گینه گلدی آقامون آدی گلوب غم سینمه
نصب ایدم ایندی گرک پرچم ماتم سینمه
وار یری ویرسام اگر عشقیله محکم سینمه
هرگلن وقته حسین آدی گلور قلبیمه شور
گوزیاشیم حسرتیلن صفحۀ رخساره آخور
وار یری آغلیا گرعالم امکان آقاما
حقی وارشیعه لرین اولسانواخوان آقاما
آغلیاصبح و مسا لبلری عطشان آقاما
حقی وار شیعه لرین دائمی افغان ایلسه
حقی وار گوز یاشینی سیل خروشان ایلسه
او حسینی کی گیدوب عرش حقه قونداقی
مدحت وشهرتی تسخیر ایلیوب آفاقی
قیترر سیرزمانی بالاجا بارماقی
او حسینی کی اوپوب لبلرینی خیر وَرا
او حسینی کی اولوب سر سپه عاشورا
او حسینی کی دیوب لای لای اوناروح الامین
اوحسینی کی اونون گلمیه جک مثلی یقین
حیف اونون منزلتین آنلامادی قوم لعین
ایتدیلرصفحۀ دنیانی اوناکنج قفس
دیدی هل ناصرینصرنی ولی گلمدی سس
گوز قباقینده اونون دوغرادیلار اکبرینی
الی اوستونده اونون اوخلادیلار اصغرینی
پایمال ایلدیلر قاسم خوش منظرینی
زینیدن سالدیلا قولسوزاوجاسر لشکرینی
زینبون دوغرادیلارخنجریلن اللرینی
سالدیلار تپراقازهرا بالاسین خصم زمان
یارا دگمیشدی اوقدری یوخودی دلده توان
مقتله شمر گلوب ایلدی أوز ظلمون عیان
گلشن فاطمیه بادمخالف اسیلوب
سرشاه شهدا ظلمیله دالدان کسیلوب
گون غروب ایتدی غرض کامه چاتوبدور اعدا
خولیه ویردی حسینون باشینی شمر دغا
امرایدوب شه باشینی ابن زیاده آپارا
باشلادی کوفه یولون خولی دون غرق شعف
نیمه شب یتیشوب شهره گوروب ماءالأسَف
باغلیدی دارالماره گوروب اول پست ودنی
آپاروب منزلینه رأس امام زمنی
قهریله آتدی تنوره اوگل فاطمه نی
چرخه باخ منزل اولوب رأس شهه قعر تنور
او تنوری ایلدی نورحسین وادی طور
نورشاهنشهیلن کوفه چراغان اولدی
خَرَّ موسی صَعِقا بیرده نمایان اولدی
او گجه خولی ایوی روضۀ رضوان اولدی
ویردیلرخیمۀ سوزانی اسیرانه اتاق
مطبخ خولیه ده گلدی حسین باشی قوناق
عالمون داشینی سلطان جهان آتدی گجه
شمس دین خولی تنورینده نیه باتدی گجه
جسمی صحراده،تنور ایچره باشی یاتدی گجه
گوردی بو صحنه نی فریاد ایلدی حور وملک
عرشیدن فرشه نزول ایتدی نچه قاره لچک
ایتدیلردورتنوری او برازنده زنان
هاموسی ایلدیلر اشکینی رخساره روان
کیم باخوب قعر تنوره ایلدی آه و فغان
بیری سسلندی حسین آدووه موسی قربان
دیدی مریم کسیلن باشووه عیسی قربان
بی خانم گلدی قباقه آغاروب باش قاراسی
سورونِی یرده عباسی سینه ده وار یاراسی
آغلادوب اهل سماواتی اونون اوخشاماسی
تا گوروب کوللرین اوسته بالاسین فخر انام
دیدی ای وای منه گور هاردا یاتوب نازلی بالام
بالانون باشینه باخدی آناسی ناله کنان
سسلدی آچ گوزووی فاطمه گلدی بالاجان
غم بی حدون ایدوب قامت زهرانی کمان
بیلورم ظلم وستم ایتدی سنی خسته اوغول
قوجاقیم بوشدی یاتوبسان نیه کول اوسته اوغول
بیلورم ابر مصیبت باشووا سایه سالوب
ظلم اشرار دنی طاقتووی الدن آلوب
پیکروندن یارالی باشون اوغول آیری قالوب
قلبیمی دردوغمون تیرمثالینده دلوب
سنه خاطردی آنون منزل اعدایه گلوب
ترک ایدوردوم اوگونی یادووه سال حیدریمی
سن دیدون ایندی گرک بیرده گورم مادریمی
گرک اغوشه آلافاطمه گول پیکریمی
امر ذات حقیلن گلدیم اوگون هوشه اوغول
جسم بی روحیله آلدیم سنی آغوشه اوغول
او محبت عوضین ایندی گرک سن چیخاسان
الووه ایندی گرک حلقۀ احسان تاخاسان
نه اولار فاطمیه بیر یول اقلا باخاسان
دیمورم پرپراولان گلشنه خاطرگوزون آچ
آی منیم سینه گلوم سن منه خاطر گوزون آچ
کربلاده واریدیم صبحیدن آخشامه بوگون
لعن و نفرین ایلدیم من سپه شامه بوگون
نه گناه اوسته سالوب عترتیمی دامه بوگون
سن کیمین منده بوگون آه وفغان ایلمیشم
منده اکبر غمینه اشکیمی قان ایلمیشم
اوخ یخان وقتیده عباسیمی طوفان ایلدیم
باشینون اوسته گیدوب زلف پریشان ایلدیم
آنالیق لطفون علمدارووه احسان ایلدیم
اخرین دمده سپهدارووی دلشادایلدیم
ظلم اعدا داغیدان قلب ایوین آبادایلدیم
ناگرانیدی او شهبازویرن وقتیده جان
سسلدیم فاطمه گلدی بالااولمانگران
گرآنون بوردا دگول من آنووام ایتمه فغان
اودا قویدی باشینی سن کیمی زهرادیزینه
ویرمیشام بوسه اونون اوخ داغیدان ساق گوزونه
قوی دیوم ایندی سنه غارت مخیم سوزونی
او کشاکشده ایتیردی بالا قیزلار اوزونی
منه اوخشارقیزوون سیلی گوگرتدی یوزونی
هامیدان چوخ ولی زینب دوگولوب غارتده
چاتابیلمزمین اُحُدزینبیمه طاقتده
آرزومیدی منیم صحنۀ عاشوریده بو
جسموون اوسته چاپان وقیده آت قوم عدو
کاش قوجاقیمده اولیدون منیم ای مظهرهو
اوندا بیر ناله ایدوب عرشی قراپوش ایلدیم
سینمون یاره سینی اوندافراموش ایلدیم
یعنی هر محنتووه شخصاأوزوم ناظریدیم
دشت ماتمده اوغول یوم بلا حاضریدیم
مقتلونده بالاباشسیز تنووه زائریدیم
گلمیشم ایندیده قانلی ایوینه آغلاماقا
باشی اللرده قالان اوغلومایاس ساخلاماقا
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.