ای شیعه بوعزاده گلمیش نوایه زهرا
گه مصطفایه آغلار گه مجتبایه زهرا
پیغمبرین فراقی سالدی قلوبی درده
دوتدی مدینه شهرین غم آخرصفرده
آچدی باشین صحابه داغ عزا جگرده
الدن وئروب آتاسین دوشدی بلایه زهرا
معناده دخت طاها محزون و دلغمیندی
چونکه ایکی عزیزه یاس ساخلاماق چتیندی
غملر اولوب مقارن روز عزای دیندی
آهیله شعله ورمیش ارض وسمایه زهرا
ظاهرده گریوخیدی اوندا حسن آناسی
باطنده قوزانوردی افلاکه آه و واسی
آغلار گلر فغانه باشدا اوغول قراسی
همسایه دور بقیعده اول مه لقایه زهرا
تاگوزلرین جهاندان یومدی رسول معصوم
زهراگئدوب شهیده اولادی اولدی مظلوم
ظلمیله مجتباسی زهر ایچدی اولدی مسموم
تبدیل ائدوب جنانی ماتم سرایه زهرا
ماه صفرده یاران قلبی یانوب بتولین
توأمدی مجتبانین یاسیله چون رسولین
بیرآیری غمده پوزموش حالین او دل ملولین
یعنی الی اورکده آغلار رضایه زهرا
اوچ ماتم اوچ مصیبت دوتموش تمام دهری
قاره گیوب خراسان بیرده مدینه شهری
ایچدی ایکی بالاسی بیداد الیله زهری
اللهه ظلم الندن ایلرگلایه زهرا
ایرانین اهلی ایلرعرض ادب رضایه
هم واردی یثرب ایچره اجلال مصطفایه
امابقیعده یوخدی بیرصحن مجتبایه
تپراقلار آلتدا آغلار اول باوفایه زهرا
