بو چؤلده چؤخ آغیر قیمته گویا گؤرونور

ظهر وقتیدی گَلوب خیمه یَه شاه شهدا

باجی سی زینبه فرمایش ائدوب میر هُدیا

اصغری آل آناسیندان گَتور ای کان وفا

آپاروم گؤرسون او عطشان بالانی قوم دغا

آدی طومار شهادتده اؤنوندا گؤرونور

گلدی زینب گوروب آغلور اَلی قوینوندا رباب

گورَنون قلبینی ایلور خانم آهیله کباب

توکدی رخساره سرشکین ائلیَه بیلمَدی تاب

آغلیا آغلیا ائتدی او خانم بیله خطاب

اصغرین حالی عطشدن نئجه آیا گؤرونور؟

وئر او عطشان بالانی ؛ قارداشیم ایستور آپارا

راضی اولمور که بالون بوندان اضافه سارالا

بلکه دلسیز بالیا قوم عدودن سو آلا

ایچسه سو شاید او لب تشنه بالون زنده قالا

یر یوزونده بئله عطشان بالا هاردا گؤرونور ؟

عرض ائدوب زینبه اصغر آناسی قلبیده شور

اصغرین رنگی خانم لحظه به لحظه سارالور

آلتی آیلیق بالامون ناله سی عرشه اوجالور

بِشیگین ایچره سالان وقتده عطشدن چوبالور

سودان آیری ائله بیل ماهیِ دریا گؤرونور

آغلا اصغر آدینا (( جعفری )) هر شام و سحر

بیلوسن باب الحوائجدی بو خوردا سود اَمَر

هر نه دردون اولا دینَن اوزی درمان ائلیر

یازدیقون شعره توجّه ائله سه لطفیله گر

دردوَه اؤندا سنون یاخشی مُداوا گؤرونور