ایتمز ابدا فکر زیان و ضرر عاشق
شمشیره اوخا سینه سین ایلر سپر عاشق
تا نخل امیدین ایلسین بارور عاشق
(دادو ستد عشقیده شوریده سر عاشق)
(بیلمز ندی نفع و ضررو خیرو شر عاشق)
شوقیلن آلار دلبر الیندن قدح و جام
مستانه چکر باشه اولار عاشق آلام
مینلرجه یزیدی ایلیر دهریده بدنام
(کام دل آلار کوی محبتده ویرار گام)
(بویولدا دیمه ذره جه ایلر حذر عاشق)
قرانه گوره کیم اولا جان ویرمگه مایل
جبریل ایلیر شهپرینی اوستونه حایل
یا کوی محبتده اولا عاشق کامل
(شهدو شکر دهری بیلر زهر هلاهل)
(اما قدح عشقیده زهری شکر عاشق)
عشاقین آلار طاقتین الدن غم هجران
دلدارینه تقدیم ایدر اکبر کیمی قربان
ایفا اولا تا روز ازل ایتدیگی پیمان
(هشتاده کیمی لیلینی بوشلار خط بطلان؟)
(تاریخینه مجنون جهانین چکر عاشق)
گه دیریده گه نیده ایدر طی مراحل
قانه باتار ایلر اوزونه مقتلی منزل
یتمیش ایکی قربان ویرر هر تک تکی کامل
(تیریله ساچار سینییه بیر دسته قیزیل گل)
(حاضرلر اوزون محضر یاره بزر عاشق)
قان آلتدا گورونمز بدنی سر نهان تک
قارداش غمی قدین خم ایدر ایری کمان تک
اوخلار اوتورار سینه سی اوستونده تیکان تک
(هرتیر جفا گلسه باسار باغرینا جان تک)
(عنقا کیمی پیکاندان آچار بال و پر عاشق)
آتلار ایاقی آلتدا دوشر جسمی نمادن
لب تشنه باشین ذبح ایلیر شمر قفادن
باش ویرسه ده چکمز الینی سیر صفادن
(باخماز توکولوب تپراقا افلاک وفادن)
(یتمیش آخار اولدوز بیر ایشیقلی قمر عاشق)
تاراج اولونار خیمه لری کرب وبلاده
بی غسل وکفن جسمی قالار دشت مناده
جاندان کیچر اگمز باشینی اهل عناده
(گه کوفه نی گه دیری گهی شامی جداده)
(خورشید صفت کوچه به کوچه گزر عاشق)
لبیک سسی فرشه گلر عرش خدادن
ناله اوجالار نه فلکه مروه صفادن
اولماز گوتورن نعشینی میدان بلادن
(بیر گون کیمی شرق فلک طشت طلادن)
(بیر شامه دونن گونده اولار جلوه گر عاشق)
ساقی دن آلار عاشق حق ساغر سرشار
اصغر یرینه ناوک پیکانی قوجاقلار
ایلر اوزونی حقه گوره درده گرفتار
(وصل وهوسی دلبریلن گر اولا مختار)
(بیر آن بو فنا دهریده قالماز اولر عاشق)
لازمدی که عاشق چکه ال ما ملکیندن
/موسی/بیراخ اغیاری یاپیش یار اتکیندن
اوزمه الووی پنج تنین تک به تکیندن
(گلمز یوزی بیر لحضه توکه گوز فلکیندن)
(رخساره آخان/نجم/تک اشک بصر عاشق)
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.