بیر گون ایلشمیشیدی آل علی بیر یرده
سینه لر تنگه دوشوب گلدی اورگلر درده
اوغلی ئولمیش ننه لرقارداشی ئولمیش باجیلار
کربلا واقعه سین یاده سالوب آغلادیلار
بیر قوجاعورت اودم عجزیله دوردی ایاقا
آل حیدر باشینی سالدی حیادن اشاقا
ایاقا دورماغی گرم ایلدی حضاره یاسی
او خانم ام بنینی دی اباالفضل آناسی
سرو تک آچدی او دریای حیا خولارینی
زینبین گردنینه سالدی اوزون قولارینی
دئدی قارداشلاریون بوردا یری بوشدی خانم
بو سنیق قلبیوی آرام ائلسم خوشدی خانم
ائله قلبیم داریخور آه ونوادن دانیشون
بیر نچه جمله منه کرب وبلادن دانیشون
خبریم وار بالامون یاره سی حددن چوخودی
اورگین قان ائلین گوزده که اوچ پر اوخودی
بو سوزی فاش ائت ایاق اوسته دایاندیرما منی
هرغمیننن چوخ اونون هانکیسی یاندیردی سنی
دئدی زینب اونا ای مادر شجعان عرب
نیه خاطر ائدیسن زینبه گوندوزلری شب
پارچالانمیش بدنین فاش ائدیم آیا هاراسین
نجه اظهار ائلیوم باشدا عمودین یاراسین
اوچ پراوخ آننینا دگدی اورگی قان اولدی
قولارین سالدیلار آواره میدان اولدی
دیه بیللم که بیزیم قلبیمیزی داغلادیلار
بدنین باشدان ایاقه بالاوین دوغرادیلار
قطعه قطعه ائلدی پیکرین اشرار زمان
او اوجا قامتیلن قبری کیچیکدی هامیدان
دئدی؛زینب بولاری فاش ائلیوبسوز بیلورم
بیر سوزوم واردی ولی یاده دوشنده ئولورم
بالامون غیرتی حددن چوخودی سن بیلوسن
اونی سقا ائلمیشدی سیزه سلطان زمن
دئ گوروم خیمیه سو گتدی که من راحت اولام
یا که شرمنده اولوب سیزدن او غیرتلی بالام
بویوروب حضرت زینب اونا آی غملی آنا
یار وانصار حسین هاموسی باتمیشدی قانا
یوخودی داده چاتان خیمه ده غوغائیدی
بیر حسینیون کمکی یاوری سقائیدی
هامینون خیمه ده امیدی گلیردی بالووا
بالالار منتظریدی گده عباس سووا
تا سومشگین گوتوروب ایلدی میدانه شتاب
اللرین قوزادی شکر ایلدی خلاقه رباب
آلدی آغوشه سوسوز طفلین او دریای وقار
دئدی صبر ایله بالا پیس گونون عمری آز اولار
گربیر آزصبر ائلسون خانه دردی ییخارام
سو گلر خیمیه شرمنده لیگونن چیخارام
صبحدن گر چه ربابین گونوزی شامیدی
تا علم یاتمامیشیدی بیرآز آرامیدی
ولی ناگه بو خبر خیمه ده طوفان سالدی
دئدیلرئولدی اباالفضل حسین تک قالدی
ایستمیردوم بو سوزی فاش ائلیم اولده
علی اصغر سوسوز اوخلاندی ننه مقتلده
سیخدیلار ام بنینون بو مصائب اورگین
دیزی اوسته اوتوروب دوتدی ربابین اتگین
دئدی بیر سوز دیورم سعی ائله سن رد ائلمه
اوغلی ئولمیش ننیه چاره یولین سد ائلمه
ائله قلبیم داریخور رفع ملال ایله رباب
سنی اصغر جانی عباسی حلال ایله رباب
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.