ای اولان زادگهی خانه ی جانانه علی
وی کرامت یارادان خلقت انسانه علی
هرنَفَسده آدیوی ذکر ائلین سائلووم
جان فدا ایلیرم سن کیمی سلطانه علی
هانسی رهبردی گجه صبحه جن احسان چوره گین
ئوز الیلن آپارا سفره ی بی نانه علی
گلمیشم درگهووه قلبی سنق نوکریووم
منیده ایله قوناق سفره ی احسانه علی
هَل اَتا دور سنی تعریف ائلین من نه دیوم
کَرَموندور یازیلوب سوره ی قرآنه علی
کیم گوروبدور یوزیوی آیت یزدانی گوروب
صورتون آینه دور صورتِ یزدانه علی
دئسم الله سنه بو شرکیدی معناده ولی
عقل حیراندی نجه اوخشادا انسانه علی
آستینونده دی خلّاق قَدَر قدرت ا لی
بنده سن گرچه ئوزون خالق رحمانه علی
سوزلرون پایه اولوب کاخ عدالت دایانوب
عملون دیرک اولوب خانه ی ایمانه علی
عشقووین آب بقاسی نَهَ قَدَر جاندی منه
نه نیازیم اولاجاق چشمه ی حیوانه علی
قویمادون تخت قضاوتده تفا وت قویولا
شهریده شاهَه وَ یا چولده کی چوپانه علی
بیلسه ئوز قدرینی گر درگهووه سائل اولان
وئرمز ئوز عزّتینی جاه سلیمانه علی
کیمدی سن تک بو عجایبده که هم ایوده اولا
هم مدائن ده گئدوب غسل ائده سلمانه
کیم گوروب رهبر آلا درد دل خلقی ولی
ئوزی درد دل ائده چاه بیابانه علی
گوزلیوللر یولووی ایندیده چولده قویولار
عادت ایلوبلر اولار سنده کی افغانه علی
یوخدی تاریخیده بو نکته که رهبرگجه لر
نان وخرما آپارا منزل ویرانه علی
سنی ئولدوردی عدالت ، نه مُرادی نون الی
اهلی آنلار بونی ئوزگه بیلر افسانه علی
کیمدی سن تک اولا تابوتیده یورقون بدنی
ئوزیده حاضر اولا شام غریبانه علی
سنه کیم آغلاسا گر گوزدن آخان قطره لری
اوخشیار بحریده کی گوهرغلطانه علی
ای گوزوم آغلا بو احواله گجه یلن گونوزی
سجده ی عشق وعبادتده باتوب قانه علی
نامرادی له، مُرادی ، ال اله وئردی اوگون
تا عبادتده باتا قانینه مردانه علی
قویدولار کُهنه گِلیمه شَهِ مُلکِ نجفی
اولدی قربان دئدیلر یازدیقی قرآنه علی
کاسه لر الده یتیملر گتوروب صود وئره لر
قاتله قیلدی اشاره شَهِ فرزانه علی
یعنی قاتلده گرک حیدر ایچن صوددن ایچه
گوستروب راَفتینی عالم امکانه علی
بویوروب ئولمسه حیدر بونی ئولدورمیه سوز
عفو ائدر قاتلینی گئتمسه رضوانه علی
سنه عرضیم بودور ای قاتلینه رحم ائلین
رحمتیله کَرَم ائت یازدیقم عنوانه علی
نَدَن ای کانِ کَرَم دوشمدی هئچ شامه یولون
اونداکی دوشدی قیزون منزل ویرانه علی
قالدی بیر حاله رقیّه که اونون حالتینه
آشنا سهلیدی قان آغلادی بیگانه علی
اکبرین آدینی آخشام چاقیلار ورد ائله دی
سویلدی بنزور ایویم شامیده زندانه علی
ایستیَردون هامودان چوخ منی بو طایفه ده
هامیدان چوخ منی اینجیتدی بو غمخانه علی
سازش ائتمور منیلن ایستی گونوز غملی گجه
عادت ائتمور اوره گیم صبر ائده هجرانه علی
خبرون یوخدی بو غربتده نه سوزلر دیولور
اود وُرور طعنه لی سوزلر دل بریانه علی
چوخ دیوللر خبری یوخدی که قارداشی ئولوب
دوندروبدور بو خبر اشکیمی بارانه علی
ائله آشفته ائدوب فکریمی بو غصّه منیم
اوخشورام یئل داغیدان زلف پریشانه علی
گجه لر گوشه ی ویرانه ده بیر مجلس اولور
ائله مجلسدی دگر عا لم امکانه علی
نوحه خوان عمّه م اولور بیزده اونون آغلیانی
آیری بیر شور گلور مجلس عرفانه علی
گَل بیزیم هیئته باخ قلبی یانانلار یئریدی
اویانان دللره ایله منی پروانه علی
یازدی داور بو سوزی آغلادی بو غمده ئوزی
وارت عجّب یئری گر اولمادی دیوانه علی
عرض ائدوب من کیمیدیم نظمه چکم گُل سوزونی
کَرَمون شامل اولوب مرغ غزلخوانه علی
منبع:وبلاگ کوثر(انتظاری)
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.