سقاسن اگر سو وئر عموجان

سقاسن اگر سو وئر عموجان

یاندی سودامر سو وئر عموجان

قلبیم سنه خوشدی          مشگین نیه بوشدی

سو وئر عموجان(۲)

غم رشته سین اچ ایاقلاریمدان

احوالیمی بیل دوداقلاریمدان

خجلت چکورم قوناقلاریمدان

وار غملی خبر سو وئر عموجان

سو وئر عموجان

شش ماهه دوشوبدی پیچ و تابه

قونداقی باتو بدی اشگ نابه

اخر نه دیوم انام ربابه

قارداشیم ئولر سو وئر عموجان

سو وئر عموجان

مقصوده عمو چاتانمور اصغر

باشدان سو غمین اتانمور اصغر

لای لای دیوروق یاتانمور اصغر

اثنای خطر سو وئر عموجان

سو وئر عموجان

ئوز قارداشیوین با لاسیم من

عطشانلارین همنواسیم من

سقا ادیوین فداسیم من

قیل حاله نظر سو وئر عموجان

سو وئر عموجان

پوزدی عطش ال مصطفانی

افغان بورویوبدی کربلانی

عطشاندی هامی رقیه جانی

ای بهر هنر سو وئر عموجان

سو وئر عموجان

بیهوده گلایه ائتمرم من

گلدیم قاپووا قیتمرم من

شرمنده خیامه گئتمرم من

وار دلده شرر سو وئر عموجان

سو وئر عموجان

گئت بیله مخاطب ائت سپاهی

دلسیز اوشاقین ندور گنا هی

دلدن دوشوب اصغرین یوخ اهی

دل اچسا دئیر سو وئر عموجان

سو وئر عموجان

قوریوب دوشوم سویا یوخ گمان

قوریوب دوشوم سویا یوخ گمان 

بالام آغلاما گلوم آغلاما

بو قدر کباب ایلمه آنان 

بالام آغلاما گلوم آغلاما

گورورم دوزنمیسن آجلیقا 

عطش ایلیوب سنه چوخ اثر

قالا آج سوسوز سودامر بالا 

داشا بو مصیبت ایدر اثر

بیر آنا که ایچمیه سو اوزی 

سود اولار دوشونده اونون مگر

آنان ئولسون ایلمه چوخ فغان 

بالام آغلاما گلوم آغلاما

بُلورم علاجینی دردیوین 

نیدوم الده چاره یوخ آغلارام

اثر شراره ی آهیمه 

یانارام بو سینه می داغلارام

گورورم خراش ایدوسن یوزون 

الیوی قماطیده باغلارام

هانی عقده ی دلیمی آچان 

بالام آغلاما گلوم آغلاما

ساتاشاندا گوزلریوه گوزوم 

گوزومون یاشین الرم بالا

آنالیق محبّتی جوش ایدر 

اوره گیم یانار ملرم بالا

داخی اوزگه چاره تاپانمارام 

بلگون آچوب بَلَرم بالا

ایدرم گوزوم یاشینی روان 

بالام آغلاما گلوم آغلاما

گورورم که ابر بهار تک 

بالا گوزیاشیله گوزون دولوب

اوره گون بو اوتلی دلیم کیمی 

شرر عطشله کباب اولوب

قورویوبدی غنچه دوداقلارون 

گل عارضون سارالوب سولوب

بو سولان جماله فدا آنان 

بالام آغلاما گلوم آغلاما

آلورام قوجاقیمه جان کیمی 

ایدم اُوز علاقه می آشکار

بالالار کیمی دوشومی دوتوب

یاتاسان بیر آز اولاسان خمار

گورورسن دوشوم یانور اود ویرور

ایدوسن دوداقلاریوی کنار

یانوسان سیزیلدیسان آغلوسان 

بالام آغلاما گلوم آغلاما

دولانوب خیامی تاپانمادیم 

بیر ایچیم سو ای سودامر بالام

قورویان دوداقلارون ایسلادام 

جگرون حرارتینی آلام

من اگر بو دردیله ئولمیم 

بو جهاندا عمر ایلیم قالام

