ای شهنشاه خراسان یاعلی موسی الرضا

ای شهنشاه خراسان یاعلی موسی الرضا

دین اسلامه نگهبان یاعلی موسی الرضا

◀️ متقی تبریزی 

ای یاتان باب الحوائج دلبری ایرانیده

جودو بذلون ثبت اولوبدور شعریده دیوانیده

چوخلاری حاجت الوب بو درگه درمانیده

درد بی درمانه درمان یا علی موسی الرضا 

◀️ شایان ارومیه ای 

جود بیر قطره ولی مولا سن اقیانوس سن

شهریار بی بدیل سرزمین طوس سن

کیم ایده عرض ارادت سن اونا مانوس سن

بارگاهون باب رضوان یا علی موسی الرضا 

◀️ ستاری قیزیل قلم

ای اولان باب کرامت کل انسانیته

عالم آل پیمبر عشق وحدانیت

رهبرجمع اعاظم خیل روحانیته

حافظ الفاظ قرآن یاعلی موسی الرضا

◀️ شایان ارومیه ای 

قرن لر دی که حکومت ایلیورسن دللره

التفاتون وار  پناهنده اولان سایل لره

 هر ایکی عالمده دوشموش نام پاکون دیللره

مامن دلدادگان سان یاعلی موسی الرضا

◀️ ارسلان محمدی 

من سنون عشقونده حيرانم آقا الله بيلير

سن گلن  يولاره قربانم  آقا الله بيلير

من گينه سفرونده مهمانم آقا الله بيلير

لطفوي بير ايله احسان ياعلي موسي ارضا

◀️ ارسلان محمدی 

اي کرامت معدني پابوسوه ايسته گليم

تير عشقونله اقا قوي قلبيمي منده دليم

غرق عصيانم اقا الله بيلور بوشدي اليم

عيبيمي سن ايله پنهان يا علي موسي الرضا

◀️ ستاری قیزیل قلم 

باخ سنون عشقونده ترک موطن اِئتدی خواهرون

عزم ایران ایلییب شوقیله زواردَرون

اولمادی قسمت اوپه خسته مسافرگؤزلرون

ناگران باغری اولوب آلقان علی موسی الرضا

◀️ شایان ارومیه ای 

مظهر جود و کرامت معنی لطف اله

مالک سلم و رضا سن صاحب عزیله جاه

گورمویوب گورمز زمانه سن کیمی شوکتلی شاه

قلب لر عشقونله شادان یا علی موسی الرضا

◀️ ستاری قیزیل قلم

ضامن آهو سان ای سلطان ملک ارتضا

تک حدیث سلسله بسدوراِئدردرده دوا

احتجاجونده قالیب حیرتدن مأمون دغا 

منزلی قیلدی سنه زندان علی موسی الرضا

◀️ شایان ارومیه ای 

حشمتونده رشگیده دایم سلیمانلار قالوب 

طلعتونده هرزماندا ماه کنعان لار قالوب

حکمتونده مات وحیران جمله لقمان لار قالوب

منشا الطاف رحمان یا علی موسی الرضا

◀️ ارسلان محمدی 

کيم سني قيلسازيارت  عشقيلن حاجي اولار

کيم سنه زوار اولا حاجيلرين تاجي اولار 

 غم گوني زوارينه موسي الرضا ناجي اولار

عاشقون اولماز پريشان يا علي موسي الرضا

◀️ حاج عباس دهقان 

اوگوزل گلدسته لرحیران ائدیبدور ملتی 

هرگونی دنیاده آرتور اومزارون شوکتی 

قویموسان قلبیمده زواراولماقا سن حسرتی 

ال منیم اوپاک دامان یاعلی موسی ارضا 

◀️ شایان ارومیه ای 

هر نسیمی که بیزه سمت خراساندان گلور

نکهت جانانیدور که عرش سبحاندان گلور

 گوییا رشحات حقدور عطر عرفان دان گلور

معنی ایمان و عرفان یاعلی موسی الرضا 

◀️ حاج عباس دهقان

ای یاتان ملک خراساندا سلام اولسون سنه 

روحمیزسن ای رضا جاندا سلام اولسون سنه 

افتخاراولدون بوایراندا سلام اولسون سنه  

فخرایرانی وایران یاعلی موسی الرضا 

 

