سن سفیر عشق سن جانانه یا موسی ابن جعفر
مظهر الانوارسن یزدانه یا موسی ابن جعفر
سن امام هفتم اقلیم توحید و وفاسن
واردی حیدر قانی سنده وارث شیر خداسن
پیر دانشگاه عرفان، درد عشقه آشناسن
بیر گوزل آئینه سن قرآنه یا موسی ابن جعفر
منزلت آثارسن، بیر شهرتون کاظم دی مولا
واجب الطاعتدی امرون، حرمتون لازمدی مولا
بوسه درباروه شاه و گدا عازمدی مولا
دامنوندن دوتمشوق درمانه یا موسی ابن جعفر
گورمیوب گورمز زمان سنده اولان ذکر و سجودی
نوکر دربارون اولماق، خلق ایچون خوش آرزودی
ساخلیوب ماتم سنه هر شیعه که فرزانه خودی
خوشدی عشقونده یاناق مستانه یا موسی ابن جعفر
هفت شهر عشقی سن گزدون کلام حق دیلونده
پرچم شیعه اوجالدی موسوی اعجاز اَلونده
علموون موجی سَروب دامن ولایت ساحلونده
وئردی جاویدان بقا ایمانه یا موسی ابن جعفر
دولت حقّون شماتت ثروت قارونه وردی
دشمن توحید سنلن، بیعت وارونه وردی
تیغ گفتارون صلا نابودی هارونه وردی
ایلدون فریاد حق مستانه یا موسی ابن جعفر
هم ئوزون خلقتده تک سن هم آدون دنیاده تک دی
همتون تخم شرافت مزرع تقواده اکدی
حق دانیشدون ، دشمن جانی سنی زنجیره چکدی
اون بیر ایل تاب ایلدون زندانه یا موسی ابن جعفر
سَلب ائدوب تاب و توان اشرار خون آشام الوندن
شهد عمرون زهره دوندی، سندی دوشدی جام الوندن
سِندیِ ابن شاهکون ظلمی آلوب آرام الوندن
آچدی اَل دست خطا عصیانه یا موسی ابن جعفر
قویمامشدی دست کین قالسون سنه نیرو بدنده
پیکرون زنجیر یده، روحون تمنای وطنده
بیلمورم دوزدون نجه رخساروه سیلی دگنده
آهون اود یایدی بوتون کیهانه یا موسی ابن جعفر
جان اریتدون سسلدون، الله و اکبر دور حبیبیم
سن دینده عشق الیندن جام زَهر اولدی نصیبیم
روح زهرا سسلنردی، وای غریبیم وای غریبیم
عشق حق سالدی سنی بحرانه یا موسی ابن جعفر
حفظ قرآنه گوره سدّ بلا اولمشدی جانون
آتش هجرونده یاندی ایللریلن خاندانون
ثِقل زنجیر و رطوبتدن کیچیلدی استخوانون
یا مُخلّص سسلدون جانانه یا موسی ابن جعفر
دوشدون ای مولا هما تک دام صیادان پسته
جان وئرن ساعتده سن، دل بی رمق نالان و خسته
کاش معصومه قیزون ، حاضر اولیدی باشون اوسته
شمعه خوش لایلای چالار پروانه يا موسی ابن جعفر
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.