یانارام بو نسگله هر زمان 

بالام آغلاما گلوم آغلاما

نیه گوزلرون چوخورا دوشوب 

نیه صورتون سارالوب بیله

نیه گَلمور آغلاماقا سسون 

منی آز کباب ایله صبر ایله

هامونون باشی قاریشوب علی 

گَله گر بو حالی آتان بُله

سو تاپار سنه بُلورم آتان 

بالام آغلاما گلوم آغلاما

بو گئجه کِشیکدی گَلنمیوب 

سنی گورماقا بالا اکبریم

من اونوندا چوخ نگرانیم 

نگران باخور یولا گوزلریم

دیورم گَلیدی گوریدی بیر 

نجه جان ویرور سوسوز اصغریم

سنه سو تاپِیدی او مهربان 

بالام آغلاما گلوم آغلاما

دیورم گیدوم عمووا دیوم 

بالامی نفسدن عطش سالوب

ایدورم حیا بُله یوخ سودوم 

بودور علّتی آنان آج قالوب

هامی چاره یوللاری باغلانوب 

هامینون قرارین عطش آلوب

اوجالوبدی گوگلره الامان 

بالام آغلاما گلوم آغلاما

گینه ای « حسینی » نه دلدی بو

که ایدور دیِنَده یارا دلی

بیله دل دیماقدان اوتور خدا 

سنه ایلیوبدی عطا دلی

دیمه ساده چخدی بو سوزلریم 

اولی ساده رسماً آنا دلی

آنالار بالایه ایدر بیان 

بالام آغلاما گلوم آغلاما

کوفیان سو یولونی باغلادیلار

کوفیان سو یولونی باغلادیلار

دل اهل حرمی داغلادیلار

قدغن اولدی سو اهل حرمه

ایش قالیب صاحب مشک و علمه

کسدیلر آب حیاتین یولونی

کوثر شور و نشاطین یولونی

دشمنین لشگری سد ایلدیلر

خیمیه نهر فراتین یولونی

قدغن اولدی سو اوسته حرمه

ایش قالیب صاحب مشک و علمه

سو آخوب چؤللره داغلار دئدی وای

گلشن عترته باغلار دئدی وای

قوریان مشکه باخوب حسرتیلن

خیمه ده تشنه دوداقلار دئدی وای

قدغن اولدی سو اهل حرمه

ایش قالیب صاحب مشک و علمه

اشقیا ظلم مدام ایلدیلر

علقمی عترته دام ایلدیلر

فاطمه اوغلونا اشرار زمان

مهر زهرانی حرام ایلدیلر

قدغن اولدی سو اهل حرمه

ایش قالیب صاحب مشک و علمه

محنت و غم بولودی گویده شاخور

نهر علقمده سو صحرایه آخور

الده سو جامی سوسوزلار دایانوب

گؤزلری مشک ابالفضله باخور

قدغن اولدی سو اهل حرمه

ایش قالیب صاحب مشک و علمه

راه چاره حرمه کسدی عدو

تشنه لر خیمه ده سسلندی عمو

عمو رحم ایله ربابین گولونه

بیر ایچیم اصغره احسان ایله سو

قدغن اولدی سو اهل حرمه

ایش قالیب صاحب مشک و علمه

کربلاده بو گئجه محشر اولوب

بانگ یا فاطمه صحرایه دولوب

اسدی محنت یئلی حیدر باغینا

فاطمه گللری ظلمیله سولوب

قدغن اولدی سو اهل حرمه

ایش قالیب صاحب مشک و علمه

تشنیم زمزم و کوثریوه یاحسین

تشنیم زمزم و کوثریوه یاحسین

آندورم سنی اصغریوه یاحسین

آدیمی یازگیلان دفتریوه یاحسین

ای سپهرکرم من سنه نوکرم

یاحسبن جان یاحسین جان(۴)

بو محرمده ده سوز و نوا ایستیرم

چاغیروب آدیوی قلبه صفا ایستیرم

اربعینده آقا کرب وبلا ایستیرم

اللها شاکرم نوکرقاصرم

یاحسین جان یا حسین جان(۴)