◀️ شایان ارومیه ای 

واردی اون دورد ایلدی مولا دلده بیر سر مگو

حاجتیم ایله بر آورده منه ویر آبرو

گوز یاشیملا صحنیوه ویرم من عالی شستشو

سسلرم ای درده درمان یا علی موسی الرضا

◀️ ستاری قیزیل قلم

اول ذی قعده تاروزدهم ازلطف حق

شدمزین برقدوم پاک نور نُه طبق

حضرت معصومه وشاه چراغ احمد نسق

شدمنور نوریزدان یاعلی موسی الرضا

◀️ شایان ارومیه ای 

سوره نوری ایدور تفسیر عالی مرقدون

توتیای دیده لر دی خاک پاک مشهدون

گون به گون آرتیبدی نور تابناک گنبدون

سسلنر عشقیله-شایان- یاعلی موسی الرضا

◀️ سيفی سیف الشعرا

پاک آدون حُسن القضای سرنوشتیمدورم آقا

جانفدا اولماق سنه عین سرشتیمدور آقا

صحن وایوان و رواقونده بهشتیمدورآقا

من گدایم سنده سلطان یاعلی موسی الرضا

یا ثامن الحجج سنه قرباندی جانیمیز

یا ثامن الحجج سنه قرباندی جانیمیز

وابسته دو ر جلالیوه نام و نشانیمیز

ای مظهر  جمال  خداوند  ذوالجلال

آئینه   محبت  خلاق  بی مثال

دنیانظیریوی گوره بیر امریدور محال

سن سن ایکی جهاندا بیزیم آرمانیمیز

قربان اولوم جلالیوه سن شاه عشقیسن

سلطان با صلابت و ذیجاه  عشقیسن

قرب  خدای لم یزله ، راه عشقیسن

عشقونله جاریدور شریانلاردا قانیمیز

آنداولسون عشقون عالمی صوم  صلاتیمه

صحنونده شوروحالیله گیچمش حیاتیمه

سن سن ولی  نعمتیمیز  یابن  فاطمه

مدیونیدور  محبتیوه  خاندانیمیز

انگشتر  محبته  مهرون  عقیقیدور

جنت گدای جلوه ی صحن عتیقیدور

صبح قیامتون که حسابی دقیقیدور

تحت حمایتونده دی پیر و جوانیمیز

آزاده ملتوک  یله  وجدانی ویرمروک

ری ملکینه  محبت زهرانی ویرمروک

دنیانی ویرسه لر قیزیل ایوانی ویرمروک

روشندی  نور  مشهدیله  آسمانیمیز

دنیاده هر بنی بشرون رسمیدور بیله

سعی و تلاش ایدرکه چاتاعمری حاصله

عاشق گرکدور عاشق اولابیرقوی دله

وابسته دور رواقیوه روح و روانیمیز

صحنونده یوخدی یر گیجه لر اینه آتماقا

خادمدی درگهونده ملک فیضه چاتماقا

الله ویروب سنی بیزه پای باش اوجاتماقا

سن سن بیزیم  همای  بلند  آشیانیمیز

غرق گناه ومعصیتوک جانه گلمشوک

بیر سائلوک که محضر سلطانه گلمشوک

درماندیوک بودرگهه درمانه گلمشوک

هجرونده قان اولوبدی بو اشک روانیمیز

ویروک سنی جواده قسم آتما بیزلری

هجران چتندی سیدی آغلاتما بیزلری

مشتاق وصلوک ئوزگه لره قاتما بیزلری

آدون اولوبدی هر گیجه ورد زبانیمیز

یو‌خدور لیاقتیم سنه قربان اولوم آقا

بیر لحظه قبر پاکیوه مهمان اولوم آقا

ویر اذن درگهونده نگهبان اولوم آقا

آزقالدی عرشه اود سالا سوز نهانیمیز

گلدي ندا عالمه سلطان گلوب

 تركي

گلدي ندا   عالمه  سلطان  گلوب

ير يوزينه   ناطق    قرآن  گلوب

اي  عجبا   يوسف   كنعان گلوب

آينه ي   حضرت   يزدان  گلوب

مژده ويرون شاه خراسان گلوب

اون بير ذي القعده چخوب ماه دين

نجمه  بوگون  تاپدي  زر   پرثمين

شاد   اولوب   اركان زمان و زمين

اولما   داخي   دردي اولان دلغمين

چون بوگيجه   دردلره درمان گلوب

گلدي  بوگون    شاه   نفيس النفوس

روشن ايدوب عالمي شمس الشموس

بو  خبره  وجده  گلوب   شهر طوس

عالميان   اولدي    اونا     پاي بوس

ير  يوزونه  حوري    و غلمان گلوب 

قلبينه    مولانين    ايدوب    غم اثر

جبريله گر   طوسه    ايدوبدور سفر

ايتدي   ولي طوسي  عجب    مفتخر

اولدي   اوركلرده      آقا     مستقر

آري   ولي نعمت    ايران     گلوب

(آذرينين)  شعرينه    سن سن   دليل

دعوت    ايله    زائر   اولا   بو ذليل

پنجره    فولاده    سالا    بير   دخيل

دردينه    درمان     ايله  اي بي بديل

محضروه    ديده سي    گريان  گلوب

فارسی

بر دل    عشاق    صفا    آمده

اين  خبر از   باد    صبا  آمده

هلهله بر ارض  و   سما  آمده

آينه ي       قبله نما      آمده

 

باز كوير  دل  من   گلشن است

خانه دگر خالي از اهريمن است

باغ پر از نسترن و سوسن است

شام مدينه چوسحر  روشن است

ماه    منور    به    سما    آمده

 

قمري و بلبل   شده  آوازه خوان

دست  فشاند  همه   پير  و جوان

هور و ملك سوي زمين شد روان

اي  عجبا  آمده   بر  جسم  جان 

نسخه ي درمان   و   دوا   آمده

 

