ای شیعه حسینون گینه باشلاندی عزاسی
بو غمده توکر گوزیاشی رخساره آناسی
عشق اهلی گئییب قاره اورکلرده الم وار
آغلیر هامی گوز یاشی توکور محنت و غم وار
هر یئرده غم آثاریدی بیر قاره علم وار
وار علتی یاغمور کیمی غم اوسته یاغیر غم
ذی‌حجه چیخیب تازه‌لنیب ماه محرم
بو غمده حسینی‌لرین هر آن گوزو آغلار
دیللرده حسین وای اولو هردم سوزو آغلار
باشیندا قارا حضرت زهرا اوزو آغلار
جنتده قوروب اوغلونا بیر مجلس ماتم
گوز یاشی توکر حضرت پیغمبر خاتم
بو آی دوشوب ای شیعه حسین باشی بلایه
بو آی یئری وار کون و مکان گلسه نوایه
قوناق چاغیریبلار او شهی کرب و بلایه
چوخ نامه یازیب کوفه‌لیلر دعوت ائدیبلر
قوناق چاغیرانلار نئجه گور حرمت ائدیبلر
ازل یوزونه سو یولونو باغلادی اعدا
سولدو سوسوزوندان سارالیب گولشن طاها
بولبول کیمی گلدی بالالار نالیه اما
موج ائتدی فراتین سویو صحرالره آخدی
خیردا بالالار آغلادی حسرت گوزو باخدی
اسدیریدی سموم ستمی لشکر کینه
یاندی سوسوزوندان گل گلزار مدینه
بنز‌ردی ساری بیر گوله رخسار سکینه
اوخشاردی علی اصغره دیلده سوزو ای وای
آغلاردی دییردی سود امر قارداشا لای لای
نه تک سو یولون باغلادیلار فرقه عدوان
اوچ گون دئمیرم اهل حرم قالدیلا عطشان
اما دئییر‌م وئردی حسین اکبری قربان
دوغراندی او صحراده سوسوز مظهر طاها
وار حقی توکه گوز یاشینی قبریده لیلا
عباسیده یوز قویدو فراته سو گتیرسین
لب تشنه‌لرین زخم دلین بلکه بیتیرسین
بیر مشک سو، قوروموش لب اطفاله یئتیرسین
سو وئرمه دی شام اهلی گوزی اشکیله دولدی
اوخلاندی سو مشکی ایکی قوللار قلم اولدی
بیر یاره دگیب اولمادی یاراسی قیامه
آتدان نئجه دوشدی یازا شرم ائیلیری خامه
توکدی گوزونون یاشینی اوز دوتدی خیامه
عرض ائیله دی قان ائتدیله گوز یاشیمی قارداش
تئز گل کسیر اون یئددی نفر باشیمی قارداش
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.