زینبون غربتده قارداش جان ویرور جان آختارور
گوزلری گوزلر یولون جان اوسته جانان آختارور
ای وجودون دستگاه آفرینشدن غرض
چوهر ذاتوت قبالینده یارانمیشلار عرض
گلموشم سن جان ویرنده سنده گل ایله عوض
مهربانین بو چتین ساعت هر انسان آختارور
بیر سنون من تار عشقونله وفا پابستیم
سندن اوتری مین لریله غم الیندن خستیم
سنده یاد ایله منی بو صون نفس جان اوستیم
آخر ای روحیم سنی بو قالب جان آختارور
صبحیم عاشورا گونوندن گوزده شام اولموش منیم
سن باتان گوندن قانا قان باغریما دولموش منیم
لاجرم چوخداندی عمریم گلشنی سولموش منیم
بو سولان گل ای گلوم سندن بهاران آختارور
حس فطریدور سور هر باجی اوز قارداشینی
آغلیاندا هر باجی قارداش سیلر گوزیاشینی
باجی جان ویرسه آلار قارداش دیز اوسته باشینی
باجی قارداشدان همیشه لطف شایان آختارور
سایه لطفون برادر لطف ایله سال باشیمه
باخ فراقونده عذاریمده بو قان گوزیاشیمه
قالمیشام حسرت سنون تک مهربان قارداشیمه
ای گوزوم نوری سنی بو چشم گریان آختارور
گوزلریم هر لحظه ارداش انتظاروندور سنون
اللریم سینمده جان تک ساخلیوب پیراهنون
آرزو ایلردیم اولسون خوابگاهیم مدفنون
بو دل محروم وصلوندن نه حرمان آختارور
یوخدی غربتده یانیمدا بیر نفر اهل وطن
گوزلریم قالموش یولوندا نه گلن وار نه گیدن
ایمدی بولدوم نه چکر غربتده یالقوز جان ویرن
یاندیرا دنیانی آه آتش افشان آختارور
منتها اخلاصیله پیمانیمه ایتدیم وفا
ثابت اولدوم عهدیم اوسته هر یانا چکدی قضا
چون بولوردوم ارتضانی حیّ سبحان آختارور
ایتمدیم راه وفاده ذره جه دلدن گله
باغ محنتده دروب هر غم گلون یغدیم اله
نخله اندوه و غم ایمدی یتوبدی حاصله
بیر یارالی باغبان بو دل پریشان آختارور
گل اوزون بو صون نفسده گور باجون احوالینی
لطف الیله سیل یوزوندن قان سرشک آلینی
ایلرم ظاهرده گرچه مرگین استقبالینی
زینبون جان بذلینه بیر اهل قرآن آختارور
ای یوزی آئینه قدرت نمای ذوالمنن
بو گنیش دنیا ایوی سنسیز منه بیت الحزن
ای وجودی بی کفن گل زینبه ایله کفن
احتضار حالینده زینب لطف و احسان آختارور
دیو سیرتلر جفاسی الدن آلموش اختیار
دلده سوز نار هجران گوزده اشک لعل وار
بو بساط احتشامین باده ویرموش روزگار
مور تک جان تحفه سی الده سلیمان آختارور
گیتمیوب دلدن برادر دلده کی مهرو وفا
آدیدی ذکر ایلدیقجا دل تاپار ذوق و صفا
جان ویرنده سو دیدون سو ویرمدی اهل جفا
زینبون گوز کاسه سین دولدورموش عطشان آختارور
زینبم قارداش یولوندا تیر غم آماجیم
قتلگهده قانوی زلفه یاخان بیر باجیم
ایمدی آخر عمریده بیر لطفوین محتاجیم
صون نفسده زینبون لطف فراوان آختارور
قتلگهده من گلنده یانوه عطشانیدون
فرش خاک تیره اوسته قانوه غلطانیدون
گون قباقینده یارالی جسمیله سوزانیدون
قتلوه گوردوم که قاتل تیغ برّان آختارور
جان ویرنده سن یارالی تپراق اوسته دلکباب
واقعا جای عجبدور اولمادی عالم خراب
غرق ظلمت ایتدی دنیانی گوروب تا آفتاب
حنجرون خنجر دمونده آب حیوان آختارور
آند ویرّم من سنی زینب حسین قارداشوه
قارداشوندان اوتری بیر عمری آخان گوز یاشوه
ایسته گلسون (سائل) و (سالک) دولانسون باشوه
قبریوی بیر عمردور بو ایکی نالان آختارور
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.