ای قلم دفتره ثبت ایله بو سنگین محنی
سالاجاق حیرته دنیا بویی هر مرد و زنی
کنج ویرانه ده بیر دختر شیرین حرکات
قدرت عشقینه هر اهل دلی ایلدی مات
نجه قیزبرج محبتده گوزل اولدوزیدی
آزیدی سنی ولی باشدان ایاقه دوزیدی
نجه قیز صورت زیباسی اونون آی پاراسی
تاج عزتدی اونا باشدا کی اکبر قاراسی
نجه قیز با ادب و واقف هر مطلبیدی
بودا ئوز قارداشینا خرداجا بیر زینبیدی
نجه قیزفاطمه تک صورت سیماسی گوزل
دردی طولانی قصیده ولی آز عمری غزل
نجه قیز هر باخیشی مین دل شیدانی آلور
عفت و عصمتی زهرا ننه می یاده سالور
قورخولی چولده قالوب نیمه شب بیکس ویار
توخانوب داغ داشا از بس ایاقی اولدی قبار
زجری رسوا ایلدی منطق بس محکمیلن
مینمدی بیر آتا باخ غیرته نامحرمیلن
نجه قیز همت مردانه سینه حیرانم
عزت نفسینه عالم بویی من قربانم
وردی صدقیله وفا درسینی فرزانه لره
یانماقی اورگیدب عشق عالمی پروانه لره
قویمادی لشگرننگی تاپا یول دوره سینه
هیچ دونوب باخمادی بیگانه لرون سفره سینه
آج سوسوز قالدی ولی بیرکسه دردین دیمدی
صدقه گتدیله ویرانیه اصلا یمدی
باخ بو اوچ یاشدا قیزون همت و شخصیتینه
شبهلی لقمه ددی ننگیدی حیثییتینه
یمرم چونکه منه مایه ذلت اوخونار
هامیدان چوخ بو عمل اکبره والله توخونار
بیرگیجه منزل ویرانیه دلداری گلوب
هامی بیلدی بو قیزون شمع شب تاری گلوب
بوسه وردی لبینه عاشق مستانه کیمین
دولانوب باشینه بیر شوقیلی پروانه کیمین
نقد جان آلدی اله عشقینی اعلان ایلدی
یارالی باشه خانم جانینی قربان ایلدی
گوردیلر دوشدی او دم عاشق فرزانه یره
یخیلوب شمعون ایاقینده او پروانه یره
زینب غمزده بیلدی بالا مقصوده چاتوب
وصل یاره یتیشوب راحت و آسوده یاتوب
پوزولوب حالی اولده الین اتدی باشینا
تسلیت وئردی خانم ئوز یارالی قارداشینا
دیدی قارداش بالامون نسگلی یاندیردی منی
آج یاتوب چوخ گیجه واللهی اوتاندیردی منی
دوردی زینب بالاجا قیزلاری آرام ائلسون
کفن و دفنه ئوزالیلن خانم اقدام ائلسون
گرچه هرغصه یانان قلبینه اوچ پراوخیدی
چون اسیریدی الینده ایله امکان یوخیدی
قصره گوندردی سفارش اولار هی ایتدی درنگ
ظلمه باخ ویرمدیلر زینبه بیربیل و کلنگ
گوردی یوخ چاره گرک دفن اولا بو خردا بالا
سن ئوزون زینبه فکرائله قالوبدور نه حالا
گوزونون یاشی آخوب صورته چون ابر بهار
اللریلن بالیا قازدی خانم خردا مزار
متن تاریخه گرک بوغمی باشدا یازالار
کیم گوروب خرداجا بیرقبری الیلن قازالار
الغرض قبره قویوب زینب او شیرین دهنی
قاره بیرمعجره بوکموشدی گویرمیش بدنی
یوزونی آچدی خانم سسلدی ای اهل حرم
اود ویروب قلبیمه بوخسته اندو و الم
گیجه دفن اولماقی ارتردی اورکده بو غمی
ئولمگی یادیمه سالدی اورگی قان ننمی
گورمگه قیزلاراونون مه یوزون ایتدی عجله
شدت غصه دن آلدی هاموسی زلفون اله
اوگل یاسمنی بیرده گوره ائل توکولوب
گوردیلر ساچلاری اطرافینه تل تل توکولوب
باخدوقیجا او قیزا یاندی دل اهل حرم
قبریدن چیخدی خانم زینب غمدیده او دم
گوش ایدوب اهل حرم زینب زارون سوزونه
دیدی وار کیمده اورگ تپراقی توکسون یوزونه
گوزومون یاشینی خون دل زاره بلرم
اوقرا گوزلرون اوسته نجه تپراق الرم
هیچ بیری اولمادی راضی ال اتوبدر باشینا
چکیلوب دال دالی کیم باخدی اونون گوزیاشینا
گوردی زینب یتیشبدور ایش عجب مرحلیه
چاره سی یوخدی گرگ بیر آلاهی فکر ائلیه
دیدی اهل حرمه نظمیله به هم اوتورون
قبرینون دوره سینه هاله کیمین حلقه ورون
دولدورون اشگیله سیز دیده گریانلاروزی
اولون اماده آچون زلف پریشانلاروزی
یا حسینله ویرون سس سسه بیردن ملیون
ایکی اللی باشوزا تپراقی با هم الیون
ئوزوگون قاشی کیمین قبری آلوبلا آریا
چاتدی گور زینب زارون ایشی اخر هاریا
اذن ویردی هامسی حسرتیله گوز یاشینا
یا حسینله ال آتدی هامی بیردن باشینا
بوسیاق توکدیله تپراق او قیزون پیکرینه
نسگل اولدی بو عمل حشره کیمین ائلرینه
دفن اولوب بلبل شیرین سخن باغ وفا
نسگلی ایلدی اهل حرمی غرق عزا
دوشدی دیلدن هره بیر گوشه ده باچشم پر آب
باشلادی اوخشاماسین اللری قوینوندا رباب
دیدی ای قاره گله بختی گونی قاره قیزیم
ساربانلار ستمیندن اورگی یاره قیزیم
چوخ چوخ ایستردون علی اصغره لایلای دیه سن
حیف اولا اولمادی ویرانه ده گهواره قیزیم
قویمادی یثربه بو چرخ دنی چاتسون الیم
هی دیدیم صبر ائله آلام سنه گوشواره قیزیم
چوخ غمون اوخشادی دنیاده جوان قیناناما
رحمت واسعه حق او گرفتاره قیزیم
سنده آز عمر ایلدون اونکیمی دنیاده بالا
اوچ یاشوندان باشوا سالدی فلک قاره قیزیم
آند اولا فاطمه نون تز بوکولن قامتینه
آند اولا سینه زهراده کی مسماره قیزیم
آند اولا ایگیرمی بش ایل خانه نشین قیناتاما
آند اولا حقی باتان حیدر کراره قیزیم
گلمیوب گلمیجک سنکیمی اللرده اولن
نیلمیشدون دیمدون چرخ جفاکاره قیزیم
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.