ای منزل ویراندا چیخان جانی رقیه
آباد ائله دون منزل ویرانی رقیه
زلفون کیمی اقبالیوی غملر سیه ائتدی
وئردی یله امیالیوی دوران تبه ائتدی
هر اود واریدی قلبیوی میعادگه ائتدی
آهون نیه یاندیرمادی دنیانی رقیه
یرده دیل آچوب سوسن ونسرین سنه آغلار
گویده ائدوب افغان مه و پروین سنه آغلار
بی صوت و صدا سوره یاسین سنه آغلار
دردون گتوروب نالیه طاهانی رقیه
صحراده قاچان وقتیده آتلار قاباقیندا
زلفون داغیلان وقتیده یل لر قوجاقیندا
گه دشتیده گه منزل ویران بوجاقیندا
گریان ائلدون دیده زهرانی رقیه
آهوی هراسان و حزینیم بالا لایلای
شهزاده ویرانه نشینیم بالا لایلای
سیندون نه تئز ای در ثمینیم بالا لایلای
سیندیردی غمون پشت ثریانی رقیه
قلبونده یاتان غملری داغلار دئیوب آغلار
گل مثلی سولان رنگیوی باغلار دئیوب آغلار
اوخشار سنی زینب دئیوب آغلار دئیوب آغلار
بوندان صورا یوخ عمه وون امکانی رقیه
ای شامیده روشن گونوزی تار اولان آهو
طوفانه دوشن زجر چکن خوار اولان آهو
آز سنیده چوخ درده گرفتار اولان آهو
قلبینده قاتان نالیه افغانی رقیه
یاندون اریدون شمع تک ای اختر روشن
سس سیز ائلدون گوشه ویرانه ده شیون
عمون کیمی چوخ دردیوی دیواره دئدون سن
هئچ بیر غموون اولمادی پایانی رقیه
(شاهی) سنه قربان اولا ای غمزده جیران
ذکریم سنه موقوفدی فکریم سنه حیران
سن لطف ائله سون عدندی سرتاسر ایران
لطف ایله مه سون نیلورم ایرانی رقیه
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.