غرق    عبادت   شده  كل   عباد

بر    قدمش  ماه  به سجده  فتاد

بر پدرش حور و ملك   مژده داد

موسي جعفر شده مسرور و شاد

دلبر         آيينه نما         آمده

 

خلق شده اي عجبا  بوالبشر

يا كه   خليل   آمده  بار  دگر

يا كه كليم است شده تاج  سر

يا كه به مريم شده عيسي ثمر

يا   كه   محمد   ز  حرا آمده

آمده    بر    ملك خراسان امير

بر كرم و مهر و عطوفت سفير

بين   خلايق   بود اين بي نظير

نجمه   شده   صاحب  ماه منير

يوسف     كنعان    عجبا   آمده 

قربان اولوم جلالتیوه یا ابا الحسن

قربان اولوم جلالتیوه یا ابا الحسن

چوخ شائقم زیارتیوه یا ابا الحسن

مین بیر آدیله آدلانوب ا... لاینام

اسم رضادی مظهری بو آدلاری تمام

ای اسمی اسم اعظم حق، ای شه انام

عاجزدی عقل مدحتیوه یا ابا الحسن

دنیانین اهلی رسمیدی یوخ شبهه و مقال

شیرین آدی گلنده عسلدن وورار مثال

شیرین دور اهل عشقه عسلدن ولی وصال

قربان اولوم حضرتیوه یا ابا الحسن

تلخین مثالینی عقلا زهریدن وورا

عشاق ایچینده عکسینه اما عقیده وار

مین دفعه زهریدن آجیراقدور فراق یار

یوخ منده تاب فرقتیوه یا ابا الحسن

آگاهیسن اوزون سن اَیا شاه ذوالکرم

من عاشقم سنه، دیمه مداح و نوکرم

بیر آستانون اوپماقی مین خلده ویرمرم

آند اولسون اوز امامتیوه یا ابا الحسن

بیگانه بلمز عشق غمین، آشنا بلر

گیزلین رموزی عالم جهر و خفا بلر

قلبیم نجه یانور بیر اوزون بیر خدا بلر

دل تشنه دور سقایتیوه یا ابا الحسن

سن مظهر جمال خدای عطوف سن

کشاف هم و غم و کروب و لهوف سن

معروف سن بو اسمه امام رئوف سن

جانلار فدا عطوفتیوه یا ابا الحسن

چوخدان دوشوبدی خسته گوگل اشتیاقیوه

یاندورما بیر بیله منی نارفراقیوه

ایسته گلوم بهشتیدن اعلی رواقیوه

ویرم قسم رضایتیوه یا ابا الحسن

ای شاه ملک سلم و رضا، ایها الرضا

نومید اولا گدای درون اولماسان رضا

باخ گور روادی ای شه اقلیم ارتضی

من گلمیوم زیارتیوه یا ابا الحسن؟

سن شاه ماسوا، سنه من کمترین گدا

شاهه گدانی بوش یولا سالماق دگُل روا

بیر باخماقون ایدر ایکی دنیامه اکتفا

اولّام رهین منتیوه یا ابا الحسن

قبروندن اوتری گوگلوم اسور مثل برگ بید

بیر سائلم قاپوندا سیه روی و مو سفید

ویرم قسم جوان بالاوا ایتمه ناامید

قیل مفتخر عنایتیوه یا ابا الحسن

هجرونه گوز یاشیم قاریشوب قلب قانینه

رحم ایله بو بلا کشین آه و فغانینه

ویرم قسم شها سنی معصومه جانینه

ایسته گلوم زیارتیوه یا ابا الحسن

ای جود و بخشش و کرم و فضل معدنی

اوغلون جواد جانینه ویرم قسم سنی

بیرده قوناق چاقور او گوزل قبریوه منی

مشمول قیل کرامتیوه یا ابا الحسن

دلدن آلوبدی طاقتیمی درد فرقتون

نیلوم نصیب اولموری فیض زیارتون

هر صبح و شام یاد ایدرم حال غربتون

یانّام ملال غربتیوه یا ابا الحسن

فریاد و داد او وقتیدن ای خسرو حجاز

مسموم ایلدی سنی مامون حیله ساز

بو فکریله که ایلیه بیر نوع سِترِ راز

گَلدی سنون عیادتیوه یا ابا الحسن

گوز یاشلی عرض ایدردی که ای شاه محتشم

بو بس دگل فراقون اولور مایه ی الم

طوس اهلی ایلوری منی بو امره متهم

مه عاملم شهادتیوه یا ابا الحسن

مامون اگرچه قاتلیدی ای شه کِبار

امّا حیالیدور گنه اول شوم کین شعار

اوز ایتدیقی خطاسینه ایلردی اعتذار

آغلاردی حال رحلتیوه یا ابا الحسن

اما نه بی مروتیمیش شمر بیحیا

جدون حسینین ایتدی بدندن باشین جدا

ووردی باشین جدایه همان غملی ماجرا

اولدی سبب مصیبتیوه یا ابا الحسن

