سوم شعباندی عالم خرّم و دلشادیدور
فاطمه روحی حسین ابن علی میلادیدور
طالع اولدی مهر رخشان تک جمال انوری
گون کیمی پخش ایلدی نورین دوتوب عالملری
دوندروب رضوانه دنیانی قدوم اطهری
گل کیمی آچدی گلستان پیمبرده حسین
گللری گلزاریده ایتدی دل افسرده حسین
موجه گَلدی بحر لطف خالق ارض و سماء
اوز ولیسی مرتضایه بیر اوغول ایتدی عطا
گورمیوب گورمز نظیرین چشم دنیا برملا
بیر وجاهت خلق ایدوب بوندا خداوند ازل
اولسا مین یوسف گوزل لیقدا بونا اولماز بدل
آفتاب برج دین ابر آتدا اولموشدی نهان
بو گونون مثلینده خالق ایستدی ویرسون نشان
قدرتیله برطرف ایتدی غمامی ناگهان
گون کیمی اولدی عیان نور جمال احمدی
عالمی ایتدی جنان نور جمال احمدی
تا قدم قویدی جهانه حجّت روی زمین
ایلدی فرشی کنار قویدی یر اوسته صورتین
قوزادی سبّابه بارماقین گویه اول شاه دین
سویلدی هر نه بلا گَلسه الهی راضیم
امریوین اجراسینه حاشا جهاندا لا دیم
ناگهان قدّوسیان نازل اولوب گویدن یره
گَلدیلر شوقیله بیر باش دودمان حیدره
تهنین هم تسلیت عرض ایتدیلر پیغمبره
شوق و ذوقیله او مولودی زیارت ایتدیلر
دلده بو سوزلر سمایه ساری رجعت ایتدیلر
بیر بیره سولردی یار اولدی عجب اقبالیمیز
عالم ایچره گور نجه مافوق اولوب اجلالیمیز
بیز حسین زوّاریوخ کیمدور اولا امثالیمیز
یر اوزونده گیتمیشوخ کسب سعادت ایتمیشوخ
کربلا شاهی حسینی بیز زیارت ایتمیشوخ
محضر پیغمبره گَلدی ملائک لر تمام
قالدی امّا حاملان عرش حیّ لایَنام
عرض ایدوبلر ای خداوند کریم و ذوالکرام
حامل اول یا عرشیوه بیز ارضه رجعت ایلیاخ
مصطفی پیغمبرین اوغلون زیارت ایلیاخ
یا اجازه ویر گَتورسونله حسینی گویلره
ایلیاخ بوردا زیارت اولماسون غم بیزلره
امر ایدوب روح الامینه حق که نازل اول یره
جبرئیلا سویگلوم لازمدی گَلسون عرشیمه
گیت گَتور عرشه حسینی زینت اولسون عرشیمه
جبرئیل نازل اولوب گویدن شتابیلن یره
تا قماطین تشنه لب شاهین آپاردی گویلره
باشینون دسمالی زینت اولدی عرش داوره
حاملان عرش اونی گویده زیارت ایلدی
عرشینه ا... حسینیله زیب و زینت ایلدی
بیر وجودیکه گوی اهلی گورماقا مشتاق اولا
بیر شهیکه باشینون دسمالی زیب عرش اولا
نه روادور خولی اول باشی کول اوستونده قویا
فاطمه آلدی سراغین اوغلینون زار و ملول
دوتماقا شام غریبان کوفیه گَلدی بتول
"خالدی" ساخلا الون بو عرصه ده وورما قلم
عیدیانه باره سینده سویله ای شاه امم
بیز سنی شهزاده اکبر جانینه ویرّوخ قسم
نه روادور فرقتونده گل کیمی شاها سولاخ
ایسته بیر وقفه حسین جان قبریوه زوّار اولاخ
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.