ییخیلیب دینین ائوی رحلت ائدیب ختم رسل
چیرپیلیب دین قاپیسی حضرت زهرا باشینا
سقط اولوب محسنی ، زهرا اوزوده اولدی شهید
کول الندی او زاماندان بری دنیا باشینا
کربلا فاجعه سی بذرین اکیب باشلاندی
تا قیامت نه قوپا زینب کبری باشینا
مدعی اولمادی فرمان غدیره تسلیم
گور نه طوفان گتیریب امّت طه باشینا
مشورت امر الهیده اولور می؟ هیهات!
چکدیلر جبریله مولانی دا شورا باشینا
حضرت فاطمه‌نین قبری ده مهجور اولدی
چادر عصمتینی سالدی ثریّا باشینا
امّت اولمازسا امامتده اولار خانه نشین
دولانار کعبه ده گئتدیکجه کیلیسا باشینا
بو اولان ایشدی کی آخشام چاغی، آللاه چوبانی
چولده، آللاه داوارین بوشلایا بی جا باشینا ؟
امّتین اکثری مصداق «لقد حقّ القول»
او حواری ییغیشانمازدی مسیحا باشینا
مسلمین دورد نفری مومن اولوب سلمان تک
یوسفین عشقی دوشر دیبده زلیخا باشینا
شهریار، گلدی حسینین سسی، عاشوراسی
تا دوشه عشق شهادت دل شیدا باشینا
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.