من نوکرم قاپوزدا، حسینی دی شهرتیم

لایق دگل اگرچه بو درباره خدمتیم

اما بو بوش الیله گنه یوخدی وحشتیم

گوز تیکمیشم شفاعتیوه یا ابا الحسن

جدون اوزی بیله بویوروبدی مفضله

قرآندی اصل مدرکی، روشندی مسئله

واللهی قبریدن دوراجاقدی گله گله

قائل اولان ولایتیوه یا ابا الحسن

ای ایدن خراسانی کربلا هر غمه رضا یا ابالحسن

ای ایدن خراسانی کربلا هر غمه رضا یا ابالحسن

جدی تک قوری یرده جان ویرن قبریوه فدا یا ابالحسن

سیزسوز آفرینندیه اولان آفرینش عالمه غرض

جوهر وجود اهل عالمه هر ایکی جهان نوروزه عرض

رشک خلد اعلی ضریحیوی گر بهشتیله ایلسم عوض

غبن دور منه بو معامله قیلام ادعا یا ابالحسن

بیر امیدیله دوتموشام سنون ای کرامتین کانی دامنون

ال گوتورمرم ایتمسن کرم ال منیم اماندور اتک سنون

آستانون ایله وسیعدور اولمیوبدی مایوس دشمنون

نا امید اولا بو محبلر گور اولور روا یا ابالحسن

آستانوزه یوز قویار سیزون آرزوسینون گلشنی سولان

ذیل لطفوزه اعتصام ایدر قلبی غصه دن قانیله دولان

باب رحمتوزدن گورونمیوب سیدی سیزون ناامید اولان

ایلیوب سیزی حی لم یزل معدن عطا یا ابالحسن

ای هامی ایاقدان دوشنلرین دستگیری یا ثامن الحجج

سایه عنایتده ساخلا بو مستجیری یا ثامن الحج

قوماز آستاندان کریملر کلب پیری یا ثامن الحجج

بیر قوجا قولام باشیم اوسته سال سایه ی هما یا ابالحسن

خانه زاد بیر مادحم سیزه درگهونده بیر کمترین غلام

نیلیوم که مولامه عاشقم گرچه من سیه روی بیر قولام

درد عشق ایاقدان سالوب منی گلمیشم طبیبیم دوا آلام

جرمدور مگر عاشق اولسا گر شاهه بیر گدا یا ابالحسن

وار مگر گدانون تناسبی سن کیمی جلالتلی شاهیله

گل دیسن گلر گیت دیسن گیدر دل شکسته حال تباهیله

جانیوه قسم ایله سن منه بیر نظاره نیمه نگاهیله

هر ایکی جهان دردیمه منیم ایلر اکتفا یا ابالحسن

سن یترسن اوچ یرده دادینه قبریوی زیارت ایدنلرین

بیر هامی دوراندا مزاریدن بارماقی دوداقیندا دلغمین

بیرده پخش اولاندا عمللرین نامه سی که بیر وقتدور چتین

بیر لدی الصراط اللرین دوتوب ایلسن رها یا ابالحسن

سگّیزیمجی شرطی موحدین سنسن ای هامی عالمه رجا

من غریب و بی یار و یاورم یوخ منه اولان کیمسه ملتجا

بو غریبه بیر لطفیله نظر ایلسن اگر چوخ اولور به جا

ای غریق بحر مصائبه یار و ناخدا یا ابالحسن

ای غزال وحشی دلین بلن من اسیر آلام و بی کسم

یوخ دلیم ایدم دردیمی بیان قویما سندن امیدیمی کسم

ویرم ای امید جهانیان فاطمه آنان حقینه قسم

سن آقالیقون ایله باخما وار منده چوخ خطا یا ابالحسن

قاره پوش ایدوبلر ضریحیوی چون شهادتوندور سنون شها

وا رضا سسی شهری دولدوروب مشهدی دوتوب شیون و نوا

شیعه لر وورور باشه آغلوری کربلا بساطی اولوب به پا

طوس اولوب بو داد و نوائیله دشت نینوا یا ابالحسن

میهماندی بو سعدی زمان اوز قوناقیوه بیر نوازش ایت

بو یوزی قرا نوکرونله گل مهریله عطوفتله سازش ایت

من «حسینیم» مادحم سیزه منکر و نکیره سفارش ایت

ایتمسونله مداح حضرتون قهریله ندا یا ابالحسن

ای ارض طوس سنده عجب دلربا یاتوب

ای ارض طوس سنده عجب دلربا یاتوب

مرآت حق نما و جمال خدا یاتوب

بی اختیار مایل اولور دل وصالوه

سنده مگر بو کاه دله کهربا یاتوب

بالفرض روح شکر اولا، سن بنفشه سن

ارواحی سنده جذب ایلین بیر قوا یاتوب

سن سن عیار مسلم و مومن لره محک

سنده عیار کامل اهل هدا یاتوب

ایلر زیارتون مس ایمانی صاف زر

بیر بوته سن که سنده گوزل کیمیا یاتوب

شمس الشموس سنده دور ای مفخر فلک

