اودَم که حرمله ننگین تیر و کمان آلدی
ملک لر ضَجّه چکدی شیعه لر خطّ امان آلدی
خبر ویر هر مریضه نا امید اولسا مُعالجدن
بو طفله آغلاسون تا بهره مند اولسون نتایجدن
عَلاجین آیستَسون بو سودامر بابَ الحوائجدن
کیمه ایتدی طَبابت مزدینه اََشگ روان آلدی
حقیقت گورسَنَر قلب سلیم و چَشم بینایه
اَزَلدن حرمله کور اولدی ساتدی دینی دنیایه
خریدار بهشته بیر اووج قان اَلده سَرمایه
حسینون سوداَمر سَربازی جان ویردی جنان آلدی
دیزین بَرگیتدی یرده اوخ آتان بیر پهلوان مثلی
کمان پُرتاب زِه تابیده اوخ بَرقِ جِهان مِثلی
هدف بیر آلتی آیلق سودامر بَرگ خزان مثلی
حسینون خیری اولسون غنچه ویردی گلستان آلدی
گوراوچ پَر اوخ سودان آیری دوشَن بیر ماهیه نِیلر
دَگه دیوار مسجدده قنادسیز یاهیَه نیلر
ابوالفضلی یخان بیر اوخ گورون شِشماهیه نیلر
باش آیریلدی بدَندن قلب زهرادن توان آلدی
اوخی چکدی بوغازیندن آتوب قان مثل فَوّارَه
دمادم دولدوروب او جین ایدوب عَرضَه خریدارَه
جَنازه اَللَری اوسته قالوب میداندا آوارَه
ندای احسن احسن ذاتِ حَقدن ناگهان آلدی
آتانون اللری قان، یوزگوزی قان، آغ مُحاسن قان
بالانون ایسلادوب آغ دوشلوگین زیبا لباسین قان
اولوب بابَ الحوائج ایلدی تضمین بقاسین قان
عَموسی حضرتِ عبّاس تک نام و نشان آلدی
نَظَر اطرافنه سالدی ئوزین تَک گوردی میداندا
دیدی قارداشلاریم اوغلون خدا غرق المش اَلقاندا
قالان بیر سودامر سربازیمیدی ذِیل پیماندا
اودا صد ساله درسی آلتی آیدا بیزَبان آلدی
بو غمدن پارچالانمشدی نه طاقتده داغ اولسیدی
بهارون فصلی سولمشدی نجه عالی باغ اولسیدی
بالام اَل اوسته قالمازدی ابوالفضلیم ساغ اولسیدی
گوروب قارداشسیزام اَطرافمی بو کوفیان آلدی
ئوزون مَحشَر گونی ای منتقم قیل عدلیلن دیوان
بو من او حَرمَله بو اصغر مظلوم او ناحق قان
ساتان من مشتری سن قان مَتاعیم قیمتی رضوان
ئوزون ویر خیرینی یا رب ساتان ساتدی آلان آلدی
بالا از بسکه چرپندی آتانون سینه سی اوسته
ویروب جان مُرغ بِسمِل تک و لیکن قول قَناد بسته
قویوب یوز خیمیه ساری آتا خسته بالا خسته
اوزاقدان رَمزی اوّل زینب بی خانمان آلدی
اورَکلندی دیدی قارداش گلِ خندانوه قربان
سوا عطشان گیدوب عطشان گلن مِهمانوه قربان
اَلون اوسته مَلکلَر آغلیان قربانوه قربان
بو دلسیز نیلَمشدی دشمن آخر قانه قان آلدی
دیدی سَن اولماسیدون خِیمیه باجی گَلمَزدیم
آناسی خیمه دن باخسیدی من تلّی اننمزدیم
بو حالیلن که سن گوردون گوزینه گورسنمزدیم
ربابه درسی سن ویردون فلک سخت امتحان آلدی
وداعین وقتیدور باجی فراقه قوی ایدیم تَمکین
عیادت ایلیوم سجّادیدن دردی تاپا تسکین
مریضون یاننه گیتمکده امّا وار گوزل آئین
گوررسن هرکسی بیر هدیه در حد توان آلدی
مریضه دسته گل باغلالا بیر خوش رسم و عادتدی
اودور سَجّاده گتدیم بو گلی وقت عیادتدی
آپار ویر ئیلسون ویرسون سیزه بو یاخشی فرصتدی
مریض ئیلر گلی اوندان گوررسن دیگران آلدی
ویرنده هرقزا اما دینن آرام آل آغوشه
یواش باس باغروا دیسگینمسین الان گیدوب هوشه
آتوب دوتما بوغازیندن دوباره قان گلر جوشه
ویرون الدن اله بلکه رباب مهربان آلدی
آلوبلار قانلی قنداقی ئوپن الدن اله ویردی
بوغازینون یاراسین کیم گوروب زلفین یله ویردی
ربابه نوبه چاتدی شاعره مولی صله ویردی
سیزیلتیلان ایله نوحه دیدی فیض کلان آلدی
دیدی گرچه غموندن ئولمدیم من زنده ام اوغلوم
نقدری که آدون اوستومده وار پاینده ام اوغلوم
قصوریم اولدی سندن حشره جک شرمنده ام اوغلوم
منیم سینمده سن بخت اولدوزیندن آسمان آلدی
یقینیمدورگجه چوخ اینجیمیشدون ایندی دینجلدون
یانوردان صبحه جک آهون اوخیلان قلبیمی دلدون
ایون آباد کوسمشدون گنه آغوشه گلدون
کانّه آلتی آیلق دستمزدین باغبان آلدی
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.