نفس عشقیمی من ساتمامشام سیم و زره
اوخیاندا کرم دیلبری آللام نظره
نوحمین بوردا گریزین چکییم صودامره
ناله سینن هامنون طاقتین آلدی بوبالا
قرمزی غنچه کیمین سولدی سارالدی‌بوبالا
فلک ایلردی عجب تیره مدارینده شتاب
عصمت اولدوزلارن، اشرار ائلدی خانه خراب
توزلی بیر خیمه ده، بیر اصغریدی بیرده رباب
لحظه لحظه بالانن تنگه دوشردی نفسی
عطش آرامینی آلمشدی، یورولموشدی سسی
الله عالمدی نه بحرانه دوشوب اهل حرم
دوندرردی کوله پروانه لری آتش غم
ساقی خیمه لرون قوللاری اولموشدی قلم
زندگیدن شهدا سروری یومموشدی گوزون
نهرین اوستن قییدنن چوخ ایتیرمیشدی اوزون
تنگ اولوب گوردی زمان پادشه صدره مکان
سسلیوب غملی ربابی ددی آی درده نشان
سنی غملر یوروب اصغرده اولوبدی یاری جان
نه سنون واردی بوچولده غموه چاره روباب
ن منیم وار کومگیم قالمشام اواره روباب
همدمیم سن بیلورم روح سرافرازون وار
حقه دل باغلاماغا رتبه ی ممتازون وار
خیمه ده بیر قره گوز خیرداجا سربازون وار
سنده یار اول منه احیای دل و دین الییک
دلبره غنچا ساتاخ آل وری شیرین الییک
ثابت ایله منه سن تابع فرمانلوغووی
اوز بوگون عاطفه دن دست به دامانلوغووی
سنده لیلا کیمی فورا بزه قوربانلوغووی
حقلیدی هر ننه اولادی خطردن قوریا
بوغازن اوپمگی قالسون قییدنن سوریا
بیلوسن من ره معبودیده قانه باتانام
عشق جانانه گوره عالمی گوزدن آتانام
ایستورم یار گوره من نجه گوهر ساتانام
وقت هجران یتیشیب نازیله دیندیر بالووی
ایستورم گول آپارام یاره گییندیر بالووی
بوگولون گورملی بیر ساتماغی وار آلماغی وار
اللرین قونداقا باغلا ال ایاخ چالماقی وار
دلبرین امرینی تز قویدی روباب اجرایه
صودامر الده توسل ایلدی‌زهرایه
عاشقانه گولی تقدیم ایلدی مولایه
قورخورام سویلدی کی باعث اولام گوز یاشوا
یوخسا چینونن اوپردیم دولاناردم باشوا
ایستورم فیض آپارام منده آقا معنادن
عشقه سهمیّه تاپام صحنه ی عاشورادن
صبریده باور ایله کم دگولم لیلادن
چمن عشقیده گوللرده سنوندور مولا
من کنیزم سنه اصغرده سنوندور مولا
یازمشام بو سوزی من دفتر پیمانه آقا
ویرمرم بیر توکووی مین دیله مین جانه آقا
ناقص عاشیقدی کوله دونمسه پروانه آقا
آل آپار اختر اقبالیم الونن آخسون
قوی ایاقونن اوپوم عشقیمه زینب باخسون
بوردا سن خیمه قوراننان من اورک داغلامشام
اصغرین حالینه باخدیخجا سنه آغلامشام
امرووه تابع اولوب اللرینی باغلامشام
آل آپار بوگولی سن رونقه چاتدیر چمنی
بالام اینجیتسه سنی یولدا حلال ایله منی
جلوه ی عشق خدا ائتدی او صحراده ظهور
یولا توشدی ایکی سرمست گلوب نالیه حور
بیریسی سوره ی کوثر بیریسی آیه ی نور
گوردولر محظر جانانه حسین جان گتیرور
بوشدی میخانه سی ساقی قوزی قوربان گتیرور
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.