سنده مهیله مهره ویرن انجلا یاتوب

اسلامیده عزیزدی سنده یاتان وجود

سن سن او یر که سنده امام رضا یاتوب

پیغمبرین عزیزی، جگر گوشه سی رضا

باب الحوائج اوغلی قضایه رضا گلوب

سینای واقعیدی سناباد ارض طوس

سنده کلیم لم یزله مقتدا یاتوب

موسایه طوریده اولان انوار آشکار

سنده جفا الیله تاپوبدور خفا یاتوب

ای عرشدن گوزل یر، اوزی فرش زینتی

سنده سلیل پاک شه هل اتی یاتوب

بیر روضه سن ریاض بهشت بریندن

یوخ یوخ بهشتیده سنده جلالت فزا یاتوب

افلاکیان چکه له تمام اشتیاقیوی

سنده حبیب خالق ارض و سما یاتوب

دریای علم و حکمت بحر کمال و فضل

سن سن نه چون که سنده در پربها یاتوب

ای گوهر یگانه ی پیغمبره صدف

سنده سرور سینه ی خیرالنسا یاتوب

سن بیر رئوف امامی آلوبسان کناریوه

اسلامیانه سنده امید و رجا یاتوب

سنده جگرلری یارالی بیر بزرگوار

اوز ایل قبیله سیندن اولوبدور جدا یاتوب

یرلرده یوخدی بیر یر اولا شانیوه نظیر

الّا او یر که اوردا شه کربلا یاتوب

بیر گل وار اوردا بلبلی ارواح انبیا

امّا یارالیوب اونی خار جفا یاتوب

عرش خدا چکر او یرین اشتیاقینی

چون اوردا گوشواره ی عرش خدا یاتوب

بیر قبر واردور عرش کیمی آلتی گوشه لی

واللهی اوردا آینه ی حق نما یاتوب

قربان اولوم او مدفنه که اوردا قول بویون

بی غسل و بی کفن بیر آتا بیر بالا یاتوب

عرض ایلسم بهشت، بهشت ایلر افتخار

اوردا بهشته علت خلقت آقا یاتوب

بیر قبردور زیارتی ا... زیارتی

اوردا او که فدادی اونا خون بها یاتوب

عریان یارالی پیکری باشدان باشا خدنگ

گویا خدنگیدن پر آچوب بیر هما یاتوب

فریاد او وقتیدن که باجی تاپدی قارداشین

گوردی بدنده وار نه عبا نه قبا یاتوب

باشین کسوبله نعشی قوم اوستونده چاک چاک

گلدن لطیف جسمیده دورت مین یارا یاتوب

گویا که بیر طبق گلی اوراق ایدوبدیلر

هر برگی اوز یرینده دوشوب جابجا یاتوب

نیزه قلج سنق لاری آلتندا گیزلنوب

پیغمبر اوغلی خامس آل عبا یاتوب

عریان گوروبدی رحم قیلوب ایلیوب کفن

مرهم سالوب یاراسینا باد صبا یاتوب

معلوم اولور کسوب دالیدان قاتلی باشین

نعشی دوشوب یوز اوسته، ذبیح القفا یاتوب

بولدی باشین کسن آپاروب کوفیه قوناق

امّا اولوبدی منزلی مطبخ سرا یاتوب

سسلندی دور باجون سنه قربان نه یاتموسان

هانسی یارالی سن کیمی بی اقربا یاتوب

هانسی شهین پوزوبلار سنون تک جلالینی

صاحب لواسی قانه باتوبدور، لوا یاتوب

کیم سو یانندا سن کیمی لب تشنه جان ویروب

جان اوسته سو یرینه ایچوبدور دِما یاتوب

هانسی شهین ئولنده سویوبلار جنازه سین

کیم سن کیمی بلایه دیوبدور بلا یاتوب

هانسی آتا یانندا سنون اکبرون کیمی

نورسته بیر جوان اوزی گلگون قبا یاتوب

داماد ایدوبدی هانسی عمو قارداش اوغلونی

امّا یاخوبدی طویدا اله قان حنا یاتوب

واردور باشیمدا شور حسینی اودور سبب

نی تک سوزیمده پرده به پرده نوا یاتوب

ای افتخار ملک عجم یا اباالحسن

ای افتخار ملک عجم یا اباالحسن

وی منبع سخا و کرم یا اباالحسن

تاپدی عجب سنیله شرف سرزمین طوس

گون درگهونده هر گون ایدر فخریله جلوس

هر آی آی اولی ایده اول آستانی بوس

قدین ایدر او مدفنه خم یا اباالحسن

هر کیم چوویرسه یوز سنه ای عالمه رجا

هر حاجتی اولا ایده سن لطفیله روا

هر دردمند سندن ایدر دردینه دوا

عیساده یوخدی سنده کی دم یا اباالحسن

ای نور پاکی گون کیمی بو عالمه مفید

وی دست با کفایتی هر مشکله کلید

گل درگهوندن ایتمه بیزی طرد و ناامید

ویرم آنان بتوله قسم یا اباالحسن