قاره کوینگ گیوب شال عزاسالموشام

درگهونده اوشاقلیقدان آقا قالموشام

افتخاریمدی هیئتونده قوجالمیشام

ای شه تشنه کام ذکرون علی الدوام

یاحسین جان یاحسین جان (۴)

سنون آدون وروب شیعه لره آبرو

حرم پاکیوی ایلیوروک آرزو

قانیله آلموسان مقتل ایچینده وضو

ای آدون دلنواز ای شهیدنماز

یاحسین جان یاحسین جان (۴)

افتخار ودلیر عربی یاحسین

زاده فاطمه بانصبی یاحسین

جان فدای توکه تشنه لبی یاحسین

شاه آزاده ای خون به دین داده ای

یاحسین جان(۴)

ای شه باکرم سیدبنده نواز

محیی امر اسلام وجهادونماز

بربهشت خدانام توباشدجواز

ای به دردم دوابرهمه مقتدا

یاحسین جان(۴)

بو گجه خلقتین آفاقینی ماتم بورویوب

بو گجه خلقتین    آفاقینی   ماتم بورویوب

بو گجه عالم امکان اورگین    غم بورویوب

بو گجه کرب و بلا منطقه سین چم بورویوب

بو گجه نهر   فراتین یولونی باغلادیلار

بو گجه حضرت زهرا اورگین داغلادیلار

بو گجه دشت غم افزا ده اسوب باد بلا

بو گجه یر دن اوجالدی گوگه فریاد و نوا

بو گجه صبحه کمین یاتمادیلار آل عبا

بو گجه غم بولوتیندان یری غم چولقالیوب

بو گجه   غملری   زینب    اورگینده  قالیوب

بو گجه  کفریله ایمان آرا وار جنگ و جدل

بو گجه  نوریله ظلمت قوشونی ایلور عمل

بو گجه  حضرت عباس حسینه وروب ال

بو گجه  لیل حماسه بو گجه لیلهء جنگ

بو گجه  عرصه نی عباس ایلیوب لشگره تنگ

بو گجه خیمه ده اظهار  عطش  بر پادی

بو گجه نهر فرات اوسته بیوک غوغا دی

بو گجه اکبر        لیلا    حرمه    سقا دی

بو گجه   رزمگه    عشق ده      شیر ازلی

بو گجه ال اله ورمیشدی ابوالفضل و علی

بو گجه اصغره گهواره ده آغلوردی رباب

بو گجه زینبین الله اورگی اولدی کباب

بو گجه لیلی   بیچاره نجه ایلدی تاب

بو گجه صبح   قیامتدن   علامت  واردی

بو گجه خیمه ده بیر آیری قیامت واردی

بو گجه وحشته سالمیشدی چولی قوم بخیل

بو گجه هر   بالا   بیر    یاندا    پریشان و  کسیل

بو گجه لیلی نی   عباسه علی سالدی دخیل

بو گجه یاندی   ایکی  اودلی اورکلر آلشوب

بو گجه نچه ائلین لالی آچوب دل دانشوب

دونیدی قانه ، سویی فراتین

دونیدی قانه ،  سویی   فراتین

او دم  کی چولدن ، چوله آخوردی

او  آب  نابه ،سوسوز اوشاقلار

ئورکده حسرت،یانوب باخوردی

             ((حسین حسین جان (4))            

  

