سويوسن واژه ی زيبانی دينن يا زهرا
بو گوزل واژه دی وجدانی دینن يا زهرا
ای علی شيعه سی احسن سنون حيثيتیوه
راضی ايله شه مردانی دينن يا زهرا
دلده يا فاطمه، زهرا بالاسی مهدی ده
دولانور مجلس عرفانی دينن يا زهرا
ئولينی ايسده سه احيا ايليره عسياده
چاغورار حضرت زهرانی دينن يا زهرا
چوخ يهوديلر او آديله مسلمان اولدی
قوی تحيرده مسيحانی دينن يا زهرا
فرقی يوخ راز و نيازونده يا زهرانی چاغور
يا چاغور خالق سبحانی دينن يا زهرا
معتبر سوزدی كه زهرايه گوره حی قدير
يارادوب عالم امكانی دينن يا زهرا
نجه زهرا كه يوزوندن ياغوری نور خدا
قويوب حيران مه تابانی دينن يا زهرا
نجه زهرا كه اونون شأنينه كوثر گلدی
اوخيان وقتيده قرآنی دينن يا زهرا
كربلا نهضتينه قلبيده مين حسرتيله
بسلدی شاه شهيدانی دينن يا زهرا
دردمند اولسون اگر گيدمه دا آيری قاپيا
درديوین بوردادی درمانی دينن يا زهرا
فاطمی لر،بويوروب حق كه بهشت اهلی ديلر
سويوسن روضه ی رضوانی دينن يا زهرا
نگران اولما شب اول قبروندن سن
ايدجاق قبريوی نورانی دينن يا زهرا
ايستيسن گر سنه محشرده شفاعت ايليه
ياده سال محشر كبرانی دينن يا زهرا
ای (فتا) كيمسه اورگدن چاغورا زهرانی
تاپاجاق رتبه ی شايانی دينن يا زهرا
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.