ای تشنه لب قیزلاریمه سقا ابلفضلیم
یوخ بیر کسیم دور قالمیشام تنها ابلفضلیم
عطشان قالوبدور خسته پر تیهولریم یاتما
دست خزانیلن سولوب مه رولریم یاتما
حسرتله گوز تیکمیش یولا آهولریم یاتما
ای شیرمرد عرصه هیجا ابلفضلیم
حق اوسته باتدون شوقیلن القانووه قارداش
بذل ایلیوبسن جانووی جانانووه قارداش
ایتدون عمل سن مو به مو پیمانووه قارداش
احسن دیدی ایمانووه زهرا ابلفضلیم
گلجک نیستاندان سسون روح وتنیم اسدی
میدانه قولسوز دوشمگون امیدیمی کسدی
آچ گوزلرون قارداشووی تک قویما بی کسدی
سنسیز منیم قلبیمده یوخ یارا ابلفضلیم
سوز عطشدن خیمه ده جیرانلاریم یاندی
الده سو جامی صف چوب قیزلار پریشاندی
اطفالیمون احوالینه زهراده گریاندی
ازبر اولوبدور دیللره گل یا ابلفضلیم
دور درد الینده زینب نالانی یاندیرما
قلبی سینان قارداشووی میداندا سیندیرما
قان ایچره یاتما رشته ی امیدیمی قیرما
گورمز سنه تای دیده ی دنیا ابلفضلیم
زلفی پریشان قیزلاریم ایثارووه قربان
حق اوسته تندن آیریلان قولارووه قربان
بیرگوز ایکی قول ایلدون دلدارووه قربان
حیدر مثالی غیرتی دریا ابلفضلیم
قویما منی تک عرصه ده روح روانیم دور
اصغر یانور گهواره ده تاب وتوانیم دور
شادلیق ایدور دشمنلریم آرام جانیم دور
قانیله ایتدون عشقووی معنا ابلفضلیم
اخیامه باهم دور گیدک غیرتلی سرداریم
گوزلور سنی اهل حرم یاتما علمداریم
عطشان سپهداریم اویان ای غم گونی یاریم
اسلامی ایثارون ایدوب احیا ابلفضلیم
سندن صورا وای زینبه وای بی کس اطفاله
جن وملایک آغلاشارباهم بو احواله
قارداشووی اعدا یخار بیر قانلی گوداله
آغلار دییر الله قالوب هاردا ابلفضلیم
غم زینب مظلومه نی بیر گونده پیر ایلر
اعدا قووار اطفالیمی تا دستگیر ایلر
قید طناب ظلمیلن یکسر اسیر ایلر
اخیامی اشرار ایلیر یغما ابلفضلیم
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.