یقین  کی  شرط   بقا  اولوبدی

خلایقه     سو     فلکلره     سو

ولی  بو گوندن  فرات  آلیشدی

وُروبدی  آتش   ئورکلره   سو

بلا  چولونده  نه  شاه ایچوبدی

نه قسمت اولدی کمک لره سو

بو رسمِ  شرع  مبین دی؛هرآن

سو  ایچدیرللر  کسنده   قربان

علاوه  ،  لازم دی  هر  مکاندا

کی حرمت اولسون گلنده مهمان

ولی او چولده نه حرمت اولدی

کسوبله شاهن باشین لب عطشان

سویون جفاسی او قانلی چولده

سوسوز بناتی  نه حاله سالدی

کسوبدی  راه    فراتی   اشرار

عطش   نواسی   فضانی  آلدی

سو جامی الده سوسوز اوشاقلار

دیولـله   سقا    هایاندا   قالدی

قالوبدی اوچ گون او آبه حسرت

منای  غمده   گوزی   ربابین

سوسوز بالانین عطش نواسی

آلوب  قرارین    او   دلکبابین

وئروبدی بیراوخ سو وجهینه قان

ائوین  ییخوب   آل   بوترابین

عطش  فغانی  دوتوب  خیامی

بالالار  آغلور   آنالار   آغلور

دولوبدی  دشته  نوای   اصغر

اونون  نواسی   ربابی  داغلور

گوروب کی چاره یولی کسیلمیش

الین   بالانین   طنابه   باغلور

سیزیلدور آغلور رباب او حاله

دیور ؛ امان    اشقیا     الیندن

الهی   سالدی  سویی  حصاره

بو  فرقه   آل   عبا      الیندن

منیم گولوم آز قالور کی سولسون

بو چولده  خار   جفا     الیندن

پیمبراوغلی سوسوز وئروب جان

ئولوب لب عطشان سویون یانیندا

ئوزی بالاسی  سوسوز اخاسی

سووا  باخوبلار ئولوم  حالیندا

سالوبدی   دیلدن   او  باغبانی

صولوب سارالدیب گولُستانیندا

حسین  بو   آب   فراتی   نیلور

اونی   گوزتلور  جناندا   کوثر

ئوپر   دوداقین   بهشت   حقده

می ِ  طهور   و   زلال    ساغر

آلاللار    آب      حیاتی    والله

حسین الیندن گوی اهلی یکسر

دئنن «مُصَـیّب» سوسوز امامه؛

او  نهر غمده  ازل  گؤزوم وار

ئوزون   براتین    عنایت   ایله

نه عمر قالدی نه ده  دؤزوم وار

خدا  بیلور  کی  او  قانلی   آبه

یانان ئورکدن نئچه سؤزوم وار

ای حسینین عاشقی گل عشقی دلبردن سروش

ای حسینین عاشقی گل عشقی دلبردن سروش

معنویت درسینی آزاده حیدردن سروش

یاور دین اول دلیلین یار و یاوردن سروش

زر گزوب زر قیمتین گت خبره زرگردن سروش 

رمز جنت آختارورسان حی داوردن سروش

یا فرات اوسته کسیلمیش قانلی اللردن سروش

گرچه جنت گورمگه بیر عمریدور آمادیوک

جنت اعلا حسیندور بیز حسین مشتاقیوک

بوشلا سن آل سعودی چوخ بیوتمه مطلبی

دوت حسینین دامنینن بوشلاما بو مکتبی

شیعه اثنی عشر حقدور یاپیش بو مذهبی

ور خبر آل سعوده شیعه نین وار بیر دبی

کشور زهرایه گر؛ چپ باخسا حتی اجنبی

جنگ خیبرده نجه حیدر یخیبدی مرحبی

ایلروک تکرار جنگ حیدریلن مرحبی

سر در یثربده ویروک پرچم یا زینبی

دست بیعت ورمروخ بیز فرقه شیطانیلن

مونس اولماخ چوخ چتیندور خود فروش انسانیلن

فرقی واردور شیعیانین دشمن قرانیلن

شیعه نین چون پرچمی گویلرده دی سلطانیلن

باغلاروخ پیمان اباالفضل باغلیان پیمانیلن

دشمنین وروخ جوابین منطق و برهانیلن

کعبیه حک ایلروخ باخط زیبا و جلی 

