تا باتوب شام غریبان آیی گون اولدی پدید
سفره حاضر اولوب لشکر گمراه یزید
شامه ایستور اسرانی آپارا قوم پلید
قوملار اوستونده یاتوب پیکر مردان خدا
ولی پیکردن اولوب رأس شهیدان جدا
سسلدی شمر ، مینون ناقه لره آی اسرا
قمچی یولداشدی سیزه شامه کیمین صبح و مسا
یوخدی عباس سیزی نازیله شامه آپارا
بی جهاز اشترون اوستون ایلیون فوری مقام
یوخدی بوندان داخی تأخیره بو لشکرده دوام
جمع ایدوب زینب علیا اسرانی باشینا
باخدی حسرتله قراگون یارینا یولداشینا
دیدی مژگانوزی سیز سد ایلیون گوزیاشینا
سعی ایدون آغلامیون دشمن آرا آی بالالار
اولمیون راضی بیزه قوم دنی ال چالالار
واردی حقّوز کی حسین دردینه دل داغلیاسوز
قاسمون قانه باتان تللرینه آغلیاسوز
گوزیاشین اصغره خاطر یوزوزه باغلیاسوز
اشکوزون علتینی گرچه بولیلر نیلوم
آغلیان گوزلروزه بوردا گولیلر نیلوم
صدمه دگمز بیلوسوز حق سو ویرن ریشه لره
شامیده واردی خطابیم بو بد اندیشه لره
ویرمیون ایندی بهانه بو ستم پیشه لره
بو سپه دینی ساتار دهریده بیر کیسه زره
آتمامیش قمچیه ال فوری مینون ناقه لره
امر زینبدن اطاعت ایلدی اهل حیا
میندیروب ناقیه أوز لشکرینی ام بلا
میندیروب حضرت کلثوم و امامین حتی
قالدی تک زینب أوزی باخدی بیراز ساق سولونا
قلبیدن آه چکوب باخدی فراتون یولونا
دیدی قارداش گوزون آچ زینبه امداد ایله
قید آلام و بلادن منی آزاد ایله
آی حسین کاشف کربی منیده شاد ایله
ایلیوب خصم دنی گوزلریمه تار گونی
یتیشوب زینبوون محشره اوخشار گونی
قلبیمی غم بوریوب یوخدی بو عالمده بیلن
گوز یاشیم گوزدن آخور رأفتیلن یوخدی سیلن
دور منه چاره ایله آی قولی تندن کسیلن
یدّی قارداشیم أولوب دیندیرنیم یوخ قارداش
ناقه نین اوسته منی میندیرنیم یوخ قارداش
میندی مین محنتیلن ناقیه سیمای وفا
ایستدی باشلیا یول قافلۀ درد و بلا
لشکره امر ایلیوبدور او زمان شمر دغا
دیدی تیر غمیلن قلب اسیرانی یارون
اسرانی شهدانون وسطیندن آپارون
ایتدی بو امره عمل لشکر بی غیرت و عار
ایله زینب غمینه گوزیاشووی شیعه نثار
ناقه دن گوردی ایلیکی شهدانی بالالار
دوزمدی هیچ بیری تا زینب اونا اذن ویره
ناقه اوستن أوزونی خردا بویوک آتدی یره
هر بیری سینه سینه تیر غم و دردی ساچوب
گورمگه یارینی وصلت قاپوسین دلده آچوب
هره أوز دلبرینون پیکرینه ساری قاچوب
لیلی اکبر بالاسین اوخشادی افغان ایلدی
قاسمون مادری گوزیاشینی القان ایلدی
دیده ده ایله تصور او چتین مرحله نی
اسرا پیکرینه لرزه سالان هلهله نی
بالا قیزلار او هیاهوده گودور حرمله نی
چون اونون ظلم لری قلب اسیرانی سیخار
غیضیلن باخسا اگر هر بالیا جانی چیخار
آنالار ناله سی طاقت دل خاتم دن آلوب
ولی بو غم سینمه آتش جانسوز سالوب
اسرادن ایکی بانو ولی آواره قالوب
اولارون ایندیده آفاقی دلور اوخشاماسی
بیری کلثومیدی امّا بیری اصغر آناسی
زینبه فوری یتیردی أوزونی غملی رباب
عرض ایدوبدور بو محن قلبیم ایوین ایتدی خراب
بو سؤالیمه خانم سویله منیم یاخجی جواب
آز قالور یاسلی ربابون چیخا بو جولده جانی
سنی اکبر جانی اصغر بالامون قبری هانی
سینمی اصغریمون محنت هجرانی سیخور
کاخ آمالیمی بو شدت آلام یخور
منه گوستر بالامون قبرینی قلبیم داریخور
من فقط سندن اِشیتدیم کی بولوب اوخ هاراسین
گورمدیم لیلی کیمین اوغلومون امّا یاراسین
بیر سه پر تیره اولوبدور بالامون حلقی نشان
گوئیا بیر دریدن اولدی باشی آویزان
سوزی روشن دیورم من سنه ای شیر زنان
أولرم باشینون اوسته گر اوغول وای دیمسم
یانارام قبرینون اوسته اونا لایلای دیمسم
نجم اسپهر شرافت بو بیاباندا باتوب
نجه دلسیز بالا بی کس آناسین گوزدن آتوب
اوچ گونون تشنه سی علت نَدی آسوده یاتوب
ایستورم باشینون اوستونده دییم بو سخنی
اصغریم سن بیل علی حقی حلال ایله منی
اگر قبلا در بیان ثبت نام کرده اید لطفا ابتدا وارد شوید، در غیر این صورت می توانید ثبت نام کنید.