اشعار مذهبی ترکی و فارسی

اکبریم گلینجه اولسم دفنیمی یوباندیر عمّه

نعشیمی آلیب ال اوسته، باشینه دولاندیر عمّه

یوخ سوزوم بو اولمک عمّه «امر حیّ‌ لم» یزل‌‌دی

باجیلار اولنده امّا قارداشی اولا گوزلدی

ائیلیین بیر آزجا تأخیر، بلکه اکبریمده گلدی

کفن و دفنیمی بیر آز سن ساخلا ال یوباندیر عمّه

گوزلرون فداسی اوللام خسته سن بی‌بی آز آغلا

اولدورر اوزون حَرَملر آز بو قلب زاری داغلا

اللرون قاداسین آللام گل بو گوزلریمی باغلا

قانلی اشگیلن سارالمیش رنگون آز بویاندیر عمّه

گرچه قاره گون الینده قورتارور بو بختی قاره

وار ولی بیر عمده دردیم، گل سنه ائدیم اشاره

ناگهانی گلسه اکبر، گوزلریمی آچ دوباره

اکبری منیله بیر آن روبرو دایاندیر عمّه

شئمری سن چاغیرما عمّه قلبیده جراحتیم وار

قولدان آچماسین طنابیم دیلده آیری نیّتیم وار

قبره قوی بو حالتیلن جدّیمه شکایتیم وار

سنده خلقه ظلم شمری، نطقیویله آندیر عمّه

باشون آچما ائتمه ناله، قلبیم اولدو غصه دن قان

سن منه آنالیق ائتدون جانیوه رقیّه قربان

باشیم آلما سینون اوسته، توپراق اوسته قوی وئریم جان

زحمتیمی چوخ چکیبسن، آز منی اوتاندیر عمّه

آغلاما دئمه غریبیبی‌وطن، رقیّه لای‌لای

هئچ دیله گتیرمه جیسمی، بی‌کفن رقیّه لای‌لای

سسله شئمر شوم الیندن، دینجلن رقیّه لای‌لای

قلب اهل شامی، آه آتشیمه یاندیر عمّه

بی‌سبب دئنن بو غمده قانه گوز یاشیم دولانماز

الده اولدوروب بو طفلی شمریدون گینه اوتانماز

قمچیلر یئرینی امّا گورمیینجه خلق اینانماز

کوینگیم چیخارت بو خلقی سن اوزون ایناندیر عمّه

منبع:وبلاگ کوثر(انتظاری)