زینت شیر خدا دختر طاها زینب
نایب باخرد ام ابیها زینب
یازماقا وصفینی یوخ خامه ی خامیمده توان
مدح ایدنمز خانمی من کیمی ناپخته جوان
گر منه لطف ایلیه حضرت خلاق جهان
زینبون منزلتین زینبه لایق یازارام
شیر حق دشمنینون شعریله قبرین قازارم
یاز قلم عالمی حیران ایلیین زینبدی
ئولننجک قره احرام گیین زینبدی
کل نسوانه شرف درسی وئرن زینبدی
وارث منطق و احساس علی زینبدی
حامل پرچم عباس علی زینبدی
بو خانم دین رسول اللهی احیا ایلدی
اموی زاده لری دهریده رسوا ایلدی
ناقه لر اوسته عزا بزمینی برپا ایلدی
حقینی ماخلقه همتیلن بیلدیردی
سکه لردن طلقازاده آدین سیلدیردی
بو خانم قلب دمشقه علمین نصب ایلدی
گرچه بیر عده حسینون حقینی غصب ایلدی
او همان حقی حسینون باجیسی کسب ایلدی
نقدر واردی جهان خون حسین باتمیاجاق
یاتاجاق کفر علمی قاره علم یاتمیاجاق
دوزدی ظاهرده بو پیچیده چادر شبدی
بضعه ختم نبی فاطمیه کوکبدی
مکتب عصمتی بنیان ایلیین زینبدی
درس ایثاریده مین فارسی مردود ایلدی
اموی دولتینی تک باشا نابود ایلدی
کوفیه داخل اولان وقته بو بانوی حرم
گوردی نقاره چالور شادلیق ایدور قوم ظلم
نصب اولوب کوچه و هر رهگذره قرمز علم
نی ده والشمس گزور طشتیده بیر آی پاراسی
جبل الصبرین آلوب طاقتینی دل یاراسی
اهل بیتون باشینا شه سالوب اوز سایه سینی
ایستدی نیزه ده تحکیم ایده دین پایه سینی
قانلی لبلرلن حسین باشلادی کهف آیه سینی
ولی بیر داش آقامون نیزه ده کسدی سوزونی
قان جبینیندن آخوب دوتدی او زیبا گوزونی
گتوروب سنگ جفا زینب زاره هیجان
محمله ویردی باشین قان یوزونه اولدی روان
سیلدی فورا گوزونی ایلدی افلاک فغان
اسکتو سسلدی زهرا کیمین اول کان وفا
قطع اولوب همهمه ساکت دایانوب قوم جفا
دیدی ای ملت خونخوار و پلید اموی
منم ای قوم دنی وارث حلم نبوی
شریانیمده منیم جاری دی خون علوی
قارداشیم تک ویراسوز پیکریمه یاره اگر
یارالاردان سوزولن قان دییجک یاحیدر
کیم دیور یوخدی کسیم کوفه ده من بی یارم
خصمه تعظیم ایدرم اولماز الیمده چارم
لشکریمدور بالالار لشکریمه سردارم
زینبم مظهر عز و شرف و احساسم
هم حسین و حسن و حیدر و هم عباسم
قویمارام لطمه یته قارداشیمون عزتینه
زینبم اولدوم علمدار حسین نهضتینه
زینبون غبطه ایدر کوه احد هیبتینه
کیم دیور مقصدینه بنت علی یتمیه جک
یخماسا کفر ایوینی قبر ایوینه گیتمیه جک
او حسینون آدینا هر یره رایت ویریلار
فخریلن کوچه لره پرچم هیئت ویریلار
گرچه عشاق آدینا آرم اهانت ویریلار
من کیمین شیعه لریم راه وفاده دوراجاق
دشمنون گردنینی همتیلن سیندیراجاق
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.