زینبم من عالمه ویردیم شهامت درسینی
قهرمانلار مندن آلدی استقامت درسینی
اورگشوب مندن مجاز اهلی٬حقیقت درسینی
از برم روز ازلدن معنویت درسینی
حضرت زهرادن اورگشدیم شرافت درسینی
آلموشام فتاح خیبردن شجاعت درسینی
من آتام شیر خدانین شیر زن فرزندیم
اختر برج حیایم فاطمه دلبندیم
بحر عرفان و ادبده گوهر ارزنده یم
آسمان علم و تقواده مه تابنده یم
بیر خطیبم تیر نطقیم خنجر برّنده دی
در حقیقت منطق شاه ولایت منده دی
مظهر آیات تطهیرم گُل طاها منم
خلقا و خلقا شبیه حضرت زهرا منم
زینت نام علی و زینب کبری منم
خواهر نام آور سلطان عاشورا منم
تا شهید اولدی حسینیم پیچ و تابیم باشلادی
ظهر عاشورا گونیندن انقلابیم باشلادی
فخریله لب تشنه اولدی قارداشیم قربان دین
روح دیگر تاپدی بوندان پیکر بی جان دین
چون بیلوردی شاه مظلومان منم خواهان دین
پرچم اسلامی تاپشوردور منه سلطان دین
قویمادیم باتسین حسینین قانی چون آگاهیدیم
ابتدادن پیرو فرهنگ ثاراللهیدیم
کوفیه گیتدیم قولیم باغلی دلیمده آه وا
اوردا اما بیر قیام ایتدیم علیه اشقیا
مجلس ابن زیاده گیتدی آل مصطفا
باشلادی هذیان عبیدالله بی شرم وحیا
قویمادوم بال و پر آچسون اوردا غوغا ایلدیم
زاده ی مرجانه نی الساعه رسوا ایلدیم
سویلدیم لال اول بیله فکر ایلمه فرزانه سن
شمع فسق و ظلم و زوره شوقیلی پروانه سن
ذاتیوه بیر فکر ایله اوز نسلیوه بیگانه سن
آسمانه یولدا تاپسون زاده ی مرجانه سن
ریزه خوار اولدون بو دنیاده یزید جاهله
شامه گیدسم اول پلیدیله ایشیم چوخدور هله
شامه گیتدی الغرض دخت علی المرتضا
اورادا ایتدی قیامت قهرمان کربلا
ایلدی بیر انقلاب اول یکه تاز نینوا
اولدی رسوای دو عالم فرقه ی جور و جفا
پخش ایدوبلر بر علیه شاه دین چوخ آگهی
عاقبت بزم یزیده چکدیلر آل اللهی
وارد اولدی مجلس اغیاره آل بو تراب
گلدی بیر ظلمتگه گویا آی٬ اولدوز٬ آفتاب
دلده آه سینه سوزان هاموسی یوزده نقاب
یعنی ای شیعه بودور معنا و مفهوم حجاب
همدم ماه و ستاره٬ آفتاب اولسون گرک
زینبه کیم عاشق اولسا باحجاب اولسون گرک
یوخ سوزیم معاویه نین اوغلی یزید ناخلف
باشلادی هذیان علیه پور سلطان نجف
خیزران الده باخوردی شاه عطشانه طرف
هتک حرمت ایلدی مهمانینه اول بی شرف
اهل مجلس خیزران احوالینه قان آغلادی
قانه باتمیش باشه اهل کفر و ایمان آغلادی
پایه دینه سالوردی لرزه اول مزدور و پست
باده فسق و فجوریله اولوبدور مست مست
یاره لی باشه او ظالم گورسه دیردی ضرب شصت
اهل ایمانه ویروردی طعنه اول شیطان پرست
سویلدی وار تاج و تختیم من امیر امتم
اولموشام پیروز میدان غرق بحر عزتم
هکذا حقم دیدی من غالب اولدوم باطله
دشمنیم گرداب غمده دوشدی آخرده گله
سربلند اولدوم عجب آماله چاتدوم فخریله
خصم قرآن باشینی قویدوم تنور ایچره گوله
چوخ آغیر گلدی بو سوز دردانه ی پیغمبره
