بابا گتیردی منی جانه حسرت هاردیدون
بیانه گل منه ایله عنایت هاردیدون
یوزون گوزون بوغازون لبلرون باتوب قانه
مگر کیچن گیجه ای روح طاعت هاردیدون
گوز آچ که اورگنه غمزه گوزوندن آهولر
لب آچ یاغا دوداقوندان لطافت هاردیدون
اجازه ویر که توکوم گوز یاشین یووم قانی
تاپا دوباره جمالون طراوت هاردیدون
اگر چه توز بوریوبدی هلالی قاشلارووی
گینه کمانیله ایلور رقابت هاردیدون
گورنده آلنووی گون گیزلنردی خجلتدن
ایدوبدی بس نیه داشلار اصابت هاردیدون
ویراندا لبلرووه بوسه مست اولاردی نبی
آغاج ندن ایلیوبدی جسارت هاردیدون
بیزی اوقورخولی چولده قویوب هارا گیتدون
یاناندا خیمه قوپاندا قیامت هاردیدون
ایاق یالین هره بیر سمته سوزدی اولدوز تک
آچاندا ال بیزه اهل عداوت هاردیدون
چوخی توخاندی قاچان وقته آتلارین دوشونه
یخلدی جانی چیخان اولدی راحت هاردیدون
اولار که دین رسول خدایه قایلیدی
ووروردیلار نیه قرانه ضربت هاردیدون
سجود حقدن اوکس که جبینی پینه ایدی
قولوما باغلادی بند اسارت هاردیدون
اگر چه زنده قالوب اولموشام خرابه نشین
بی بیم چوخ ایلدی مندن حمایت هاردیدون
دگنده قمچی بیزه قولارین ایدوردی سپر
بروزه ویردی اوزوندن رشادت هاردیدون
چیخاندا بامیلر اوسته پلیدو پست امت
آتاندا داش بیزه هرزه جماعت هاردیدون
قویاندا چولده منی ساربان گیجه یاریسی
ویراندا خیمه باشیم اوسته وحشت هاردیدون
خلاصه ایلورم ای شاه غملی سوزلریمی
قوجالتدی عمه می یولاردا غیرت هاردیدون
سسون قولاقیمه بیر لحضه دگدی محملده
ایدوردون آیه ی کهفی تلاوت هاردیدون
غمیله قانه دونن قلبیمی بولیدیم کاش
گلنده نوک جدادن سسون اولیدیم کاش
یانیقلی سوزلری تیترتدی عرش اعلانی
اوباش قوجاقدا یخلدی یره ادب کانی
یتیردی زینب اوزین تز اونازنین بالیا
گوروبدی روحی اوچوب ترک ایدوبدی زندانی
آییردی سوره ی توحیدی مصحف حقدن
آلوب قوجاقینه اول پرشکسته طرلانی
الیله شانه کیمی نظمه سالدی تللرینی
اوپوبدی لعل لبیندن اوجالدی افغانی
بنات ختم رسالت ویریبدی حلقه غم
زیارت ایلمگه نور چشم سلطانی
سالیبدی زینبی غم لشگری محاصریه
وسطده قویدی یره اختر درخشانی
گتیردی ناله سسی قصر باغ رضواندا
فغان ونالیه پهلو شکسته زهرانی
بیری دیدی نیه عمری آز اولدی فاطمه تک
بو تزلیگه نیه ترک ایتدی دار دنیانی
بیری دیدی اوقدر قمچی دگدی قولارینا
اوقمچی لر آجیسی اولدوروب بو جیرانی
بیری دیدی گوزی یولاردا قالدی حسرتدن
فراق اکبره گوزدن توکوب اورک قانی
بوسوزلر عالمه ی نهضتی گتیردی دله
دیدی اجازه ویرون حل ایدوم معمانی
هزار لعن براین قوم بی حیاو شریر
که گبرخنده کند برچنین مسلمانی
نه چونکه قلبی ظریفیدی گل مثالی بونون
لطافت عالمی تحقیر ایدردی ریحانی
گتیردیلر ایله که طشت زرده قانلی باشی
گورنده چهره ی خورشید عالم آرانی
یتیمه اولماقینی بیلدی اولدی طاقتی طاق
فشاره روحی دوشوب چکدی آه طولانی
ساتاشدی گوزلری ناگه اوقان دولان گوزونه
دوشوبدی سینه ده تنگه نفس چیخوب جانی
غرض علی قیزی تطهیر ایدوبدی اعضاسین
ایده خرابه ده مدفون غزال زیبانی
کفن تاپانمادی زینب کسیلدی چاره یولی
بوکوبدی معجره دلبند شاه دورانی
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.