بو یر مهد وفادی بوراشهر صفادی
بورا باخ باجی زینب بو یر کرب و بلادی
بو یرده باجی زینب گیدر لشکریم الدن
باتار قانه جمالی گیدر اکبریم الدن
گیدر حلقی یارالی علی اصغریم الدن
بو صحرای بلاده دوشر خنجریم الدن
بورا شهر عروج شهیدان خدادی
بو یرده باجی الدن گیدر صبر و قراریم
ره عشقیده الدن گیدر دار و ند اریم
چالیخلار الیم اوسته قولی باغلی قناریم
بودور نیّتیم اول اولا راضی نگاریم
حسین خالقه خاطر بو آلامه رضادی
بو صحرانی گورورسن بیاباندی سراسر
نه وار منزل و مسکن نه وار باغ مشجّر
حسینون قانی ایلر بو تپراقی معطر
گوررسن کی بو صحرا نجه گلشنه بنذر
دییرسن کی الهی بورا عدن خدادی
سلیمان زمانون اولار گوندوزی قاره
قالار گللریم حسرت منیم فصل بهاره
او قدری کی ویراللار بو چولده منه یاره
گیدر طاقتیم الدن سالار جسمی فشاره
کسن باشیمی دالدان باجی شمریدی آدی
بو وادی بلاده باتار قانه وجودیم
قویار عالمی حیران چوخور یرده سجودیم
منی سجده ده گورسه خداوند ودودیم
دییر اهل سمایه او سرچشمۀ جودیم
باخون کرب و بلایه او شاه شهدادی
ایدر ناله بو تپراق یره قانیم آخاندا
یانار عرش ، خیامیم باجی اوتدا یاناندا
توان یوخدی بو غمده نه یرده نه زماندا
منیم نازلی رقیّم تیکان اوسته قاچاندا
او اوچ یاشدا عزیزیم نگین اسرادی
بو تپراق باجی مفخر اولار بیت خدایه
نه تک بیت خدایه ایدر ناز سمایه
اولاجاق بورا مدفن شهیدان ولایه
گلر بو یره یکسر پیمبر لر عزایه
بوتون اهل جنانه بو یر دارالعزادی
بو تپراق گوره جک سن ویرر عمده نتایج
بو تپراق باجی ایلر هر امراضه معالج
اولار سکّه سی بی شک هامی عصریده رایج
یاتار چونکی بو یرده ایکی باب الحوائج
بیری سود امر اوغلوم بیری کان وفادی
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.