ای قلم مطلبی یاز سقاّدن
یاز او سقّای جهان آرادن
هر یره ساطع ابوالفضل نوری
مجلسه شور سالوبدور شوری
اسم اعظمدی ابوالفضلین آدی
دیله محرمدی ابوالفضلین آدی
مظهر نامی درخشان الماس
داریخاندا دیرم یا عباس
آدینین فضلی یوخی هست ایلر
آدی حورالری سر مست ایلر
نهضت اللهه آدی پیرایه
قوللاری دینه آغیر سرمایه
ائشیدنده آدینی مست اولارام
قلبیمی فانی جهاندان یولارام
شاهلیقی وئرسه له من ردّ ائدرم
راهِ کِبری ئوزومه سدّ ائدرم
دیرم مست ِ گل یاسم من
نوکر حضرت عبّاسم من
بو مقامیله من اعجاز ائدرم
شاهلارین شاهلارینا ناز ائدرم
رهرُو دربدر بیر راهم
بو شاها نوکر اولاندان شاهم
بیر شهین نوکریم کی تایی یوخ
دهریده عاشق و دلبسته سی چوخ
نه ابوالفضل آقا اوغلی آقادی
هر زمان ورد زبانلاردی آدی
هر قدر گر وئره قیمت آقاما
گئنه ده بوشلیدی غیرت آقاما
الّلهیم هر نَیی بی شک یارادوب
آقام عباسی ولی تک یارادوب
بوشلیدی نام شجاعت آدینا
ویریلوب سکّه ی غیرت آدینا
سایه سینده هامی عالم دایانار
باشیندا فوج ملائک دولانار
نفسینده دم عیسا یارانوب
صورتی ٬ سیرتی غوغا یارانوب
قدمی ظلمتی جنّات ایلر
نظری ردّ طلسمات ایلر
گوزلری جلوه گه غوغادی
قاشلاری فلسفه دی معنادی
کرمی شاهلاری ایلر بنده
قامتی سرولری شرمنده
غیرتی ٬ همتی داغ داشدان آشار
آدینا باب الحوائج یاراشار
گل یاس عطری اونو یاس ایلوب
آقامی غیرتی عبّاس ایلوب
واریدی صولتی سقّا اولدی
دهریده غیرته معنا اولدی
چوخ گوزل داش اُولی الماس اولماز
قهرمانلار گله عبّاس اولماز
جنگیده قورخوسی یوخ دعوادن
درجه اخذ ائلیوب مولادن
جنگینه عرصیه وارد گلدی
یعنی اُول صحنیه مارد گلدی
دئدی سر لشکر اُردویم من
قانوین تشنه سی زالویم من
چکرم قتلوه تیغ ِ الماس
ماردم یاخشی تانی یا عباس
بورا میدان نه دبستاندی بورا
بیلگینن قورخولی میداندی بورا
نیزمه توش اولا کیم فانیدی
جنگیمه کیم گله مرگ آنیدی
رحم قیل جانووه روی ماهه
رحم قیل خیمه ده نالان شاهه
آنوی یاسوه اگلشدیرّم
سنی تیغ آلتینا من گشدیرّم
خنجریم تیزیدی طغیان ایلر
سنی ئوز قانوه غلطان ایلر
فکر خام ایلموسن چوخ عباس
قاچماقا راهِ گذر یوخ عباس
گَتدی عباسی بو سوزلر جوشه
دئدی شیرم نه دیوم خرگوشه
رجز انشاد ائلدی شیر اوغلی
عرصیه لرزه سالوب میر اوغلی
آدیم عباس حسین دلخواهی
ایلیور عالمه شاهنشاهی
قورخودا غرقسن ای پست سیر
شرّیوی خنجر عباس کسر
هرزه گیاهسن ٬ الماسم من
گوزی سیل تانی عباسم من
مرد شمشیر عملدن بلّی
قدرتی جنگ و جدلدن بلّی
آتینی پیلدی مارد آنی
باغلانوب شعر و رجز دکّانی
ایلدی حضرت عباسی هدف
آتدی بیر نیزه ابوالفضله طرف
دئمه نیزه او یَلی قورخوتدی
نیزنی گویده وسطدن دوتدی
دوشدی تشویشه هامی لشکرده
قان گوروندی سپر و خنجرده
بیر بیره چاتدیلار اول اثناده
تن ماردده قوی سقادّه
مارده دست خطر گورسندی
آقادان فوق هنر گورسندی
اللرون وار اولا قدرت یارادان
ماردی بُولدی ابوالفضل آرادان
مو قعیّت اولونوب چوخ حساس
دئدی دشمن ئوزی احسن عباس
یدّی گوی سسلدی ماشاالله
گورمیک داغووی انشاالله
سس قوشوب گویده گویه مین حورا
ایلیوبلر آقام عباسه دعا
بونی چوخ گورمه حسینه یارب
راضی اولما قالا آغلار زینب
بو مصیبتده حسین تنهادی
داغینی گورسه اگر غوغادی
وحید