السلام ای دختر موسی بن جعفر السلام
نور چشم حضرت زهرای اطهر السلام
وقریوه قربان اولوم ای بانوی صاحب وقار
سن قمون بو شوره زارین ایلیوبسن لاله‌زار
سندن اؤزگه آی خانیم! بو شور تؤپراقدا نه وار؟
ای قمون تؤپراقینه زیبنده زیور السلام
ای حریم باصفاسی قبلۀ حاجات اولان
رحمت و احسانی کلّ عالمه اثبات اولان
نور نابی عرشیانه، جلوه‌لی مشکات اولان
کهکشان عشقیده تابنده اختر السلام
سنسن عالمده اولان امیدگاهی شیعه‌نون
رحمتوندور دهریده پشت و پناهی شیعه‌نون
سنسن هر ایکّی جهاندا تکیه‌گاهی شیعه‌نون
گؤستررسن لطفیوی هر کیمسه سسلر السلام
قرب یکتاده فقط معلومیدور جاهون سنون
ایلیوب قم اهلینه چوخ لطف اللهون سنون
نیلورم من جنّتی، جنّتدی درگاهون سنون
افتخاریلن دئیر قم اهلی یکسر السلام
دردیمیز اولسا خانیم سندن دواسین ایستروخ
عالم عشقین گؤزل شور و صفاسین ایستروخ
گؤزده گؤزیاشی حسینون کربلاسین ایستروخ
ایلیوب هجران بیزی مغموم و مضطر السلام
مظهر الطاف ذات حیّ یکتاسن خانیم
اؤلکه‌میزده یادگار آل طاهاسن خانیم
جان سنه قربان! عزیز جان زهراسن خانیم
ای اولان صدّیقۀ کبرایه مظهر السلام
اوخشارون وار هر جهتده حضرت صدّیقیه
عزّت و اجلالون اوخشار عزّت صدّیقیه
آند اولا شأن و جلال و شوکت صدّیقیه
کیم سلام ائتسه سنه زهرایه ایلر السلام
