بارالها نقدر واری آدوندا عظمت
هر کس اولسیدی یرونده کسیلردی نعمت
بندیه نعمته خاطر ائلیردی منت
بذل نعمتده عجب گوزل قوتاردون ایشی سن
نقدر سن بو جهاندا عظمتدی کیشی سن
بیلمیور گرچه قلم باشی خرددن آغاریب
بوغدانین دانه سین الله نیه خاطردی یاریب
بولگه قارنیندا خدا یونسی غمدن قوتاریب
سجده ی شکر ایلمکدن ساری آغاز کلام
گویلوم ایستور ائلیم ذات خداونده سلام
ذات خلاق ازل قدرت بی حد و نساب
خالق واحد سکان سماوات و سحاب
ناظم مقتدر چرخه بیداری و خواب
دفتر خلقتی آثارینه ملحق ائلدی
عرش و فرشین هامیسین آلتی گونه خلق ائلدی
خلقتی فرض ائله گیسودی که یاره یاراشار
قلمیم الده اونا شانه مثالی ساتاشار
قلمین قول قیچینا تللر ایپک تک دولاشار
خلقتین طره سی تل تلدی داراخدان سوز ولوب
عالمین قاش گوزینین اوستونه چین چین دوزو لوب
خلقته گوره بو فرضیه نی بیر عده آچار
عالم اولده ایکی ذره ایمیش مثل غبار
دولانوردی ایکی ذره هوادا دایره وار
روح وحدت بو ایکی ذریه تانصب اولدی
ذره لر جاذبه دن بیربیرینه جذب اولدی
ذره ه لر چسب اولونوب دایره تشکیل اولدی
ذاتی ممزوج اولونوب چرخه سی تکمیل اولدی
چرخه نین اوسته اتم سلولا تبدیل اولدی
بله زنجیره ده خلاق اتمی بود ائلدی
زنده موجودی بو سلولیله موجود ائلدی
ایکیمینجی نظریه که دئیور اهل جهان
آفرینشده اونی نقل ائلیور پیر و جوان
صاحبی بیر یکه انساندی ئوزی فلسفه دان
آدی داروینیدی وار فلسفه دن تزویجی
آدلیوبلار نظرین تکامل تدریجی
طبق اصل بو نظر واردی بو نوعیله خبر
خلقتا ناقصیمیش عالم امکان و بشر
سورادان حین تکاملده وئریب عالی ثمر
خط سیر بو نظر علمیده مسدود اولونوب
اهل فنین طرفینن سوزی مردود اولونوب
ظاهرا بو نظرین پایه سی محکمدی دئیوب
حضرت صادق اونون پایه لرین سیلکه لیوب
بو سوزی ریشه دن اول سرور دین نهی ائلیوب
بویوروب حقی مبرادی بو سوزدن آرادا
عالمی خلق ائلینده اونی ناقص یارادا
واردی فرمایش حضرتده بو توصیفه یقین
قبل از آنی که خداوند سماوات و زمین
یدی یریدی سمانی بیز یچون خلق ائله سین
قاب قوسینیده قالخیزدی گسسته ایشیقین
سالدی اون دورد گوزل آیینه نین اوسته ایشیق
هامیسی نور ازل پرتو انوار جلی
اول آئینه محمد اونا وابسته علی
سومین آینه آئینه زهرادی بلی
چارمین آیینه آیینه قلب حسنین
دالی بش مینجیدن اون دورده کیمی نسل حسین
سو یدی خلاق ازل خلقتی اولسین نچه بخش
ایلدی نورینی اون دورد گوزل آیینه ده پخش
نجه آیینه نه الماسیدی نه لعل بدخش
شاخدی هر آینه دن چیخدی ایشقلار آرادان
نه اراده ائلدی اوردا یاراتدی یارادان
یارادان باشداکی نوری نجه بولدی آرادان
گونی خلق ایلدی آی چیخدی هلالی پارادان
دیل آچوب گون دئدی به به نه یاراتدی یارادان
گونین آری ئوزینه آی سالا بیلمزدی لکه
اودی خورشیدی خدا پادشه ائتدی فلکه
گونی خلق ائتدی خدا گون یره سپدی یایشی
یای یازی ائتدی مقدر پاییزی همده قیشی
بلودا امر ائلدی یاغدیرا یازدا یاغیشی
ایلدیریم اولدی مقدر یاغیشا شاکر اولا
گوی قرالجاق یری آگاه ائده شاقیلتی سالا
یاغجاقین بارش رحمت یره گوهر سانی
آب و گلدن یارادان خلق ائلدی انسانی
سجدیه دوشدی ملک لر هامیسی بیر آنی
باخدی خلاق صمد آدمه ذهنیتیمه
دئدی احسن منه به به بو گوزل خلقتیمه
خلقت حی صمد دن گویه پخش اولدی سرور
یدی یر سمانی بورودی لشکر حور
جبرئیل ائتدی همان لشکر حور ایچره ظهور
دئدی الله بویوروب خلقتی تحکیم ائلدیم
عالمی ایستدیگیم جلویه تقدیم ائلدیم
عرش و فرشین ها میسین آدمه وحی اولدی تانی
باش طرفدن آشاقا گون چیخانی گون باتانی
آفرینشده اولان جلوه کماله چاتانی
گرک آگاه اولا من حقینه ملحق ائلدیم
یر گویی حضرت زهرایه گوره خلق ائلدیم
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.