کتاب عشقیده کی ماجرا حسینیندور
او ماجرای سراپا بلا حسینیندور
شعور و شعریدن اعلاده دی بو کیف بشر
مسیر علمه چراغ هدا حسینیندور
ولایت اهلی اما بلادن آیریلماز
مریض و عاجزیلن مبتلا حسینیندور
مریضون الده دواخانه گزمه آواره
گتور امیدیله دارالشفا حسینیندور
طبیبیلرده دوایه گل.لله بو قاپیا
اولار طبابت ایدوللر دوا حسینیندور
بیله خیال ایلمه کربلاده دور قاپوسی
بو محفلیکه چکیلمیش قرا حسینیندور
خطالی نوکری درباره یول ویرن آقادی
خطا بییزیمکیدی اما عطا حسینیندور
یخیل امیدیله بو ثانی اود ووران قاپیا
چکیلسه ده اوتا باب رجا حسینیندور
مس عقیدوی همت ایله طلا اولسون
مسی طلا ایلین کیمیا حسینیندور
تلاش ایله عملون اوخشاسون بو دوز قاپیا
گورن دیسون بو سگ بی ریا حسینیندور
حسینه آغلاسان آغلا باجیسی زینب تک
حریم حرمتی ساخلا عزا حسینیندور
حسینه نوکر اولاندا غرور و کبر اولماز
حسینچی ده اله گلسه بها حسینیندور
بیله دولان سنه محشرده حضرت زهرا
دیسون بونی تانورام بو گدا حسینیندور
حسینی دوز تانیان جاه و منصب آختارماز
بیلر کیم عشقیده اولسا فنا حسینیندور
حسین چیلیک یاراشوبدور یارالی عباسه
بو قاف عشقیده پرسیز هما حسینیندور
نه گوز واریدی نه اللر عمود انن وقته
باشین سپر ایلین با وفا حسینیندور
اولان اولوب یره السیز دوشنده زین اوستن
کمک ایدن اونا مام بلا حسینیندور
الیکه دوشدی عقاب اوسته لنگره اعضا
تز آچدی اوز قاپوسندا سنان قولین زهرا
دیدی بو سینه که دوشسون اونا حسینیندور
کیم حقون اوسته بویانسا قانا حسینیندور
گوزل بالا آنا آغوشینه یخیل یره یوخ
دیمه بو سینه سینمیش آنا حسینیندور
جری اولوب قولومی سیندیران سالوب قولوی
نه محشر اولسا بو چولده به پا حسینیندور
دیدی سینان قولوا قوللاریم گوزوم قربان
او قول کی مندن اولوبدور جدا حسینیندور
کنیز زادوه لطف ایلیوب اوغول دیوسن
بو علته که بو قولسوز فدا حسینیندور
آغیردی وزنیم آنا سنده سینه دن یارالی
چکیل کناره غم اولسا دوتا حسینیندور
حریم کعبه دی قوی سجده گاهیم اوسته دوشوم
فدا قانیلا بویانمیش منا حسینیندور
الیم ده یوخدی دیوم قوی وضوی خون ایلیم
نماز عشقیده کامل ادا حسینیندور
نقدی وار نفسیم صاق صولا گرک سورونم
زمین شوره ده اولسا بورا حسینیندور
حسین حسیندی ذکریم منیم بو سجدمده
سرود سجده یا ربنا حسینیندور
قباله دور آدینا کرلا منیم اقامون
گورون قباله ده هاردان هارا حسینیندور
سویی سنوندی فلاتی غریب مولامون
که یعنی حشره دونن کربلا حسینیندور
نه خنجری نه عمودی گلنده رد ایلدیم
دیدیم دگون هارا دگسوز یارا حسینیندور
اورگیمه ساری هر نیزه گلدی گلمه دیدیم
قولوم گوزوم سنون اما اورا حسینیندور
نسیم جنتیلن ایتمرم عوض والله
که روحه روح ویرن خوش صدا حسینیندور
الیمدن ال اوزوب اما علمدن اوزممیشم
بو قانیمیله یازیلمیش لوا حسینیندور
بو قانلی پرچمی دیرسکلریمله ساخلامیشام
اوزی گلوب گوره بو با وفا حسینیندور
دی زینبه مین امان نامه گلسه بیردی سوزوم
علم سینمده دی قول دوشدی آخدی گوزوم
گوزومده گیتسه ره افتخاری آختارورام
اورک گورزی آچیلوب روی یاری آختارورام
سسیم یتیشمور آنا سن بویور آقام گلسون
کمندیده کرم شهریاری آختارورام
خزان زده چمنون پرشکسته بلبلیم
حسین یوزونده صفای بهاری آختارورام
یخیلمیشام یارالی گوز قالوبدی یوللاردا
ثبوت خدمته معیار کاری آختارورام
بولار منیم باشیم اوستونده هلهله ایلیور
نه راه چاره نه راه فراری آختارورام
آرادا تل اوجا مانعدی خیمه گورسنمور
گوروم جمالیوی بالای داری آختارورام
ایشودورم گوزومه اوخ ویران دیور اوجادان
هارا یخیلدی یارالی شکاری آختارورام
عمود اننده ایتوب خیمه لر یولی گوزده
سوزن ستاره مثالی مداری آختارورام
ساچونلا تا سیلوسن مختصر گوزوم آچیلور
تز اوندا بیر گوزیلن دوت کناری آختارورام
دوشنده یادیمه نازلی رقیه نون دوداقی
گهی سو مشگیمی گاهی مزاری آختارورام
دگنده اوخ گوز آچوب مشگیم آغلیوردی منه
او مشگ پر محن و سوگواری آختارورام
ایتورمیشم اوزومی بین آب و عطشاندا
گهی سویی گهی بیر شیرخواری آختارورام
دوشوب ترابه قنادسیز قوشا چوخ اوخشیورام
خیالیده ولی آیری دیاری آختارورام
خیامه مشک پر آبیله چاتمیشام گورورم
سو جامی الده دی خرد و کباری آختارورام
یوبانمیشام گورورم قهر ایدوب رقیه بالون
دوتوب سراغینی اول گلعذاری آختارورام
سو سهلیدور گورورم ناگهان الیمده گیدوب
هایاندیام من عجب روزگاری آختارورام
اگر چه دوتماقا یوخدور الیم گنه اما
اورگیم ایستوری دامان یاری آختارورام
نصیبیم اولسا اگر فکر چارسنده وارام
علم کیمی اتگون دیرسگیمله ساخلیارام
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.