سن شهریار عالم و من روسیه گدا

هر قدر واردی منده خطا سنده وار عطا

مندندی درگهونده گجه گوندوز التجا

سندندی لیک لا و نعم یا اباالحسن

جانلار اولا جهاندا فدا عز و جاهیوه

عالم تیکوبدی گوز نگهِ گاه گاهیوه

هر غم اسیری قویسا قدم بارگاهیوه

قالماز دلینده محنت و غم یا اباالحسن

هاردان تاپار دل اهلی ایله باصفا یری

دائم اولا گجه گونوز اهل ولا یری

یا ثامن الائمه به جز کربلا یری

یوخدور ایله صفالی حرم یا اباالحسن

روحیم بدنده وار نه قدر سینه داغلارام

سیلاب وار اشکیمی رخساره باغلاارم

جدون مصیبتینده سن آغلا من آغلارام

تا اشکیمیزده گورسنه یم یا اباالحسن

قان آغلارام او وقتینه شه خیمه گاهیدن

گیتدی جوانینی گتوره رزمگاهیدن

بولمم نه گوردی آتدی اوزین ذوالجناحیدن

یرده سوروندی نچه قدم یا اباالحسن

باخدی او قانینه بویانان جسمه چکدی آه

گوردی خسوف ایدوب دیه سن قان ایچینده ماه

شهزاده ال ایاق چالوری، باشی اوسته شاه

بولمم نه حاله قالدی او دم یا اباالحسن

پیغمبر اوغلی شبه پیمبر جمالینه

باخدوقجا قاتدی خون دلین اشک آلینه

گویا تیکوبدی گون گوزونی آی جمالینه

آی باتدی یوز ویروب گونه غم یا اباالحسن

قرخ ایلدی من ‹‹شبیری›› سیزون روزه خواروزم

دنیاده فخر و صدقیله خدمت گذاروزم

محشر گونونده ده سیزون امیدواروزم

یوخدور الیمده جز بو قلم یا اباالحسن

ای مقدس بارگاهی عرش اعلادن گوزل

ای مقدس بارگاهی عرش اعلادن گوزل

قبرینون عطری دم جانبخش عیسادن گوزل

ای همایون شهریار ملک تسلیم و رضا

افتخار طوس سلطان سریر ارتضا

وی رضا هر بیر قضایه نازنین آدی رضا

تربتون الحق اولور عالمده دیبادن گوزل

فیض آلار ای فیض حق عالمده قبروندن نفوس

مهر و مه ای پرتو نور جمالیندن عکوس

اولمیوب بی خود جهاندا شهرتون شمس الشموس

طلعتون مین آفتاب عالم آرادن گوزل

ای جمالی مظهر اوصاف حی ذوالجلال

ریزه خوار خوان فضلوندور هامی اهل کمال

گون یوزون گورسه قبول ایلر حجاب انفعال

ای سواد تار زلفی لیل یلدادن گوزل

گر ایلر بلبل گلی، پروانه شمعی جستجو

کعبه ی عشقدور اما بو قبر مشک بو

گورسه هر کیم قبروی، ایتمز بهشتی آرزو

ای همایون، مدفنی فردوس اعلادن گوزل

ای کلام ا... ناطق وی کلیمه مقتدا

وی غبار آستانی چشم حوره توتیا

ظل ممدود الهی قبله ی اهل ولا

واردی آسایش سنون یانونده طوبادن گوزل

چون سنی ممتاز ایدوب لطفیله خلّاق علیم

اولمیوب اولماز مقامون درک ایده عقل سلیم

سیدی محو کلام دل نشینون مین کلیم

نور رخسارون یدبیضای موسادن گوزل

گرچه مین بیر آدلانوب عالمده حی لایری

مجتمعدور بیر رضا لفظینده آنلار آشنا

اسم اعظمدور آدون ای اسم پاکی کیمیا

هاردا وار بو اسمیدن یا بو مسمادن گوزل

سن او شه سن قبروه شاه و گدا پابوس اولار

گورمه سه هر کیم مزارون آهیله مانوس اولار

گلسه بو درگاهه سائل مگر مایوس اولار؟

ای گوی آلتندا رواقی چرخ مینادن گوزل

بو جلالیله که دنیانی دوتوبدور شهرتون

اهل عشقی آغلادار اما ملال غربتون

هر گوگلده وار تمنای شمیم تربتون

اولمیوب اولماز تمنا بو تمنادن گوزل

ذکر اولاندا غربتون ای یادگار مصطفی

طاقت و آرامیمی الدن آلور بیر ماجرا

گوزلریمده ایلوری جلوه دیار کربلا

جنت الماوی یقین اولماز او صحرادن گوزل

گرچه سن غربتده جان ویردون غریب و دل فکار

قویمادی اوغلون گنه آخر نفسده انتظار

باشوی گلدی دیز اوسته آلدی اولدی کامگار

سنده آلدون کام دل اول ماه سیمادن گوزل

قانه باتمشدی ولی جدون حسینون اکبری

نه واریدی بیر هواداری نه یار و یاوری

