مهدی ای صاحب زمانیم هارداسان
ای اولان ورد زبانیم هارداسان
ای آخان بو رگده قانیم هارداسان
ایله بیر یول صورت ماهون عیان
سن عیانسان گرچه من بیّلم نهان
بنزورم هجرونده بیر فانوسه من
اولما راضی تا دونم مأیوسه من
قوی ایاقوندان آلوم بیر بوسه من
تا اولا شیرین دهانیم وصلیدن
دویموشام چون من آقا بو فصلیدن
گل فدایم قامت رعنا ئوه
یوسفا باخ غمزده شیدا ئوه
آندا وئروک بیز ننون زهرا ئوه
بیر حجابون پرده سنیدن چیخ آقا
کاخ ظلمی ئوز الونن ییخ آقا
هارداسان گل ذوالفقار حیدری
ای سپاه غیرتون سر لشگری
گل آقا قطع ایله نا اهل اللری
اولماز عالمده ئوزوک قاش سیز اولا
راضی اولما شیعه لر باش سیز اولا
گوللری گلزاریده خار ئولدورور
عاشقی محکوم ائدوب یار ئولدورور
شیعه نی گور طعن اغیار ئولدورور
طعنۀ اغیاره بیز توش اولموشوق
ظلم الیندن گور سیه پوش اولموشوق
قدیمیز تبعیضیدن خمدی آقا
اشکیدن بودیده لر نمدی آقا
هر نقدری من دئسم کمدی آقا
که دیل بازایلین مزدی کتکدور
آقا گل مهدیا وقت کمکدور
یوخسولون ایامی هر گون قاره دی
اولماسا پارتی کیمون بیچاره دی
اهل وجدانونده قلبی یاره دی
اینجیور یوخسول آقا تبعیضیدن
وارلیلار دویمور ولی تعویضیدن
بیر جهازیه باخور اون میلیونا
ئوز دوتور بیکس آتا بوندان اونا
نه کوچوردور قیز نه ده طوی اوغلونا
بعضی لر ماه عسل لندن ده دی
چوخ آنا اولادیدن شرمنده دی
وارلی هاردا یوخسولی یاد ایلیور
قونشودا همسایدن داد ایلیور
چون جوان اوغلون کی معتاد ایلیور
اوجونا افیون قویوب فورا قاچار
وقتی اولسا ضبط ماشینده آچار
جشنواره وار قویولار روز پاک
روز حفظ منبع آبیله خاک
لیکن اللرده گزور تُن تُن کراک
نوجوانلاردا آقا آلوده دی
گول کیمین باشین اگوب پژمرده دی
گل کی قیزلار باز ائدوللر مولرین
گورکی اوغلان آلدیرور ابرولرین
رنگ ائدور بعضیلری گیسولرین
گرکی گورسون اوغلانون خطلی قاشین
بیل سالوبدی باشه ماهواره داشین
گل جوانلاردان چوخی بیکاردیلار
بس ائدولر غصه غم بیماردیلار
یاتمیولار صبحه جک بیداردیلار
گورموشم دیپلمه آبدارچی اولوب
یا کی پارکلاردا بیر آل وِرچی اولوب
گل ریا اهلی ریاست آختارور
بو عوام ملت سیاست آختارور
گه سیاستدن قداست آختارور
گور بو انسان خصلتی هفت رنگیمیش
ایش تعجب ایلمه گر لنگیمیش
حرمله ئولدی ولی واردی هله
مین اوشاقین حلقین حاضردی دله
تا کی بیر مدت ایش اوستونده گله
داده مظلوملار سنی ایستور آقا
ائت نظر سن لطفیلن بو توپراقا
تانینمور کذبیلن گفتار صادق
بیلینمور کیمدی ایری کیمدی لایق
هوس بازلار اولوبلار ایندی عاشق
سچن یوخدی بوگونلر گرگ و میشی
بیلینمور کیمدی عورت کیمدی کیشی
نه هر کیم مسجده گئدی امامدی
نه هر کیم قاره گیدی خوش مرامدی
باخاندا بعضیسی شمر تمامدی
حسینده ایستمور سندن بویاسی
گتیرمه سن ائوه اموال ناسی
مینور واحدلره وئرمور کرایه
اولوب حقیم دیور چوخ یرده ضایه
اوخور قرآنیده آیه به آیه
بابا والله حرام ایله حرامدی
تو من فرق ایلمز سوز بیر کلامدی
حرام پولدان حسین احسانی نینور
نزول مالدان آقام قربانی نینور
ریادن دیدۀ گریانی نینور
حسین ایستور عزای صادقانه
ووراندا سینه وورسن عاشقانه
ورور سینه باخور نامحرمه گوز
یازوم من دفتره ایندی نجور سوز
آقا سال سینووه بو محنته دوز
چالور روز شهادت طبل وسازی
سوروشسون سخت بیلر ذکر نمازی
حسین وئردی نماز اوسته حیاتین
ئوزی ئولدی اسیر وئردی بناتین
اقلی سنده قیل گونده صلاتین
وئرلر مزد جبینون دگسه خاکه
وئرلر باغ جنت قلب پاکه
بو سوزلر کی دئدیم ایرانه باغلی
بوسوزلردن اولوبدی سینه داغلی
اشاره ایلدیم منده اوزاغلی
که آگهسن ئوزون ای پور زهرا
ائدور کینه بو دینه قوم اعدا
چاتور ظلم و ستم اسلام نابه
دگور خنجر زنان با حجابه
داریخدوق دای جمال آفتابه
اوزاندی چوخ گجه گل ای سپیده
سنی وروک قسم بیز او شهیده
گلور اخبار بد گونده قولاقه
دورون ای شیعه لر سیز ده ایاقه
یهودیلر دولور خاک عراقه
سالولار شیعه نی گونده حصاره
آقا گل ختم اله سن بو فشاره
چیخور روباهیلر شیر بیشه سیندن
دریغ ائتمز تبردن تیشه سیندن
ورولار شیعه نون دوز ریشه سیندن
ائدولر حمله های انتهاری
یخور مسجدلری بمب انفجاری
بقیع اطرافینه دیوار چکوللر
قوتاردی یر او یرده برج تیکوللر؟
مگر پیغمبره قائل دگوللر؟
اوزاقداندا نگاهه یوخدی امکان
سنی سسلور هرایه خلق ایران
قویا حاجی دئنن ئوز هانسی یانه
تاپانمور قبر زهرادن نشانه
توکور اشکین عذاره یانه یانه
دیور حجّه گلیدی مهدی ای کاش
قوییدی قبر زهرایه نشان داش
بو شهری گل آقا آباد ایله سن
سینیب قلب احبّا شاد ایله سن
بقیعنون توپراقین آزاد ایله سن
که سنسن شیعه نون تنها امیدی
سیه شبدن صورا واردی سپیدی
بو شعره ائتممیشدیم منده نیت
ثوابینده شریک اولدی او ( فکرت)
حسنیچی مخلصه وئرسنده عزت
نظر قیل "صبرینون" اشعارینه سن
ائدوم رفتار یازان گفتاریمه من
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.