رو به قبله آخشام نه یاتمیسان قیزلارون پریشاندی فاطمه
زینبون یانیندا دینمورم قلبیمین باشی یاندی فاطمه
فاطمه دوباره محبّتین شمعینه آلیشدیر عم اوغلوی
بیرده چشم طاها نگاهیله لطف ائدوب باریشدیر عم اوغلوی
آلموری جماعت سلامیمی سن باری دانیشدیر عم اوغلوی
نیله میشدیم آیا بو امّته حقّیمی منیم داندی فاطمه
آیریلیق سوزون سالما بو قدر ائتمه مرتضانی غمه دچار
من سنه بو عالمده دلخوشام مرغ دل سنیله قونوب اوچار
قوللاریم اگر بیرده باغلانا کیم گلر علینون قولون آچار
گل علینی تک قویما سن باری دشمنیم فراواندی فاطمه
موج ائدوب داشان وقته سیل غم سن عم اوغلوون سدّ سیلیسن
چکموسن قرا معجرون یوزه بیله ناقه صبری پیلی سن
سسلورم نقدری اویانموسان اولمیا علیدن گلیلی سن
قربتاً الی الله جواب وئر وار ثوابی احساندی فاطمه
واقفم که مشکلدی دورماقون اینجیدور او پهلودکی یارا
باری زینبی آل کناریوه سعی ائله که زلفون اوزون دارا
نچّه گوندی روحیّه سی ئولوب هی باخور سنه ایلیور نوا
چوخ باخور او صدمه دگن یوزه حالتی پریشاندی فاطمه
بیر غمون منی دائم آغلادار اوندا که باتور گون اولور اذان
سن نمازی راحت قیلانموسان اگلشوب دورانماز مریض اولان
ناخوشا چتیندور قیام ائده اولموسان بئله زار و ناتوان
شرمیدن علی آز قالور ئوله اشک چشمی طوفاندی فاطمه
آتش مصیبتده بی سبب شمع لر سیاقینده یانمورام
سن مریض اولاندان خجالتم فکروی باشیمندان آتانمورام
وار یری دئسم که بلیم سینوب اگلشنده یردن دورانمورام
غصّه لر گلوگیر ائدوب منی قلب مرتضی قاندی فاطمه
بی سبب دگل گوز یاشیم آخور ئوز جمالیمه آیری حالیله
آغلورام بیر اللی قنوتیوه زینبونده آغلور ملالیله
گل کیمین بو ائوده سارالموسان یوخدی فاصله ارتحالیله
قنفذون سینیدی الی او گون قلب مصطفی یاندی فاطمه
ایندی گه گئدورسن نه چاره گئت قوی علی یانا آتش غمه
کربلایه باری اوزونده گل اوندا که چخار عرشه همهمه
اوردا بیر سو اوسته یارالی وار تئز یتور اوزون نهر علقمه
منتظردی اوردا قدوموه دورسینده عدواندی فاطمه
گون او گون اولوب گلدی فاطمه نهرین اوسته عباسینی گوره
یاره لی علمداری دیندیروب عالمه وفاسین نشان وئره
بیر زمان یتوشدی او با وفا گوردی ایکّی قول دوشوب یره
مادرانه عبّاسی سسلدی آتش غمه یاندی فاطمه
رأفتیله ال چکدی باشینه سسلدی یوزه اشکی باغلاما
منده بیر قولومدان یارالیام آهیله بئله سینه داغلاما
دیندیروب او قولسوز وفالینی باخدی جسمه اودلاندی فاطمه
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.