اشعار مذهبی ترکی و فارسی

حکم قرآندور مسلماندا حجاب اولسون عم اوغلي 

باحيا عورت يوزونده بير نقاب اولسون عم اوغلي

هانسي موجودون که دلده اصطلاحي کيميادور

 گورميوب چوخ گوز او موجودي نظرلردن خفادور

 بيله بير اکسيردن منظور عصمتدور حيادور

 مو به مو واقف گرکدور شيخ و شاب اولسون عم اوغلي

بي خبر انسان اولا، بو کنزيدن سرمايه سيزدور

 سستدور بنياني، استحکامي يوخدي، مايه سيزدور

 اولسا بنت عامره حتّي اگر پيرايه سيزدور

 ايستر عالي مرتبت عالي جناب اولسون عم اوغلي 

مصحف منزلده نسبت عفّته وار هر نه آيات

 لازم الاجرادي، حکمُ ا... گرک اولسون مراعات

 کافره مسلم حجابيله ايدر فخر و مباهات

 ايستمز معموره ي مذهب خراب اولسون عم اوغلي 

زندگانليق پرده سيز ايتمز خواتين مجلّل

 مخزن ناموس و عفّت درگهين ايتمز مقفّل

 ويرمز الدن عصمتين، ساخلار اوني مانند مشعل

 رهنماي خلق مستقبل حساب اولسون عم اوغلي 

ماجراي بيعتين سونمز گوگلدن التهابي

 مسجده گيتديم يوزومده ايلديم محکم نقابي

 قدرت ا..َ. اللريندن تا که آچديرديم طنابي

 ايتمديم طاقت بو قولّاردا طناب اولسون عم اوغلي 

بو يدا..َ. اللرون باغلانمادي تک بيعت اوسته

باغلين آگاهيدي باغلور الون نه حکمت اوسته

 بيرده سندن من بُلوردوق باغليوب حرّيّت اوسته

 اختناقه يول آچيلسون، فتح باب اولسون عم اوغلي 

بو مبرهن دور که فتح مکّه ده اي شير داور

 بو ايکي ال همّتيله سرنگون اولدي صنم لر

 نقش طاغوتي داغيتدي نقشه ي ا... اکبر

 اهل باطل ايستور ايمدي حق مجاب اولسون عم اوغلي 

بير بويوک طومار محنتدور قباله ادّعاسي

 يالقوز عورت، ظلم ثاني، کوچه و بازار آراسي

 بير شل اولموش ال جفاسي، گوشواره ماجراسي

 گور نجه منده دوام و صبر و تاب اولسون عم اوغلي 

قابل بخشش دگل بير عدّه نون جرم و گناهي

 درگهيم اوددا ياناندا ياندي قلب ماه و ماهي

 آتش ظلميله ياندي مهبط وحي الهي

 وار يري پيغمبرين قلبي کباب اولسون عم اوغلي 

کاش درگاهيم ياناندا خيمه ي گردون يانِيدي

 نجم تک محنت افولينده دل هامون يانِيدي

 نه صدف قلبي سينِيدي، نه دُر مکنون يانِيدي

 بير بيله دلدن گرکمز التهاب اولسون عم اوغلي 

کاش گلشنده گُلون هم خانه سي خار اولميِيدي

 آيريليق، بيرليق اولِيدي ياريدن يار اولميِيدي

 بير زمان ساکن اولِيدي چرخ دوّار اولميِيدي

 بو يوزي قاره فلک بي آفتاب اولسون عم اوغلي 

ايستوري دست اجل روحي بدندن آيري سالسون

 عندليبي غنچه دن گُلدن چمندن آيري سالسون

 محضروندن دويمين زهراني سندن آيري سالسون

 قويموري کامينجه دلدن کامياب اولسون عم اوغلي 

نيمه جان بسمل اولوب من قالموشام کنج قفسده

 جان گيدر تحليله هضمه درد اليندن هر نفسده

 يوخدي ياراي تکلّم حيف اولا دوتقون بو سسده

 شائقم که چوخ سواله چوخ جواب اولسون عم اوغلي 

اگلشوب داغلار بويي داغلي دليم اوستونده داغلار

 لاله تک داغلي گوگل داغلي دل دنياني داغلار

 بير بيله داغلار قبالينده دوام ايتمزله داغلار

 وار يري داغدان بو داغ تک دل مذاب اولسون عم اوغلي 

نظميله نظمه بو شعري حافظي صالح سالوبدي

 گوئيا روح القدسدن تک به تک الهام آلوبدي

 دللرون آچسان بو ايده حکّ اولوب دلده قالوبدي

 دادرس ابن ترابه بوتراب اولسون عم اوغلي

منبع:وبلاگ اشعار آیینی