مرگ بادا بر وهابی؛مرگ بر ضد علی

آلموشوخ عباسیدن بیز عمده غیرت درسینی

عبد صالح کربلاده وئردی همت درسینی

ایستسه هرکیم آلا بو یولدا عزت درسینی

اول اورگشسین گرک آداب و عفت درسینی

ایلدی عباس او گون اتمام حجت درسینی

شیعه لر ورسون سعوده ایندی غیرت درسینی

آز قالور آل سعودین خانه سین ویران ایدک

کربلا تک کعبیه بیز کارت ملینن گدک

عاشقم حسن ملک منظره یا ثارالله

عاشقم حسن ملک منظره یا ثارالله

آقاسان ایله نظر نوکره یا ثارالله

غم وآلامه مگر منده دوزوم واردی آقا

دئمرم اوزگه لره دلده سوزوم واردی آقا

بیلورم چوخ آقاسان سنده گوزوم واردی آقا

سنون آدوندی دوشوب دیللره یا ثارالله

رشته عشقوی من بوینوما سالدیم گوروسن

ئوز قاپوندا نچه ایل فخریله قالدیم گوروسن

سنون عشقئنله بو درگهده قوجالدیم گوروسن

بویور عباسه یازا دفتره یا ثارالله

چوخی محشرده بهشته گوره دلخوشدی حسین

وئرمرم جنته حسنون اورگیم خوشدی حسین

چوخ گوزوم وار کسیلن الده الیم بوشدی حسین

منیده سسله لب کوثره یا ثارالله

دولانیم باشینه سندن اوتور اشکی آخانون

دیلی یانسین دل عاشقلروه اود یاخانون

گوزی چخسون قره پرچملروه کج باخانون

عشقیمیز وار قره پرچم لره یا ثارالله

آندا اولا اکبروین نیزده قانلی باشینا

زینبون یدی برادرده اوجا قارداشینا

اصغرین باغلی قالان اللرینه گوزیاشینا

سنسن امیدیم آقا محشره یا ثارالله

چکدی گوداله طرف قافله نی شمر دنی

تاپدی زینب او چتین وقتیده عریان بدنی

دئدی کیم سالدی بو احواله آنام اوغلی سنی

بو نه عالمدی بو نه منظره یا ثارالله

باغ طاهایه عجب باد خزان اسدی حسین

ساربان هیچ دئمدی بو یارالار بسدی حسین

یاندیروب فاطمه نی اللروی کسدی حسین

یانورام بو کسیلن اللره یا ثارالله

باجون ئولسون یانورام اشکی یوزه باغلیورام

باخورام یارووه گوینور اورگیم آغلیورام

آغلیورام ناقه لر آغلور سینمی داغلیورام

یانورام عود کیمین مجمره یا ثارالله

واردی حقیم ائلسم حشره کیمی شیون و شین

من گورنده کوره گون اوسته یخلمشدون حسین

نجه دوشدون یوزون اوسته یره ای نور دو عین

ائتمرم شکوه حق داوره یا ثارالله

زینبه لطفوی الساعه تمام ایله حسین

دئمورم دور ایاقا قصد قیام ایله حسین

آناما جدیمه مندنده سلام ایله حسین

دی که زینبده دوشوب چوللره یا ثارالله

فاطمه عطری گلور جانه قزل قانوندن

سن دانش دیده گلن غصه لی مهمانوندن

دانشوم منده سنه شام غریبانوندن

گور نلر چکدی باجون یکسره یا ثارالله

گلدی ای دیار غم مهربان قوناقلارون

گلدی ای دیار غم مهربان قوناقلارون

سنده بیر گونی اولار باغریقان قوناقلارون

قارداشیم دیدیم قورا عترته خیامیمی

دین حکومت ایلیه باشلادیم قیامیمی

حقی اختارانلارا ویرمیشم پیامیمی

دین ایاق دوتار اگر ویرسه جان قوناقلارون

سنده ای بلا چولی نوح و ادم اغلیوب

ایری انبیا دوتوب سنده ماتم اغلیوب

شرح حالیمی دوتوب چشم خاتم اغلیوب

گوزلیور بلا گونون ناگران قوناقلارون

اکبریم اولار هدف قتلگهده خنجره

