گوزلره گورسندی بیر دیلسیز اوشاق
مدعیلر سمتنه گلمیش قوناق
هر نه ظلم ایتدوز بویوردی دوزموشم
لشگر اِن لَم ترحَمونی دوزموشم
لیک بو طفلین پوزولموش حالینه
یوخ توان منده باخون احوالینه
اوچ گجه گوندوزدی بو گل تشنه دی
آل طاهایه بو سویگل تشنه دی
ویرمسز سو وُرمیون اوخ اصغره
دوشمسون لرزه بو بحر و برلره
من عزیز مصطفایم کوفیان
نورعین مرتضایم کوفیان
سیز قبول ایتسزده یاکه ایتمسز
من امامم خوشدی بد یول گیتمه سز
گر اشاره ایلیم دریا قورور
یا بُتون دریا سوسوز صحرا اولور
سو اگر ویرسز بو طفله سیز بوگون
حشریده قیلام شفاعت ای قشون
اولمادی افسوس بو سوزلر قبول
تازه ظلمه ال آچوب قوم جَهول
وار مقاتلده بیر عده آغلادی
اشگینی رخسار نحسه باغلادی
ابن سعد اما گوروب اوضاعی سخت
ظلمه ال آچدی گینه اول تیر بخت
صفلره گوردی دوشوبدی ولوله
سسلدی هاردا دایانمیش حرمله؟
حرمله قدرتلی تیراندازیدی
ابن سعدیله اُوزی همرازیدی
عاشقیدی قدرتیله ثروته
پی آپار ایندی بله ماهیّته
ای امیرا سسلدی امرون ندور؟
سویلدی باخ بیر بله اوضاعی گور
قویما لشگرده عیان اولسون خطر
قوی کمانه ایندی بیر تیر سه پر
حرمله اوّل خیال ایلوب بو سوز
قتل شاه کربلادی نیم روز
ابن سعد اما دیدی مقصد بودم
طفل شش ماهه اولوب اوّل قدم
من دیدی اوخ پهلوانه ورمیشام
تیر عباس جوانه ورمیشام
پهلوان ئولدورمگه من حاضرم
قورخوشان ساعتده دشمن حاضرم
بو اوشاقه من کیچیلّم اوخ آتام
شهرتیمی جنگده آسن ساتام
ابن سعد امر ایتدی ایتمه اشتباه
بو اوشاق بیر پهلواندی،قیل نگاه
پهلوانلار که گلوب شمشریله
الده کی قلخان و تیغ و تیریله
بو اوشاقدا واردی بیر آیری سلاح
شرح ایدوم بیلسن اگر ایندی صلاح
اولا اوللار آت اوسته گلدیلر
بو ولی شه سینه سینده گورسَنر
آل هاشم گَتدی شمشیر قوی
بوندا یوخ ابزار جنگ دنیوی
گل اوزونده واردی چوخ ابُّهتی
آلتی آیلقدا عیاندی غیرتی
کپریگین کپریگدن الان قوزاسا
نچه لحظه تشنه لقدان آغلاسا
خرداجا ابرولری شمشیریدور
شیر آغوشینده گلمیش شیریدور
قوی کمانه تیروی آچسون سپر
حرمله سویلوب سپر ساخلوب مگر
مست ری سویلوب سپردور حنجری
ورگیلان ایندی بو دیلسیز افسری
حرمله قویدی کمانه اوچ پر اوخ
کائناته سالدی وحشت خنجر، اوخ
اوخ کمانندان چخاندا سس چکوب
اصغرین نازک بوغازیندن گچوب
دَلمَدی کسدی اونی خنجر کیمی
اوخشادی،شاه اصغرین اکبر کیمی
گوزلرین یوممشدی اوچ گون بو بالا
اوخ دگنده باخدی ایستوب آغلیا
بیلمورم نه گوردی گولدی ناگهان
اوچ طرفدن گُل بوغازدان سپدی قان
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.