حسرتیله صاق صولا حیران باخاردی گوزلری

منتظر بیر انتظار اولماز او مولادن گوزل

باخمادی تخمیر اولوبدور عشقیله آب و گلی

لشکر اشراریدن آیریلدی ناگه قاتلی

تاپدی گرداب محبتده شه دریا دلی

گوردی بیر قان دجله سی، اولماز او دریادن گوزل

بیرده گلدی خیمه گهدن زینب عالی تبار

گوردی زهرانون گل آغوشنی مجروح خار

دوتدی قاتل خنجریندن ایلدی ایثار ثار

کیم مواسات ایلیوب بو دخت زهرادن گوزل

بیر گئجه صدیقه ی کبری بتولین ماتمی

تاپدی دورت احباب بیر محفلده الفت عالمی

تا او بزم شور و وحدت ایچره خوندل اعظمی

یازدیلار بیر شعر هر اشعار زیبادن گوزل

ای قلم ایله توسل‌باب صحبت باز ایله

ای قلم ایله توسل‌باب صحبت باز ایله

موسی کاظم مصیبت  نامه سین آغاز ایله

شرح ویر آیا نه نوعی عشقی داره چکدیلر

گلشن حریتی تاراج ادیب خار اکدیلر

شرح ویر زندانیده موسی بن جعفر محنتین

نظمه چک بی کس امامین اول اسفناک حالتین

خط سیری گور چکوب دی گردش دوران هارا

موسی‌کاظم هارا هجران بی پایان هارا

ظلمت‌یله آفتابین وار نه نوعی نسبتی

حبس ایده لر هانسی مذهب ده امام امتی

هئچ روادور بیر قوجا سید دوشه بحر غمه

دوزدی آیا یاغمویا باران رحمت عالمه

ه‍ئچ روادور باغلانا زنجیره سلطان زمان

دوزدی آیا بیر قارانلوق یر اولا شاهه مکان

دوزدی آیا کنده و زنجیره باغلانسین امام

دوزدی آیا آتش هجرانیده یانسین امام

دوزدی آیا باغلانا باب کرامت اون بیر ایل

دوزدی گردابه دوشه کشتی امت اون بیر ایل

الغرض زندانه سالدی‌ حضرتی قوم لعین

ایتدی هارون اول امام امتی زار وحزین

تا کی دوشدی محبس تاریکه سلطان زمان

باشلادی راز ونیازه پادشاه انس وجان

محبسه وارد اولان دم بیله ایتدی زمزمه

بوردا آسوده عبادت ایله رم   یا رب سنه

عاشقم من عاشقه بیر بیله خلوت یاخشی دی

یاریله یار ایله‌سین خلوت‌ده صحبت یاخشی دی

سر عشقین دفتری خلوت‌ده خوش‌دور باز اولا

عاشقین عشقی گرک معشوقه دوز ابراز اولا

امتحانی ویرموین عاشق آلاماز امتیاز

امتحان عشقی‌دور بو قصهٔ طول و دراز

روز وشب ایلوردی مولا آه‌و زاریله دعا

اول قرانلوق زندان اولموشدی عبادت گاه اونا

 روز وشب مولا سالوردی اهل بیتون یادینه

خالق یکتانی سسلوردی آقا امدادینه

لحظه ای یاددان چیخاتموردی قیزی معصومه نی

قوزانوردی دم‌به دم مولانین آه و شیونی

داد ایدوردی من رضای کردگاره راضیم

گوشهٔ زندانیده من درد و غم آماجیم

اون بیر ایلدی اولموشام اهل وعیالیمدن جدا

یوخدی بیر کس دادیمه سندن سورا چاتسین خدا

دوزدی یا رب خلقتین هر اختیاری سنده دی

انس و جن حور وملک لر درگهوندا بنده دی

منده قوش تک بو قفس‌ده اولموشام بی بال وپر

گوگلوم ایستور تا اولام اوغلوم رضادن باخبر

آرزوم وار ای خدا بوسه وورام رخسارینه

رخصتیم اولسا گیدم من اوغلومون دیدارینه

گلموشم جانه الهی آتش هجرانیدن

جانه گلدیم ایستورم آزاد اولام زندانیدن

ایستورم بو غم سرادن پر آچام پرواز ایدم

تاقیزیم معصومه نی بیر دفعه یارب ناز ایدم

الغرض آچدی خدای لم یزل باب کرم

آزاد اولدی بحر غمدن موسی کاظم او دم

نصف شب اولدی هویدا معجزات کردگار

قعر چاه دان جان قوتاردی موسی زهرا تبار

کنده وزنجیر اونی ایتمو شدی بی تاب وتوان

ایتماق اولماز چکدیگی محنت لری اصلا بیان

  الغرض اول حضرتین اولدی دعاسی مستجاب

گیتدی مولای زمان‌سوی‌مدینه با شتاب

طی‌العرض ایتدی یتوشدی مقصده اول مقتدا

ایلدی بیر لحظه‌ده خالق اونی غمدن رها