بنذیر باشینداکی زخمی زخم حیدره

فوج اشقیا وورار داش یاراسی اکبره

باشی اوسته باش یولار ناتوان قوناقلارون

نخلزاری مشکی پر صاحب علم گزر

مرکب اوسته مقتلی قوللاری قلم گزر

مشکی اوخلانار پوزار محنت و الم گزر

گوز تیکر یولا سویی اختاران قوناقلارون

اوخ دگر بوغازینه اصغر امتیاز آلار

فاطمه بهشتیده لای لایین اونون چالار

خیمه ده ربابینه بو بشیک نشان قالار

ساخلیار عزا اولار نوجه خوان قوناقلارون

رای کردگار حق سانما سنده یوخلانار

باغلابار سویون یولی تشنه قلبیم اوخلانار

فاطمه ننه م گلر دلده دردی چوخلانار

ترک جنت ایلیر موکنان قوناقلارون

سنده غملی زینبون غصه قلبینی سیخار

حد سد صبرینی سیل درد و غم سیخار

پیکریمی گورمگه تلون اوستونه چیخار

سسلیله زینبی قورخوشان قوناقلارون

قافلم یتیشدی کربلایه زینب

قافلم یتیشدی کربلایه زینب

حاضر اول بو یرده هر بلایه زینب

گللرون سولان یردی

زلفیوی یولان یردی

بو بلالی صحرا ( 2 )

من شهید عشقم مدفنیم بو یردی

سرور حجازم مسکنیم بو یردی

عندلیب عشقم گلشنیم بو یردی

باصفا گلستاندور

خوش هوا بیاباندور

بو بلالی صحرا ( 2 )

من خلیل عشقم گلمیشم منایه

صابرم بلایه راضیم قضایه

غبطه وار مناده دشت کربلایه

کعبه دن مجلّلدی

شاه عشقه مقتلدی

بو بلالی صحرا ( 2 )

کشف اولار بو یرده دلده کی مرامیم

دشتگاه ظلمی محو ایدر مقامیم

آخِرین مسیریم بهتریم مقامیم

بو دیار پرغمدور

رتبه ده معظّمدور

بو بلالی صحرا ( 2 )

تیز قالار بو چولده قارداشون اوغولسوز

اشقیا قویالّار بو غریبی یالقوز

قلبیمه وورولّار بیر خدنگ دلسوز

خاک خونیله هردم

یاره مه قویار مرهم

بو بلالی صحرا ( 2 )

ای آنام بتوله باوفا صبیّه

شان و منزلتده مریم سویّه

سندن اوتریدور بو تلّ زینبیّه

ظهر روز عاشورا

قانیله اولار دریا

بو بلالی صحرا ( 2 )

گوگلومه بو یرده غم گلور غم اوسته

دوغرانار ابوالفضل نهر علقم اوسته

زلفیوی توکرسن اوخلی سینم اوسته

تیترر آه و زاروندن

آه شعله باروندن

بو بلالی صحرا ( 2 )

اکبریم ویرر جان زینبا بو یرده

اصغریم ایچر قان برملا بو یرده

باشیمی کسه لّر اشقیا بو یرده

جای امتحانیمدور

آخِرین مکانیمدور

بو بلالی صحرا ( 2 )

جان کیمی بو صحرا جانیمی قوجاقلار

شان و منزلتده کعبه نی قاباقلار

پاره پاره جسمی سینه سینده ساخلار

اکبریم ایاقیمده

اصغریم قوجاقیمده

بو بلالی صحرا ( 2 )

ایمدیدن سرشکون باغلاما عذاره

اسمیوب سموم غم بو لاله زاره

اُلمیوب حسینون گلمه آه و زاره

اوندا آغلا اول غمگین

قانیله اولار رنگین

بو بلالی صحرا ( 2 )

قارداشون قالاندا شمر الینده آغلا

تشنه جان ویرنده آغلا سینه داغلا

ویرسه شمر مهلت گوزلریمی باغلا

حالیمه یانور گویلر

لرزیه دوشوب تیترر

بو بلالی صحرا ( 2 )

شیعه لر اولولّار بو یره مسافر

شهلر ایستور اولسون قبریمه مجاور

اولسا گر «کریمی» من غریبه زائر

عرض ایدر نه غوغادور

گور نه محنت افزادور

بو بلالی صحرا ( 2 )