غیرتیندن آز قالوب ئولسون ال آتدی معجره
محکم ایتدی معجرین اولده دلبند علی
عزمینی جزم ایلدی مجلسده فرزند علی
شیر تک دوردی ایاقه دلده ذکر یاعلی
خوف و وحشتدن یزیدین لرزیه دوشدی الی
یوز دوتوب زینب٬ یزیده سویلدی ای نانجیب
فرض ایله خیبردی بو مجلس بورا حیدر گلیب
ای فرومایه نه احساس منیت ایلوسن
دائماً شیطانه سن عرض ارادت ایلوسن
نوگل پیغمبره ظالم اهانت ایلوسن
ئولمیوب زینب حسینه سن جسارت ایلوسن
رأس شاه عالمی قویدون کوله فخر ایلوسن
رهبر اسلامی ئولدوردون هله فخر ایلوسن
ایندی معلوم ایلرم من حق ندی٬باطل ندی
مسند قرآن ندور آخ سن کیمی جاهل ندی
سن دوشونمورسن هله ناقص ندی٬کامل ندی
سویله ای ظالم٬حسینین قتلینه عامل ندی
گور حسین کیمدی٬کیمین حقینده طغیان ایلدون
دین آدیلان شاه دینی قانه غلطان ایلدون
اول یارالی باش که طشت زرده دی قانی آخور
علت ایجاد عالمدور او باش ای بی شعور
خیزران ویرما او لبلر آیه ی قرآن اوخور
اللرون سینسین حیا ایله که قیزلاری باخور
اول کسیک باش که ویرورسان ماه عالم تابیدی
شرم ایله ظالم ایکی دونیانین او اربابیدی
سن بیله فکر ایلدون قول باغلیام بی یاورم
پادشاه عالمه ایتسون جسارت دینمرم
حیله ده سن مرهب اولسون بیل بونی من حیدرم
سن عمر شاگردی،من شاگرد شاه خیبرم
زینبم من فاطمی احساس وار منده یزید
آگه اول که غیرت عباس وار منده یزید
اوز ایشیمده منده عباسیم کیمی با همتم
منده حیدر قانی واردور صاحب شخصیتم
غیرت اوقیانوسیم من معنی حیثیتم
حاول الله سالماسام تخدن سنی بی غیرتم
آفتاب عصمتم دریانی بی تاب ایلرم
ظلمیده گر کوه برف اولسون سنی آب ایلرم
گر سنون وار تاج و تختون منده ده وار آبرو
عربده کش سن٬منیم واردور دلیمده ذکر هو
ایلرم رسوا ایکی دنیا سنی ای زشت خو
گیت دولان اوز نطفووین اصلین سوروش بیر کو به کو
ظاهراً جدون ابوسفیاندی اول پست و دنی
باطناً ای بی شرف هامی بالام سسلر سنی
عصمتون یوخدور سنون٬رهبرده عصمت شرطیدی
بیر پارا شاخص،جماعتده،هویت شرطیدی
طایفوز چوخ بی شرافتدی٬شرافت شرطیدی
پیکرون ناپاکیدی انساندا فطرت شرطیدی
بو سوزی ویررم یازاللار قبریده باش داشیوه
هنده نین ای نانجیب اوغلی کول اولسون باشیوه
برج خلقتده مه تابنده دی ئولمز حسین
بحر عزتده دّر ارزنده دی ئولمز حسین
خوار اولوبسان سن٬ولی پاینده دی ئولمزحسین
آند اولا حی قدیره زنده دی ئولمز حسین
پایدار اولماز فنا دنیاده بد اندیشه لر
واقفم اما بونا ئولمز حقیقت پیشه لر
ای«فتا»شکر ایله هر دم خالق داداریوه
ایسته زهرادن اوزی قدرت ویره اشعاریوه
نسل آینده تفاخر ایلیرر آثاریوه
صادق اول٬ الله اوزی رونق ویرر گفتاریوه
تا جوشور طبعون بولاق مثلی ولایتدن دانیش
کسسه لرده باشیوی قوخما حقیقتدن دانیش
منبع:وبلاگ کوثر(انتظاری)
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.