گلدی بعد از اون بیر ایل اهل وعیالین یوخلاسین

نازنین معصومه نی ایتسون نوازش آغلاسین

قالموشام آیا نجه بیر مطلبه ایما ادیم

بو مصیبت نامه نی آیا نجه انشا ادیم

قالموشام آیا نجه‌وصف‌ایلیوم اول صحنه نی

آلدی آغوشه نجه مولا قیزی معصومه نی

اضطرابیله آقا دوگدی در کاشانه سین

حین دق‌الباب اشیتدی آه و واویلا سسین

لحظه لر طول چکدی‌تا‌ گلسین بیری پشت دره

پشت دردن بیر خانم ویردی جواب اول سروره

سسلدی سن آشنا سن یاغریب سن سیدی

یثربه آیا نه منظوره گلوب سن سیدی

ایتدی فرمایش ٱیا ای دختر شیرین زبان

بوندان آرتیق سن منیم گوز یاشیمی ایتمه روان

اولموشام ایلر بویی اهل و عیالیمدن جدا

حسرتم دیداره‌من‌قان آغلارام صبح ومسا

جاری‌اولدی ناگهان‌اول‌دخترین اشک تری

حالت غم باریله‌اول باوفا آچدی دری

گوردی بیر سید نه سید چهره سی آیدان گوزل

صورتین خلق ایلیوب آی تک خدای لم یزل

ناگهان اولدی دگرگون آغلادی ای وای دیدی

ایتدی خواهش سن منی ایله دعا یا سیدی

نچه ایلدی روز وشب چشم انتظارم آغلورام

آیرلیقدان سیدی هرلحظه سینه داغلورام

ایت دعا تا کی آتامدان خوش خبر گلسین منه

روز وشب منده دعالر ایله‌رم هر دم سنه

اول زمان حالی پوزولدی‌پشت درده سیدین

ایتدی فرمایش سنه مژده واریم ای نازنین

هئچ بیلورسن هاردادی ایندی او مرد باوفا

بس نه علت‌دی اولوب آیا آتون سندن جدا

گورسون آیا سن تانورسان اول‌محبت گوهرین

نیلی‌یرسن گر بو دم گور سون اونی ای مه جبین

ایتدی گورسم گورسم گر آتام ی من داخی زار اولمارام

آیرلیقدان گول کیمی هر لحظه هر دم سولمارام

آلدی آغوشه او دم حضرت قیزی معصومه‌نی

قاخدی آفاقه اونون بیر لحظه آه وشیونی

ایله‌دی مولا نوازش دختر مه پاره سین

مخفی ایتدی ابتدا بوینوندا زنجیر یاره‌سین

سوندادان‌ آیا نه اولدی یوخ رجوعیم ای خدا

اولماسین هئچ بیر آتا اهل وعیالیندن جدا

مسلما گوز یاشلارونلا نظمه چکدون بو سوزی

چاره ساز دردون اولسون موسی‌کاظم اوزی

ای مـاه درخشان - خواهر امام رضا

ای مـاه  درخشان  -  خواهر امام رضا

جانیم سنه قربان  -  خواهر امام رضا

افتخار    و     شُهرتیمیـزسن 

شو کتیمیـزسن  –   سنه فدا

اعتبـار    و     قیمتـیمیـزسن 

 عــزتیمیـز سن   -   سنه فدا

«‌  اینان کی محبوبه سن خانیم 

عزیز    عُجوبه سن     خانیم  »

بو گجـه  مدینه  اوخشور باغ جنته

غرق ائدوبدی الله ما فیهانی رحمته

گلشن    زهـراده    آچـوب   گل  

عطریلی سُنبل   -    گلوب دیله

سـویونوب عرش اوسته ملکلر

نغمه لی بلبل    -     گلوب دیله

«‌  اینان کی محبوبه سن خانیم 

عزیز    عُجوبه سن     خانیم  »

بیر قیز وئروب ذات حق موسی بن جعفره

زینب   کیمـی   اولـدی   مَفخـر  آل   حیدره

سنـون  عشقـونـده  آسمـانـدا ستـاره لـر اِیلَـر حـرکت

سنـه خـاطـر وئـروبـدی ایـرانه ذات حـق نـان و بـرکت

«‌  اینان کی محبوبه سن خانیم

عزیز     عُجوبه سن     خانیم  »

معصومه دی آدون زهرادن نشانه سن

جشن میلادونده وئر بیر عیدیانه سن

گوزومـوز واردی کرمینـده

هَـم عَلمـینده  -   علاج اله

گورموشم من بـاغ جنـانی 

پـاک  حرمیـنده -  علاج اله

«‌  اینان کی محبوبه سن خانیم 

عزیز   عُجوبه سن     خانیم  »

ایکی باجی قارداش مَه رُخ ، ماهپاره سیز 

ایرانه  خورشیـد و ماه  و هم ستاره سیز

باجی قارداش هر ایکوزه بو درده دوشن جان فدا اولا

او   گــوزل  آدلاروزه  یکسـر   ملـت  ایـران فدا اولا

«‌  اینان کی محبوبه سن خانیم 

عزیز       عُجوبه سن    خانیم  »