واحسرتا آيردي اجل ياري ياريدن
زهراني آلدي حقّي گيدن شهرياريدن
ايتميشدي چون وصيّت اوزي ويردي غسليني
دفنين ايشيت قلمده اولان اختباريدن
زهراني تا يتورديله قبرين کنارينه
باخدي مزاره ساقي کوثر کناريدن
توکدي عذارينه گوزياشيني، ياندي، آغلادي
بير آه سرد چکدي دل داغداريدن
امر ايلدي جريده لري ايتديلر خموش
کام آلدي شب او سرور شب زنده داريدن
شهر مدينه خلوت و خاموش و بي فروغ
عالم سکوت محض شب مرگباريدن
محبوس سينه لرده نفسلر نه وار مگر
کيم آيريلور بو دامگه مستعاريدن
آغلارديلار صحابه، ولي شمع تک خموش
آلموشدي مشق گوزلري ابر بهاريدن
سلمانيدي اباذر و مقداد بُلمورم
تشييع ايدن او بانوي والاتباريدن
قبرين کنارينه يتيروب قويدولار يره
افسرده دل او حادثه ي ناگواريدن
امر ايلدي امام که مندن کنار اولون
يوز دوندرون بو درد و غمي بي شماريدن
پيغمبرين قيزين من اوزوم قبره تاپشورام
پيغمبري خلاص ايليوم انتظاريدن
امر امامه ايلدي اصحاب امتثال
آيريلديلار او محفل پر آه و زاريدن
تا بزم راز خلوت اولوب غير قالمادي
آيريلدي صبر و تاب او شه بردباريدن
بير قالدي نعش فاطمه، بير مرتضي علي
درياي صبري سالدي بو غم اختياريدن
حسرتله باخدي بير او يارالي جنازيه
آخدي سرشکي ديده ي گوهر نثاريدن
گوردي خزان لهيبي ايله سولدوروب گُلين
ذوق و صفا علاقه کسوب لاله زاريدن
بير قدر درد دل ديدي، بير قدر آغلادي
اسگيلمدي شراري دل پرشراريدن
زهراني بير محبّتيله باسدي باغرينا
هجرانه توشه اخذ ايلدي وصل ياريدن
بيرده سخلدي بير بيرينه داغلي سينه لر
آيريلدي، آيريلانمادي مولا فشاريدن
سسلندي قالدي فاطمه ديدار محشره
بو آيريليق عليني سالار اعتباريدن
اي کاش اجل گلوب منيده راحت ايليه
سنسيز نه خير عالم ناپايداريدن
دنيايه باخ علي اُلومون آرزو ايدر
فرياد، گردش فلک کجمداريدن
زهرا جنازه سي نيه گيزلينجه دفن اولور
بلمز هامي بو سرّي سوروش هوشياريدن
دشمن هراسي بير نچه مخطور ناگوار
خيبرشکن عليني سالوب اقتداريدن
مجبور اولوب بتوليدن اوز الفتين کسوب
مرگ ايتدي عندليب گُلي جور خاريدن
آق زلفيني، سولان يوزيني قويدي توپراقا
تا اولدي روزگار علي شام تاريدن
فرمايش ايتدي فاطمه شرمنديم اوزوم
مجروح سينه دن، بدن زخمداريدن
بير خواهشيم بودور که عليني گذشت ايله
چوخ دردسر يتوب سنه بو شرمساريدن
سن مندن اوتري جانيوي سالدون بلالره
چکدون او قدر رنج و اذيّت شراريدن
دويدون حياتيدن، اوزيوه ايستدون اُلوم
هر بير فريضه دن صورا پروردگاريدن
گيتدون اوزون، عم اوغليوي قويدون شکسته دل
هجرون قرار آلار بو دل بي قراريدن
پيغمبرين حضورنه مندن يتور سلام
عرض ارادت ايت بو ملول و فگاريدن
عرض ايله غصب اولوندي جفائيله حقّيميز
آگاه قيل او شاهي سرانجام کاريدن
هر شکوه يا گلايه آپارسان آپار ولي
هرگز آپارما آد ستم آشکاريدن
سيلي حکايتين، در و ديوار صحبتين
مستور ساخلا سن او شاه تاجداريدن
کشف ايتمه اسدي گلشنه باد جفاي خار
بير غنچه پرپر اولدي بيزيم شاخساريدن
امّا ديسن دي من ايله دلدن سيزيلداديم
آلديم توان و طاقتي هر رهگذاريدن
آخِر ايويمده آغلاماقا مانع اولدولار
صحراني اختيار ايلديم اضطراريدن
تنگ ايتديلر بو وسعتيله ير يوزيون منه
کسديم علاقه جبريله دار و دياريدن
گَلديم حضوريوه بُله سن سرگذشتيمي
باخسان يارالي جسميمه نيلي عذاردن
امّت رعايت ايتمدي شرط امانتي
گويا يوخيدي واهمه روز شماريدن
خوندل بولار ذخيره دي فرداي محشره
نه شعريدن حساب ايله، نه شاهکاريدن
منبع:وبلاگ اشعار آیینی
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.